JOHN 19

Jisü Yedave penike Tsüve

1Tileno Pilate no Jisü saghi no heqhipe. 2Ghüshimi no asahu pesü akütsükuqho ghoküna no pa qhopipe eno hughaike phi pesü pa puu, 3panongu no pa phivilo ighi no pi, “Jewmi Kükau, axü pushulo!” eno pa gilo ghatsü. 4Pilate no itaghi khalau ideipe timiqo vilo pi, “I no pa sasü khalau ipeghini ke julo, tishianguno I no pa lolo akipimi phumla keu nongu pelo ithi penie.” 5Ikehu Jisü no asahu kütsükuqho qhopu eno hughaike phi pepusü khalau ipeghi. Pilate no panoqo vilo pi, “Timi hipau julo!” 6Kughou achinetomi ngo kijemiqo no pa ithulu keno, panongu no ighamku pi, “Pa yedavelo, pa yedavelo!” Pilate no panoqo vilo pi, “Ni ye pa shou akipimi phumla ke nongu kutoshino pa sawo yedavelo.” 7Jewmi no pa khochile, “Ningu ye Ayezah ani, eno Ayezah tipau kiqilo pa ye thive masae, kughengu pa no pa ampi pesü Alhou nu shiveke.” 8Kughou Pilate no hipa tsa chilu keno, pa ye alau msave. 9Pa no oking lo itaghi ideilo no Jisü vilo pi, “No ye khilano ighi kea?” Ikemu Jisü no kiumu khochilemo. 10Tighenguno Pilate no pa vilo pi, “No ye I pütsamo akeshea? Ni ye o kuqhophe kulupu eno o yedave kulupu küka akeu no ye mtha keshea?” 11Jisü no pa khochile, “kunguu no o tsümoke aye no ye I shou aküka kiumu kühani cheke. Tighenguno khuu no I kügha sawo o tsü keno, pa no alau küqüvae.”

12Tileno Pilate no pa kuqhophe niye pükapütsa. Ikemu Jewmi no igha kithe pi, “Nono timi hipau kuqhopheve aye, no ye Caesar küsau kumoe! Khuu no pa ampi pesü akükau ipi cheni keno pa ye Caesar mjochile ani.” 13Pilate no atsa hipaqo chilu kelo, pa no Jisü sasü khalau ipeghi no Atuqu khache, ipi chekeu, küghakütha lakhü lo iqave, Aramaic tsauno Gabbatha ipi cheni. 14Tipani ye Hechekulu Ghulhu Kukuto tsala shia, eno puchomta shiae. Pa no Jewmi vilo pi, “Nongu Kükau julo!” 15Panongu no ighamku, “Pa sawuve lo, pa sawuve lo, pa yedave lo!” Pilate no panongu vilo pi, “I no nongu Kükau yedaveni keshea?” Achinetomi no pi, “Ningu ye Caesar kumo aye akükau kühae.” 16Tighenguno pa no Jisü yedave penike panongu u lo süvetsü.

Jisü pesü Yedave

(Mt 27:32-44; Mk 15:21-32; Lk 23:26-43)

Tighenguno panongu no Jisü sawuve, 17eno paw kros xapusü ipeve no Aboghe-a ipi chekeu lo wuve, Aramaic tsauno Golgotha ipi cheni. 18Panongu no tilehi pa yedave, eno pa gholo kütami kini, lakhi khino hula-hila shipüzü Jisü no pama dolo qhi. 19Pilate no atsa ghi yepe kros lo qhitsü. Ishi yepüa, “Nazarethmi Jisü, Jewmi Kükau.” 20Jewmi kutomo no hipau philu, kughengu a-a khile Jisü yeda keno ti ye aphughi phivilo, eno Aramaic, Rommi, eno Greekmi kümtsü tsauno yepüake. 21Ikehu Jewmi chinetomi no Pilate vilo pi, “‘Jewmi Kükau’ ipi ye kevilo, ikemu ‘Timi hipau no pi, ni ye Jewmi Kükau ke’ ipi ye tsülo.” 22Pilate no khochile, “I no kiu yeve akeno yevae.”

