JOHN 17

Akhopemi ghenguno Inikhu

1Jisü no hipaqo pive kethiu pa gi peqhepe kungugha lo juno pi, “Apu, atüqhüdo ye ighivae, O Nu pelo O juküvüpu shilu penike O Nu juküvüpu shitsülo. 2Kughengu Nono khunoqo pesü pa tsü keno tipaqo lau lhokta küxü tsü peniye timi kümtsü shou no aküka pa tsüvae. 3Lhokta küxü ye hike: panongu no kuchou Lhou O likhi akeu ithi, eno Nono puwukeu Jisü ithikeu noke. 4Nono I pelo mla peniye pichebe keu kümtsü shikhave no I no ayeghi lo O juküvüpu shive tsüae. 5Apuo, ayeghiqha lhophe mphilo I no O gholo akelo ajuküvü achekeu pesü itehi O nhethe lono I juküvüpu shitsülo.

6“Ayeghiqha lono Nono khunoqo ikhiphepe I tsü keno tipaqo lau I no O je pephe piyevae. Panongu ye Ow, Nono panongu pesü I tsü, eno panongu ye O tsa peluvae. 7Itehi panongu ye Nono I tsükeu kümtsü O launo ighie pi ithivae. 8Kughengu Nono atsa I tsükeqo pesü I no panoqo tsüvae, eno panongu ye tipaqo ikhiluve no kuchou no ni ye O launo ighi kepi ithivae; eno Nono I puwu kepi panongu no pülü luvae. 9Ni ye panoqo ghenguno inikhu ani. Ni ye ayeghiqha ghenguno inikhu amoe ikemu Nono I tsüve kemi ghenguno inikhu ani, kughengu panongu ye Ow ake. 10Iw kümtsü Ow, eno Ow kümtsü Iw ke, panoqo vecheo I juküvü shivae. 11Ni ye ayeghi lo ngomae, eno O lau cheae, ikemu panongu ye ayeghi lo aphie. Apu Akimtheu, O je lono Nono I tsükeqo khe tsülo, tishianguno nikujo no lakhi ketoi panongu ghi lakhi shi penie. 12I no panoqo gholo akelo ni ye O je lono Nono I tsükeqo khekuto cheke. I no panoqo süsho che, eno Kuchoyesü shikupu niye kütsakungo nu no kumo aye panoqo gholo lakhimu pühamoe. 13Ikemu itehi ni ye O lau chea, eno ayeghi lo akelo I no hipaqo pikeu ye panongu pelo I lokivi panongu lolo kupulu peniye ke. 14I no O tsa pesü panoqo tsüe, eno ayeghilomi no panoqo mithi, kughengu I no ayeghi laumi kumo ketoi panongu ye ayeghi laumi kumoe. 15Ni ye O vilo ayeghiqha lono panoqo ikhiphe luve tsülo piamoe, ikemu alhoksau launo Nono panoqo khe tsülo piani. 16I no ayeghi laumi kumo ketoi panongu ye ayeghi laumi kumoe. 17Kuchou pesü panoqo qhukimthe tsülo, O tsa ye kuchou ke. 18Nono ayeghiqha lo I puwu ketoi, ni ghi ayeghiqha lo panoqo puwuvae. 19Eno panoqo ghenguno I no ni ampi kishekimthe ani, tishianguno panongu ghi kuchou lono pano qhukimthe peniye ke.

20“Ni ye hipaqo ghengu likhino inikhu anike kumoe, ikemu panongu tsa vecheo I pülüni kemi ghengu ghi inikhu ani, 21tishianguno No, Apu no I lolo eno I no O lolo aketoi panongu kümtsü lakhi shilu peni, eno panongu ghi nikujo gholo apeni, tishianguno Nono I puwu kepi ayeghiqha no pülülu penie. 22Nono ajuküvü I tsükeu I no panoqo tsüvae, tishianguno nikujo no lakhi ketoi panongu ghi lakhi shipeni, 23I no panongu lolo, eno Nono I lolo, tishikeu lono panongu ye kupukülai kubocholu peni, tishianguno ayeghiqha pelo Nono I puwu eno Nono I kimiye ketoi panoqo kimiye cheni kepi ithi penie. 24Apu, ni ye Nono khunoqo I tsü keno panoqo pelo Nono I tsükeu juküvü ithulu peni kehu I no khile ani keno I gholo apenishi ani, kughengu Nono ayeghiqha boqha ghomphi lono I kimiye ke. 25O amikucho Papu, ayeghiqha no O mtha namu I no No ithi ani, eno Nono I puwu kepi hipaqo no ithi ani. 26I no panoqo pelo O je ithive ape eno I no tishi anani, tishianguno Nono I kimiye keu kikimiye no panoqo lolo apeni, eno ni ghi panoqo lolo anani.”

Currently Selected:

JOHN 17: SUMRVBSI

Highlight

Copy