JONAH 4
4
Jonah Mlokighide eno Ampeuw Kimiyekini
1Ikemu tino shishe Jonah loshipüsüve, eno pa ye amloideve. 2Pa no Ampeu lau inikhu no pi, “O Ampeu, hi ye I no I ghakhu lo aphi lono pi akeuke kumo keshea? Tighenguno ni ye mtazü Tarshish lo pove niye shike; kughengu I no ithi ake No ye kimiyekini eno küpükini, amloideni keu lo asheshi eno iqemokeu kikimiye no chhitoi, eno amhekiqi lono süchileve chekeu Lhou ke. 3Tighenguno O Ampeu, itehi ye kimiyeno I küxüu luve tsülo, kughengu I ghenguno xü akeu ye thiveke pavivae.” 4Eno Ampeu no pi, “No ye amloide küzüpu kiu ani kea?”
5Jonah no mishighüna khalau ipeve no kipelau pa sala apusho lakhi shipe qhi. Pa no tipau kicheqho lo iqa no mishighüna ye kiu shive nani keno ju ghi khea. 6Tilehi Ampeu Alhou no atsünibo lakhi ipeghipe eno tipau no Jonah kütsü shou akicheqho shi thuikughipe, tishianguno alokümgha lono pa süsholu peniye ke. Ikehu Jonah ye atsünibo ghenguno shishe alovive. 7Ikemu kughou thanau vüipeghi keno, Alhou no apithe pelo atsünibo tipau tsaqhipe, ikehu ti ye thizümüive. 8Kughou khetsünhe ipeghi keno, Alhou no kipelau shukuthui keu mülhü puwu, eno khetsünhe no Jonah kütsü yedaqhi, ikehu pa ye thiuve cheghi. Pa pelo thive pelopi pa no khu, “I ghenguno xü akeu ye thiveke pavie.” 9Ikemu Alhou no Jonah vilo pi, “No ye atsünibo ghenguno amloide akepu keshea?” Pa no pi, “Iyei, ni ye amloide akeu pavie, thiveni keu mlokighide pavie.” 10Ikehu Ampeu no pi, “No ye atsünibo khikhi nono shosümo momu thuiku pemo keno, kijili lakhi lono ipeghi no tipaji no püghave keu ghenguno amlosa ani. 11Imaye Ni ye mishighüna kuloghi Nineveh, khile timi lakh lakhi qhethonhe muku shou ani eno pichepighi ghi tijeje ani keno, tipaqo ghenguno amlosa moni keshea? Panongu ye pano u ajeu ngo piyiu ghi mtha kemie.”
Currently Selected:
JONAH 4: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
