JOHN 13

Jisü no Akhopemi Pukhu Qhutsü

1Hechekulu Ghulhu zülo Jisü no hipa yeghi qhive no Apu lau wuveni keu tüqhüdo tove keu ithive kelo, pa no ayeghi lo paw shive keqo kimiye chekehu ashekha kutolo panoqo kimiye. 2Kijiliu ghulhu shi akelo, tüghami no Simon nu Judas Iscariot mlo lo pa thechuni keu süvetsü. 3Apu no thokha Jisü u lo süve tsükeu, eno pa ye Alhou launo ighi no Alhou lau wuveni chenie pikeu pa no ithi akehu, 4pa no ilhu akelono ithuve no pa phi xave, eno küghüsüphi pesü pa po khapuve. 5Tishino pa no chithakhu lo azü lesü no pa khopemi pukhu qhutsü no pa po khapu akeu küghüsüphi pesü panoqo pukhu isütsü. 6Pa no Simon Peter lau ighi kelo, Simon Peter no pa vilo pi, “Ampeu, nono I pukhu qhutsüni keshea?” 7Jisü no khochile, “I no kiu shiani keno itehi no ye mthae, ikemu hithiuno nono ithi nani.” 8Peter no pa vilo pi, “No ye khilemu I pukhu qhumo nani.” Jisü no pa khochile, “I no o pukhu qhutsümo aye, no ye I gholo kuloji amoe.” 9Simon Peter no khochile, “Ampeu, tishiaye I pukhu likhi kumono I u ngo I kütsü ghi qhutsülo!” 10Tile Jisü no pi, “Timi khuu no azükuchhuve akeno pa pukhu likhi kumo aye kütau ye qhoi mithe anike qhu akepu kühae. Eno no ye mithe ani, ikemu nongu kümtsü no mithe anike kumoe.” 11Kughengu khuu no pa thechuni ye akeno pa no ithi akehu, “Nongu kümtsü no mithe anike kumoe” ipike.

12Jisü no akhopemi pukhu qhuve tsüno pa phi uluve eno pa-a lo ngove kethiu panoqo vilo pi, “I no nongu lau kiu shikeno nongu ye ithi anima? 13Nongu no I vilo Shikükau eno Ampeu ipi kucheni, eno ti ye achipi, kughengu ni ye tihuke. 14Imaye ni, nongu Mpeu eno nongu Kükütsüu no nongu pukhu qhutsü aye, nongu ghi lakhino lakhi pukhu qhutsü kepue. 15Kughengu I no kichekipiye nongu tsüve ake I no nongu lau shike toi nongu ghi tishi masae. 16Kuchou no I no nongu vilo piani, aqeu lakhi ye pa mpeu nguno akijeu kumoe; momu aghinimi ye pa puwu akeu nguno akijeu ke kumoe. 17Nongu no hipaqo ithi no papelu aye nongu kümghapue. 18Ni ye nongu kümtsü ghenguno piamoe; I no khuno kisheluve akeno ithi ani. Ikemu hi ye Kuchoyesü shikupu niyeke, ‘Khuu no I sho chu keno, pa no I shou chhophisüe.’#Lesh 41:9 19Hi shimphi lono I no itehi no nongu vilo pive ani, tishianguno kughou tishini keno, ‘Ni ye pa ke’ ipi nongu no pülü nani. 20Kuchou no I no nongu vilo piani, khunono I no puwu keu ikhiluni keno ni ikhilu ani, eno khunono ni ikhiluni keno, I puwu keu ikhilu ani.”

Nongu Lakhi no I thechuve nani

(Mt 26:20-25; Mk 14:17-21; Lk 22:21-23)

21Jisü no hi pive kethiu, pa mlo kütakihive no thopi shi, “Kuchou no I no nongu vilo piani, nongu gholo milakhi no I thechuve nani.” 22Pa no khuu vehu pi akeno akhopemi ye mtsümishei mono lakhino lakhi jukile ae. 23Pa khopemi gholo lakhi, khuu Jisü no kimiyeche keno pa ye Jisü phivilo iqa ae, 24ikehu Simon Peter no au kulope khuu piani keno Jisü vilo inijulo pi, 25Jisü mungupe akeu akhopeu huno Jisü vilo iniju, “Ampeu, ti ye khuu kea?” 26Jisü no khochile, “I no asho hipau pütsüve kethiu, khuu tsüni keno timi tipau ke.” Pa no asho pütsüve kethiu Simon nu Judas Iscariot tsüe. 27Kughou pa no asho ikhilu keno, Satan no pa lolo ilove. Jisü no pa vilo pi. “Nono kiu shiniye ani keno, mtazü shilulo.” 28Jisü ye kushiye hipa tsa pa vilo pi keno tile akeqo khumu mthae. 29Judas no pisabo puche kehu Jisü ye pa vilo “Aghulhu ghenguno ningu no kiu avehupu shiani keno qhüvelo,” momu kiu kiumu pesü kumlhomi tsü masae, ipi ani küghashi khami ye kümsüve. 30Ikehu asho ikhiluve kemtsa, Judas ye khalau ipeve. Ti ye putho shiae.

Ayezah Kithe

31Pa no ipeve kethiu, Jisü no pi, “Itehi ye Timi Nu jekipipu shivae, eno pa vecheo Alhou jekipipu shi ani. 32Pa vecheo Alhou jekipipu shiaghi aye, Alhou ghi Pa ampi pesü pa lau no ajekipipu shinani, eno paikhavi no pa jepipi tsü nani. 33Anuliqo, Ni ye nongu gholo ngoni keu ado kitila likhivae. Nongu no I phunani, I no Jewmi vilo pike toi itehi ye nongu vilo ghi piani, ‘I no khila wucheni keno nongu ye ighimlae.’ 34Azakütsü kithe lakhi I no nongu tsü ani: nongu lakhino lakhi kimiye kilelo; I no nongu kimiye ketoi nongu ghi lakhino lakhi kimiyelo. 35Nongu lakhino lakhi kimiye kile aye, hipau lono nongu ye I khopemi kepi timi kümtsü no ithi nani.”

Jisü Miliveni keu Azünatha Pi

(Mt 26:13-35; Mk 14:27-31; Lk 22:13-34)

36Simon Peter no pa vilo pi, “Ampeu, no ye khila wucheni kea?” Jisü no khochile, “I no khila wucheni keno itehi no ye I pape mlae, ikemu hithiuno nono I pape nani.” 37Peter no pa vilo pi, “Ampeu, kushiye ni ye itehi no o pape mlani kea? I no o ghenguno I küxü pephe tsüve nani.” 38Jisü no khochile, “No ye kuchou no I ghenguno o küxü tsülu nani keshea? Kuchou no I no o vilo piani, awudu igha mphi lono no ye ghuthu küthü I milive nani.”

Currently Selected:

JOHN 13: SUMRVBSI

Highlight

Copy