JOHN 16

1“I no nongu vilo hi kümtsü piakeu ye nongu pelo küpxape moniye ke. 2Panongu no sinagog lono nongu haphe nani. Mtsüqheino khunono nongu pithiluni keno, pa ye Alhou huthulu ani kepi kümsüni keu tüqhüdo hu cheni. 3Panongu no Apu mu ni mu mtha kehu hipaqo shinani. 4Ikemu I no nongu vilo hipaqo pive ani, tishianguno kughou ado ighini keno, I no nongu vilo pikeu kümsülu peniye ke.”

Aghungu Kimthe Kümlapu

“Ni ye abothu lono nongu vilo hipaqo pimove, kughengu I no nongu gholo ake. 5Ikemu itehi ni ye I puwu keu lau wucheae, ikeghi nongu khunomu I vilo, ‘No ye khila wucheni kea?’ ipi ighiju moe. 6Ikemu I no nongu vilo hipaqo pike ghenguno, nongu ye amlo ghime no chhitoivae. 7Tishinamu I no nongu vilo kuchou tsa pini: nongu kivipu ghenguno I no wuve masae, kughengu I no wumo aye Akukuphuu ye nongu lau ighimo nani. Ikemu I no wuve aye, I no nongu lau pa puwu nani. 8Kughou pa no ighini keno, pa no axine ngo amikucho eno küghaküthapu pesü ayeghilomi kipimi phunani: 9axine tsa loye panongu no I pülümo kehu; 10amikucho tsa loye, ni ye Apu lau wuve chea eno nongu no ni ithulumo akehu; 11küghaküthapu tsa loye, hipa yeghi lo yepeu shou küghathabe nani kehue.

12“Ni ye nongu vilo thime kutomo pikepu aphi, ikemu itehi nongu ye tipaqo ithikuthu khamlae. 13Kughou Kuchou Ghungu ighini keno, pa no kuchou ghili kümtsü lo nongu saphe sawu nani, kughengu pa ye pa kutoshino pimo nani, ikemu pa no kiu chilu keno pi nani eno ighini ye akeqo ghili nongu vilo pi nani. 14Pa no I jepipi tsü nani, kughengu kiu no Iw keno, pa no tipau pesü nongu lau sheshu nani. 15Apu no akeu kümtsü Iw, tighenguno Aghungu no kiu Iw keno tipau pesü nongu vilo pi nani ipi I no pike.”

Amloksa no Alokivi Shive Nani

16“Ado kitila thiu nongu ye ni ithumlave nani, itaghi ado kitila thiuno nongu no ni ithulu nani.” 17Pa khopemi no lakhino lakhi vilo pi, “Pa no ningu vilo ‘Ado kitila thiu nongu ye ni ithumlave nani eno itaghi ado kitila thiuno nongu no ni ithulu nani’ eno ‘Kughengu ni ye Apu lau wucheae’ ipikeu ye kiu kea?” 18Ikehu panongu no ishi pia, “Pa no ‘Ado kitila’ ipi akeu kiqi ye kiu kea? Pa ye kiu piani keno ningu ye mthae.” 19Panongu no Jisü vilo ighiju niye akeu pa no ithi akehu panoqo vilo pa no pi, “‘Ado kitila thiu nongu ye ni ithumlave nani eno itaghi ado kitila thiuno nongu no ni ithulu nani’ ipi I no pikeu kiqi nongu dolo iniju kile ani keshea? 20Kuchou no I no nongu vilo piani, ayeghiqha no alovi akelo nongu ye mloqa nani. Nongu ye amloksa no chhitoi nani, ikemu nongu mloküsa ye alokivipu shive nani. 21Totimi lakhi no anga pununi kelo, li tüqhüdo ye ighive akehu li ye amloksa shicheni, ikemu kughou no anga punuveni keno, anga lakhi ayeghi lo punu sülukeu lokivi lono li ye aghime kümsü mlave cheni. 22Tihutoi nongu ghi itehi ye amloksa shiani, ikemu ni ye itaghi nongu kusholuni aphi, nongu no alokivi shinani, eno khunomu nongu lokivi süwuve tsümla nani. 23Tipa tsala lo nongu ye I vilo kiumu khumo nani. Kuchou no I no nongu vilo piani, nongu no I je lono Apu vilo kiu kiumu khu kelo Pa no nongu tsü nani. 24Itehi kutolo nongu ye I je lono kiumu khumphie. Khulo, eno nongu no ithulu nani, tishianguno nongu lokivi ye chhitoilu nani.

Ni ye Ayeghiqha theqhivae

25“Ni ye thime hipaqo pesü nongu vilo kimghikipiye lono pivae. I no kimghikipiye lono nongu pütsamo no shoboi Apu ghili nongu vilo pikepu tüqhüdo cheni. 26Tipa tsala lo nongu no I je lono khu nani, eno ni ye nongu züqhushi Apu vilo khutsü nike piamoe, 27kughengu Apu ampi no nongu kimiye ani, kughengu nongu no I kimiye eno ni ye Alhou launo ighi kepi pülübe luvae. 28Ni ye Apu launo ighi eno ayeghi lo ighivae; eno itehi ni ye ayeghi qhive no Apu lau wucheae.”

29Pa khopemi no pa vilo pi, “Imapi, no ye itehi ye kimghikipiye lono kumono shoboi pi ayae! 30Itehi ye ningu no ithive ake no ye thokha ithi ani eno khunomu o vilo ighiju akepu vehu kühavae; hi ghenguno no ye Alhou launo ighi kepi ningu no pülü luvae.” 31Jisü no khochile, “Itehi nongu ye pülü luve akema? 32Julo, atüqhüdo cheni, eno mtsüqheino ighivae, nongu kümtsü pütüta kilo apanaghave nani, eno I likhi qhive nani. Ikeghi ni ye I likhive monani, kughengu Apu no I gholo ani. 33I no nongu vilo hipau pikeu ye I lau kimepe akeu lono nongu ye aloino apeniye ke. Ayeghi lo nongu ye aghime kitikhi sholu nani, ikemu amlo mtolo; ni ye ayeghiqha theqhi luvae.”

Currently Selected:

JOHN 16: SUMRVBSI

Highlight

Copy