JOHN 14

Ni ye Alaghi, Kuchou, eno Aküxü

1“Nongu mlo kütakihi kevilo. Alhou pülülo; Ni ghi pülülo. 2I Pu kilo akungo-a kutomo ani. Tishimo aye Ni ye nongu vilo I no wuno nongu ghenguno a-a kuto tsünie piniche keshea? 3I no wuno nongu sala a-a kutotsü kethiu, I no ideighi no I gholo nongu sawu nani, tishikeu lono I no khile ani keno nongu ghi tile anani. 4Eno I no khila wucheni keno nongu ye tipa laghi ithi ani.” 5Thomas no pa vilo pi, “Ampeu, ningu ye nono khila wucheni keno mthake kishino tipa laghi ithini kea?” 6Jisü no pa vilo pi, “Ni ye alaghi, kuchou eno aküxü ke, I veche moke loye khunomu Apu lau ighimlae. 7Nongu no ni ithi aye I Pu ghi ithi aghini cheke. Hinguno hilauye nongu ye Pa ithivae eno Pa ithuluvae.”

8Philip no pi, “Ampeu, Apu ningu piyelo, tino ni ghenguno lukümkhae.” 9Jisü no pa vilo pi, “Philip, ni ye nongu sasü hitotohi ighive apüzü no ye itehi kutolo ni mtha keshea? Khunono ni ithuluve akeno pa ye Apu ithuluvae. Tishiaye no ye kishino, ‘Apu ningu piyelo’ ipi ani kea? 10Ni ye Apu lolo ani eno Apu no I lolo ani kepi no ye pülü chemo keshea? I no nongu vilo pi akeu tsa ye I gho-apulou lono kumoe ikemu Apu I lolo achekeu no Pa kümla shi anike. 11Ni ye Apu lolo ani eno Apu no I lolo ani kepi I pülülo, tikumo aye akümla hipaqo ghengu likhi nomu pülülo.

12“Kuchou no I no nongu vilo piani, khunono I pülüni keno pa ye I no mlakeu kümlaqo shinani; eno ni ye Apu lau wuchea kehu pa no hinguno akijeu mla nani. 13Nongu no I je lono kiu kiumu khukeu I no shitsü nani, tishikeu lono Anu vecheo Apu jekipipu shinani. 14Nongu no I je lono I vilo kiu kiumu khu aye, I no ti shitsü nani.

Aghungu Kimthe Ighi nani

15“Nongu no I kimiye aye, I zakütsüqo pape nani. 16I no Apu vilo khutsü nani, eno pülhapuju nongu sasü apenike Pa no Akukuphuu nongu tsü nani, 17ti ye Kuchou Ghungu ke. Ayeghilomi ye pa ikhilu mla nani, kughengu panongu ye pa ithulu chemo momu ithi chemoe. Ikemu nongu ye pa ithi ani, kughengu pa ye nongu lolo ani eno nongu sasü anani.

18“Ni ye mighimgha toi nongu qhivemo nani; I no nongu lau ighi nani. 19Ado kitila thiu ayeghilomi ye ni ithumlave nani, ikemu nongu ye ni ithulu nani. I no xü ani kehu nongu ghi xü nani. 20Tipa tsalani I no I Pu lolo akeu, nongu no I lolo akeu eno I no nongu lolo akeu nongu no ithi nani. 21Khunono I zakütsü ikhilu eno peluni keno, pa no I kimiye cheni. Khuu no I kimiye cheni keno I Pu no pa kimiye nani, eno I no pa kimiye no pa lau ni ampi pephepe piye nani.” 22Judas (Iscariot kumo keu) no pa vilo pi, “Ampeu, no ye kishino ayeghilomi lau kumono ningu lau no ampi pephe piyeni kea?” 23Jisü no pa khochile, “Khunono I kimiye keno, pa no I tsa pelu nani eno I Pu no pa kimiye nani, nikujo no pa lau ighi no pa sasü xünani. 24Khunono I kimiye chemo keno, I tsa pelu chemoe. Nongu no atsa chilukeu ye I tsa kumoe, ikemu I Pu I puwu keu tsake.”

25“I no nongu gholo aphi lono hipaqo pivae. 26Ikemu Akukuphuu, Aghungu Kimthe, khuu Apu no I je lono puwu nani keno, pa no thokha nongu shika nani, I no nongu vilo pive keu kümtsü pa no nongu pelo kümsüchilelu penani. 27I no nongu gholo aloino keu qhitsü ani; Iw aloino keu I no nongu tsüani. Ayeghilomi no tsü chekeu toi nongu tsü anike kumoe. Nongu mlo kütakihi kevilo, momu msa kevilo. 28I no nongu vilo, ‘Ni ye wuveni cheni ikemu nongu lau ighi nani,’ ipikeu nongu no chiluvae. Nongu no I kimiye aye, nongu ye alovi nani, kughengu ni ye Apu lau wucheae eno Apu no I nguno akijeu ke. 29Itehi tishi mphi lono I no nongu vilo pive ani, tishianguno kughou ti shikupuni keno nongu pelo pülülu peniye ke. 30Ni ye nongu sasü ado kushuo nongu pütsa moae, kughengu hipa yeghi yepeu cheae. Pa ye I shou aküka kiumu küha, 31ikemu ni ye Apu no azah I tsüke toi shicheni, tishianguno ayeghilomi no ni ye Apu kimiye cheni kepi ithi peniye ke. Ithulo, ningu hileno wuveni.”

Currently Selected:

JOHN 14: SUMRVBSI

Highlight

Copy