JOHN 15

Ni ye Atsaibo Kuchou

1“Ni ye atsaibo kuchou eno I Pu ye atsailu kichiu ke. 2I loka khijehi axathi pithi moni keno Pa no micheve cheni eno axathi pithikeu loka kümtsü alau pithi penike Pa no kixiphe cheni. 3I no nongu vilo pive keu tsa vecheo nongu ye mithe anie. 4I lau kimepe lo, eno I no nongu lau kimepeni. Aloka lakhi no atsaibo lo kimepe mokelo pa kutoshi ye axathi pithimla ketoi nongu no I lau kimepe moke loye athi pithimlae. 5Ni ye atsaibo; eno nongu no alokaqo ke. Khunono I lau ani eno I no khuno lau ani keno, pa no axathi kutomo pithi cheni, kughengu I sümo keloye nongu ye kiumu shimlae. 6Khunono I lau kimepe moni keno aloka lakhi toi ikhipe peve cheni eno thizümüive cheni; aloka tipaqo ye xukumqope ami lo vesü no pitive cheni. 7Nongu no I gholo kimepe eno I tsa no nongu lolo aye, nongu no kiu pulo keno khulo, eno nongu ghenguno tipau shitsü nani. 8Nongu no axathi kutomo pithi keu lono I khopemi kepi pephe piyekeu no I Pu jekipipu shitsü cheni. 9Apu no I kimiye ketoi, ni ghi nongu kimiye cheni. Iw kikimiye lo kimepe alo. 10I no I Pu zakütsü papelu no Paw kikimiye lo kimepe ache ketoi, nongu no I zakütsü papelu aye Iw kikimiye lo anani. 11I no nongu vilo hipaqo piakeu ye I lokivi nongu lolo apeniye, eno nongu lokivi chhitoilu peniye ke.

12“I zakütsü ye hike, I no nongu kimiye ketoi nongu lakhino lakhi kimiye kilelo. 13Timi lakhi no pa küsami ghenguno aküxü tsüve keu nguno kikimiye akijeu kütau kühae. 14I no kiu azah tsü keno nongu no pape aye, nongu ye I küsami ke. 15Itehi ni ye nongu pesü aqemi ipi moae, kughengu aqemi ye pa mpeu no kiu shicheni keno mthae; ikemu I no nongu pesü aküsami shivae, kughengu I Pu launo chilu keu kümtsü I no nongu vilo pivae. 16Nongu no I kisheluke kumoe, ikemu I no nongu kishelu eno nongu pelo wuno ighive moni keu xathi kutomo pithi peniye süsüe, tishianguno nongu no I je lono Apu vilo kiu kiumu khu aye Pa no nongu tsünani. 17Nongu pelo kimiye kile penike I no azah hipaqo nongu tsü ani.

Ayeghilomi no Mithi

18“Ayeghiqha no nongu mithi aye nongu mithi mphi züuno I paghi mithi kepi ithilo. 19Nongu no ayeghiqha laumi keaye, ayeghiqha no pano laumi toi nongu kimiyeni cheke; ikemu ayeghiqha launo I no nongu kisheluve ke ghenguno ayeghiqha no nongu mithi ani. 20I no nongu vilo pikeu tsa kümsü lulo: ‘Aqemi ye pa mpeu nguno akijeu kumoe.’#13:16; Mt 10:24 Panongu no I pishipuju aye, nongu ghi pishipuju nani. Panongu no I tsa pelu aye, nongu tsa ghi pelu nani. 21Ikemu nongu no I laumi kehu panongu no nongu shou hi kümtsü shinani, kughengu panongu ye khuu I puwu keno Pa mthake. 22I no ighimo no panoqo vilo pimo keaye, panongu ye axine shikeu lo küqü moni cheke, ikemu itehi ye panongu xine ghenguno ajeku kiumu kühavae. 23Khunono I mithi keno, I Pu ghi mithi cheni. 24Khunomu shichemo keu kümla I no panongu gholo shimo keaye panongu ye axine shikeu küküqü kühani cheke, ikemu itehi ye panongu no ithuluve akehu, ni eno I Pu nikujo mithi ani. 25Ikemu panongu Yezah lo yepüakeu tsa ye shikupu masae: ‘Jekujeli kühamu panongu no I mithike.’#Lesh 35:19

26“Ikemu kughou I no Apu launo puwu keu Akukuphuu ighini keno, Kuchou Ghungu, Apu launo ipeghi keu, huno I shepe shitsü nani. 27Eno nongu ghi thopi shitsü nani, kughengu nongu ye abothu lono I gholo acheae.”

Currently Selected:

JOHN 15: SUMRVBSI

Highlight

Copy