JONAH 3
3
Jonah no Nineveh lo Wu
1Tithiu Ampeu tsa akiniu Jonah lau ishi ighi, 2“Ithulo, mishighüna kije Nineveh lo wulo, eno I no o vilo pikeu tsa pesü panongu lachile pilo.” 3Ikehu Ampeu tsa kiqi lono Jonah no ithu Nineveh lo wuve. Nineveh ye shishe akuloghi ghüna, akijelau atsala küthü lache ke. 4Jonah no tile ilo atsala lakhi lache lo wuve, eno pi, “Atsala lhobidi thiu Nineveh ye kütsaleve nani!” 5Nineveh lo timiqo no Alhou pülüve. Panongu no kümvüni ke asheshu, eno akijeu lono akitilau kutolo yeqhiyephi pepuve.
Ninevehmi no Xaide
6Atsa huno Nineveh kükau tove, eno pa no aküka lakhü lono ithuve, pa kükaphi lhaqhive, yeqhiyephi pesü pa küzüluve, eno ayevu lo iqave. 7Eno pa no ashekushu lakhi tsüpuwu no Nineveh lo asheshupe, “Akükau eno paw yepemiw xaküthaza kiqi lono: timi na tüghashi na, pichepighi jeli namu, kiumu miche moni. Khunomu chusho moni, 8ikemu timi eno tüghashi ghi yeqhiyephi pepuni, eno Alhou lau akumtoshi ighamkuni. Kümtsü no paw küsakügha laghi eno kütsakungo keu lono xaideghi lo. 9Khuu no ithi ani kea? Alhou ye xaide luvi eno Pa yiküsa mlokighide süchile luvi, tishi keu lono ningu ye pühamo luvike.”
10Kughou panongu no küsakügha laghi lono xaide ighi akeu Alhou no ithulu keno, Pa no panoqo lau amhekiqi süghini piakeu süchileve, eno Pa ye tipau shimove.
Currently Selected:
JONAH 3: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
