JOHN 21
21
Akhopemi Tsüni lau Ipeghi
1Hipa thiu Jisü no itaghi Tiberias Züghi lono pa khopemi lau ipeghi. Pa no hitoi panongu lau pephe piye. 2Simon Peter, Thomas (Didymus ipi chekeu), Galilee Cana lomi Nathanael, Zebedee nu pama, eno akhopemi kütami kini ishi kümtsa ngoae. 3Simon Peter no panongu vilo pi, “Ni ye akha khawuni cheni.” Panongu no pa vilo pi, “Ningu ghi o gholo wuni.” Panongu no wuno ashuka lo ikuve ikemu tipaji puthotsü panongu ye kiumu khamlae. 4Tsütho ipeche kelo Jisü no amkü lo puthugho aghi, ikemu akhopemi ye Jisü kepi ithimoe. 5Jisü no panoqo vilo pi, “Anuliqo, nongu ye akha anima?” Panongu no “Moe” ipi khochile, 6Pa no panoqo vilo pi, “Ashuka ajeu küdau nongu khame vesülo, tishiaye nongu no hami khalu nani.” Panongu no akhame vesü kelaye akha kütsasa velu kehu akhame sünhephe mlave. 7Ikehu Jisü no kimiye chekeu akhopeu no Peter vilo pi, “Hi ye Ampeue!” Kughou Simon Peter no ti ye Ampeu kepi chilu keno pa no pa kuuphi uluve, kughengu pa ye akümla ghenguno xave no ake, eno azü lo ilhe ilove. 8Akhopemi kütamiqo no akhame lono akha chhitoi sünhesü ashuka lono ighi, kughengu panongu ye amkü lono kushuo lo kumono aunhekipshe 300 tohilo ake.
9Kughou panongu no amkü lo ipeghi keno, amiyi no ami shikeu shou akha pügha püaghi eno asho ishi panongu no ithulu. 10Jisü no panoqo vilo pi, “Nongu no itehi kha süghi akeu hami saghilo.” 11Simon Peter no ashuka lo ilo no akhame amkü lo sünhephe, akha kijeje likhino 153 aghi. Tijeje keghi akhame ye ixüvemoe. 12Jisü no panoqo vilo pi, “Ighi no amzüvekütha chulo.” Akhopemi gholo khunomu pa vilo, “No ye khuu kea?” ipi ighiju moe, kughengu pa ye Ampeu kepi panongu no ithive. 13Jisü no ighi no asho ikhipe panoqo tsü eno titoi akha ghi pesü tsüe. 14Akithi lono xüputhuve kethiu Jisü no akhopemi lau ipeghi keu hi no ghuthu aküthüue.
Jisü ngo Peter
15Panongu no amzü vethave kethiu, Jisü no Simon Peter vilo pi, “John nu Simon, no ye hipaqo kümtsü nguno alau I qhuivü anima?” “Iyei, Ampeu, I no o kimiye keu nono ithi ani,” ipi pa no khochile. Jisü no pa vilo pi, “I mbetiqo lojilo.” 16Pa no ghuthu akiniu Peter vilo pi, “John nu Simon, no ye I qhuivü anima?” “Iyei, Ampeu, I no o kimiye keu nono ithi ani,” ipi pa no khochile. Jisü no pa vilo pi, “I mbeqo tucholo.” 17Jisü no ghuthu aküthüu pa vilo pi. “John nu Simon, no ye I kimiye anima?” Peter ye amlo shimove kughengu Jisü no pa vilo ghuthu aküthüu “No ye I kimiye anima?” ipi ighiju ke. Pa no Jisü vilo pi. “Ampeu, nono thokha ithi ani, eno I no o kimiye akeu nono ithi anie.” Jisü no pa vilo pi, “I mbeqo jukuto lo. 18Kuchou no I no o vilo piani, kughou nono apumi shiche keno, o kutoshino aphimini pepusü khile khilemu nono pulo keu lo wuche, ikemu kughou nono kichimi shiveni keno, nono o u xachho no kütami no aphi o puu nani, eno nono khile pulomo keno tilau o sawu nani.” 19(Pa no hipau pikeu ye Peter ye kiu gholau no Alhou juküvüpu kithi shinani keno pitsüe.) Ti pive kethiu, Jisü no pa vilo pi, “I papelo.”
Jisü ngo Pa Qhuu Akhopeu
20Peter no ighowo Jisü no kimiye chekeu akhopeu no pama pape cheghi keu ithulu, akhopeu huye aghulhu lo Jisü mungupe ngono, “Ampeu, khuu no o thechu niye ani kea?” ipi ighiju keu ke. 21Kughou Peter no pa ithulu keno, pa no Jisü vilo pi, “Ampeu, timi hipau ye kishi nani kea?” 22Jisü no pa khochile, “I no ighi moke kutolo pa pelo aghipe namu no ye kiu pikepu ani kea? No ye I papelo!” 23Ikehu akhopeu hipau ye thini chemoe pikeu tsa no athiküzümi gholo veküpha wove; Jisü ye, pa ye thimo nani kepi pa vilo pimoe, ikemu, “I no ighi moke kutolo pa pelo aghipe namu no ye kiu pikepu ani kea?” ipike.
24Akhopeu hipau no hi kümtsü thopi shiani, eno hi kümtsü yepe qhitsüe, eno pa shepe ye kuchou kepi ningu no ithi ani.
25Jisü no shikeu kütau ghi kutomo aphie. Ti kümtsü yepe qhini kelo, I no kümsüju kelo ayeghiqha kupuju mu ti yekeu kakuqo qhikhamla nani.
Currently Selected:
JOHN 21: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
