JOHN 20

Xüchilekulu

(Mt 28:1-8; Mk 16:1-8; Lk 24:1-12)

1Apinedo lo atsala atüghüni inaqhe züghüi aphi lono, Mary Magdalene no akumoki lo ighi, eno akumoki kichi lo atuqu akeu tukulove aghikeu ithulu. 2Ikehu li no posü Simon Peter ngo Jisü no kimiye chekeu akhopeu pama lau ighi no pama vilo pi, “Panongu no akumoki lono Ampeu pewuvae, eno khila qhove akeno ningu ye mthae.” 3Tile Peter no akhopeu lakhiu sasü akumoki küdau wuche. 4Pama kümtsa poche kemu akhopeu lakhiu no Peter züthave eno pa no atüghüshi akumoki tove. 5Pa no pishipulo jukelo phepheike phi tile akeu ithulu, ikemu pa ye alou ilomoe. 6Tishino Simon Peter ghi pa papesü ighi no akumoki alou ilove. Pa no tile phepheike phi aghikeu ithulu, 7eno agi küküzü phi, khikhi Jisü kütsü nhapüa keno ti ye phepheike phi gholo kumono ti kütashi küqhüchhe püaghi. 8Tileno akhopeu lakhiu, atüghüshi tokeu ghi alou iloghi eno pa no ti ithulu no pülüve; 9kughengu ti kutolo panongu ye Kuchoyesü lo, pa ye akithi lono ithughive masae, ipikeu vethamla no ae. 10Tishino akhopemi ye pano kilo idewove.

Jisü no Mary Magdalene lau Ipeghi

(Mt 28:9-10; Mk 16:9-11)

11Ikemu Mary ye akumoki khalau puthughope qa ae, eno li no qa ghi akumoki lo pishipulo ju. 12Ikelo kungumi kini metsüghoi keu phimini pepusü Jisü sükumo qhipüake-a lo, lakhi no akütsü küdau eno lakhi no apukhu küdau iqa aghikeu li no ithulu. 13Pama no li vilo pi, “Totimi, no ye kushiye qa ani kea?” Li no khochile, “Panongu no I Mpeu pewuvae, eno khile pa qhove akeno ni ye mthae.” 14Tishi pive no li no igho ighi kelo Jisü no puthugho aghikeu ithulu, ikemu ti ye Jisü kepi li ye mthae. 15Jisü no li vilo pi, “Totimi, no ye kushiye qa ani kea? No ye khuu phucheni kea?” Li no pa ye aghutu kümlau küghashi pa khochile, “Akijeu, nono pa pewuve aghi aye, no ye khilehi pa qhopüani keno I vilo pitsülo, I no wuno pa pewuveni.” 16Jisü no li vilo pi, “Mary.” Li no igho ighi no Aramaic tsauno pi, “Rabboni!” (tipa kiqi ye Shikükau). 17Jisü no li vilo pi, “I bu kevilo kughengu ni ye Apu lau iku mphie. Ikemu I thiküzümi lau wuno panoqo vilo pilo, ‘Ni ye I Pu eno nongu Papu lau, I Lhou eno nongu Lhou lau iku cheae.’” 18Mary Magdalene no wuno akhopemi vilo, “Ni ye Ampeu ithuluvae” ipi sheshu, eno pa no li vilo pikeqo ghi pie.

Jisü no Akhopemi lau Ipeghi

(Mt 28:16-20; Mk 16:14-18; Lk 24:36-49)

19Tipa tsalani avelau Jewmi msa kehu akhopemi ye ahukikha khaveno ngo akelono Jisü no ighi no panongu gholo puthughove eno pi, “Nongu gholo aloino keu alo.” 20Pa no hipatsa pive kethiu, pa u ngo pa jibo pesü panoqo piye. Akhopemi no Ampeu ithulu kelo alokivi shive. 21Jisü no itaghi panongu vilo pi, “Nongu gholo aloino keu alo. Apu no I puwu ketoi ni ghi nongu puwu ani.” 22Pa no hipau pive kethiu panoqo shou atuthu shepuku no pi, “Aghungu Kimthe sasü lulo. 23Nongu no khuno kipimi qhive tsüni keno, pano launo tipau qhivetsü ake; eno nongu no khuno kipimi qhitsümoni keno, panoqo launo tipau qhitsümo nani.”#Mt 16:19; 18:18; 1Ko 5:4

Jisü ngo Thomas

24Thomas, chighikini gholo lakhi, Didymus ipi chekeu ye Jisü ighi kelo panoqo gholo kühae. 25Ikehu akhopemi kütamiqo no pa vilo pi, “Ningu ye Ampeu ithuluvae.” Ikemu pa no pi, “I no pa u lo ayishu zaku ithulu moke kutolo, I uloti pesü ayishu yesüke-a lo süju, eno I u pesü pa jibo buju moke kutolo ni ye khilemu pülümoe.”

26Atsala tache thiu, pa khopemi no itaghi aki sholokuu ngoae, eno Thomas ghi panoqo gholo ae. Ahukikhaqo khapüa keghi Jisü no ighi no panongu gholo puthughove eno pi, “Nongu gholo aloino keu alo.” 27Tishino pa no Thomas vilo pi, “O uloti hile süju eno I u julo; eno o u chhopuwo I jibo bujulo. Lipi kevilo ikemu pülülu lo.” 28Thomas no pa khochile, “I Mpeu eno I Lhou!” 29Jisü no pa vilo pi, “No ye ni ithuluve ake ghenguno pülü ani keshea? Khunono ni ithumla namu pülüni keno akümghapue.”

Kaku Hipau Kimji

30Jisü no pa khopemi nhethe lono akümzapu kümla kütau kutomo shikeu kaku hipau lo yesü püamoe; 31ikemu hipaqo yepüa keu ye nongu pelo Jisü ye Khristo, Alhou Nu, kepi pülülu peniye, eno pülülu keu vecheo Pa je lono aküxü apeniye ke.

Currently Selected:

JOHN 20: SUMRVBSI

Highlight

Copy