23Ghüshimi no kros lo Jisü yedave kethiu pa phimini luve no saje bidi shi kije, ghüshimi lakhikhi lo saje lakhi; pa phiküzü ghi luvetsü. Ikemu aphiküzü ye ashe küha eno kunguu no aqhou kutolo ala lakhi likhi no ghokime kehu 24panongu lakhi no lakhi vilo pi, “Ningu hipau ye süxü kije moni, ikemu khuu sala shikepu keno asaqhini.” Hi ye Kuchoyesü lo ishi yepüakeu shikupu niye ke: 　

“Panongu no pano dolono I phimini kije luve, 　　　　

eno I phiküzü ghenguno panongu no asaqhie.”#Lesh 22:18 　

Ikehu ghüshimiqo no hitoi shi, 25ikemu Jisüw kros phivilo paza, paza tsünipu, Clopas nipu Mary, Mary Magdalene ishi puthugho ae. 26Kughou Jisü no paza ngo pa no kimiye chekeu akhopeu tile puthugho akeu ithulu keno, pa no paza vilo pi, “Totimio, hi no o nuke!” 27Pa no akhopeu vilo pi, “Hi no o zake!” Tinguno tilauno akhopeu huno li sasü pa kilo wove.

Jisü Kithi

(Mt 27:45-56; Mk 15:33-41; Lk 23:44-49)

28Thokha kümtsü shikupuvae pi Jisü no ithive kethiu (Kuchoyesü shikupu nike) pa no pi, “Ni ye tüghüthi ani.”#Lesh 69:21 29Tilehi akiqhi ji abohu lakhi chhitoi ae, panongu no aghüshi lakhi pesü akiqhi ji lo pütsü no ayilo süloka lo beno pa kichi lo ditsü. 30Jisü no akiqhi ji mqaluve no pi, “Hi no kishekhavae.” Eno pa kütsü ihoiqive no thive.

Jisü Jibo lo Qhusütsü

31Tipani ye Hechekulu Ghulhu Kukuto tsala kehu, eno Sabbath tsala lo kros lo asükumo qhimoni kehu (kughengu Sabbath tipau ye akighiche tsala shiake), Jewmi no Pilate vilo hupaqo pukhu hechheve tsüno kros lono ikhiqhi luveni penike qhüiniju. 32Ikehu ghüshimi no ighi no Jisü gholo yeda püakeu pama pukhu hechheve tsü. 33Ikemu panongu no Jisü lau ighi kelo, pa ye thive aghikeu ithulu no pa pukhu ye hechhe tsümove. 34Ikemu ghüshimi lakhi no angu pesü Jisü jibo lo qhusütsü kemtsa aji ngo azü qoipeghi. 35Khuu no ti ithulu keno pa no thopi shitsü—paw thopi ye kuchou, eno pa ye kuchou tsa piani kepi pa no ithi ani—tishianguno nongu ghi pülülu peniye ke. 36Hi kümtsü shikeu ye Kuchoyesü shikupu niye ke: “Pa saghi lakhimu kubovemo nani.”#Ipe 12:46; Aki 9:12; Lesh 34:20 37Itaghi Kuchoyesü lakhi lono pi, “Panongu no khuu qhuqhi keno, pa junani.”#Zec 12:10

Jisü Shiqhove

(Mt 27:57-61; Mk 15:42-47; Lk 23:50-56)

38Hipa thiu Arimatheami Joseph no Jisü kumo pewuve nike Pilate qhüiniju, pa ye Jewmi msa kehu küsüuno Jisü khopemi shiche, eno Pilate no pewu penike azah tsüve kehu pa no ighi no pewuve. 39Püzüu putho lono Jisü lau ighikeu Nicodemus ghi tsüngqüikeu ta ngo aloe kitekungo keu gram 320 toike pesü ighi. 40Pama no Jisü kumo pewuve eno Jewmi no shiqho chekeu khuaye lono aphi kümtsha lo vekütsüngü kepu süpüzü Jisü kumo küzüvetsü. 41Khile Jisü yeda keno tile aghutu lakhi ae, eno aghutu lo akumoki kithe lakhi timi khumu qhomphi keu ae. 42Jewmiw Akukuto tsala ghenguno, eno akumoki ghi akupunu lo aghi kehu pama no Jisü tile qhove.

Currently Selected:

JOHN 19: SUMRVBSI

Highlight

Copy