JOHN 12

Bethany lo Thazü pe Jisü Nu

(Mt 26:6-13; Mk 14:3-9)

1Hechekulu Ghulhu züu atsala tsügho akelo, Jisü ye Bethany lo pa no xüputhu keu Lazarus kilo ighi. 2Ikehu panongu no pa ghenguno alibe kutotsü, Lazarus no Jisü gholo ngono Martha no panongu lamlu ae. 3Tile Mary no nard sübo lono mlakeu amekusho xokütsüngü thazü peighi no Jisü pukhu nutsü eno li sa pesü pa pukhu isüvetsü. Thazü xokütsüngü no aki kuchopu vechighive. 4Ikemu pa khopemi gholo lakhi, Judas Iscariot (Jisü thechuni ye akeu), no pi, 5“Kushiye thazü hipau atsala 300 jume#12:5 Aqekiqemi ye atsala lo Denarius lakhi qeche. qhemi lono jeve no kumlhomi tsüvemo kea?” 6Pa ye kumlhomi ghenguno alomsü kehu hi pike kumoe, ikemu pa ye küpkami, aqow pisabo puche eno tilehi sükeu pesü pa vehu shiche ke. 7Ikemu Jisü no pi, “Li pünaqhi kevilo, I kumo kuqho tsala ghenguno li pelo amlo lo qhilu pelo. 8Kughengu kumlhomi ye alhokuthu nongu gholo anani, ikemu ni ye alhokuthu nongu gholo ani chemoe.”

Lazarus Pithive nike Kuchughu

9Kughou Jewmi aqokitikhi no Jisü ye tile anie pi ithive keno, panongu no Jisü ghengu likhino kumono pa no akithi lono xüputhuve keu Lazarus ghi juniye tilau ighi. 10Ikehu achinetomi no Lazarus ghi pithiveni ke kuchughu, 11kughengu pa ghenguno Jewmi kutomo no wuno Jisü shou pülüuve ke.

Tokulu Hukülü shi Ilo

(Mt 21:1-11; Mk 11:1-11; Lk 19:28-40)

12Tishiwo thoghiu Hechekulu Ghulhu lo süniye aqokitikhi ighi akeqo no Jisü ye Jerusalem lo chenie pi chiluve. 13Ikehu panongu no amsabo loka pesü pa kushoni ye wuno ighamku pi, “Hosanna! Khuu no Ampeu je lono cheni keno Alhou no pa kümgha tsülo, Israel Kükau kümgha tsülo!” 14Ishi yepüake toi Jisü no khurha lakhi ithulu no tipau shou iqave,

15“Msa kevilo, Zion limiqo;

julo, o kükau ye cheae,

khurha ti shou iqa no chenie.”

16Pa khopemi ye atüghü lo hipaqo vethamla no ae, ikemu kughou Jisü pesü ajuküvüpu lo xüputhuve keno, tileno panongu no hipaqo ye pa ghenguno yepüani eno pa shou mla püani kepi kümsüchilelue. 17Pa no akumoki lono Lazarus kuphe eno akithi lono pa xüputhu akelo pa gholo aqokitikhi akeqo no tamono thopi shiae. 18Aqokitikhi no pa sasü kushoni ye wukeu ye Jisü no amchipu kümla hipau shikeu panongu no chiluke ghenguno ke. 19Ikehu Phariseemi no lakhino lakhi vilo pi, “Julo, nongu ye kiumu shimlavae. Ayeghiqha no pa pape wuvae.”

Greekmi no Jisü Phuighi

20Aghulhu lo Alhou mllani ye iqho kemi gholo Greekmi khami ae. 21Ikehu panongu no Galilee lo Bethsaida phu lono ighikeu Philip lau ighi no qhüiniju, “Akijeu, ningu ye Jisü junishi ani.” 22Philip no wuno Andrew vilo pi eno pama no wu püzü Jisü vilo pi. 23Jisü no khochile, “Timi Nu jekipipu shikepu do ighivae. 24Kuchou no I no nongu vilo piani, athi no ayeghi lo ikiqi ilo no thivemo keloye tilikhi acheni; ikemu tino thive aye athi kutomo pithi cheni. 25Khunono pa küxü küpüni keno pühave cheni, khunono hipa yeghi lo pa küxü küpü moni keno lhokta küxü ghenguno pekütsü tsünani. 26Khuu no I qeni keno pa ye I pape masae; I no khile ani keno I qemi ghi tile anani. Khuu no I qeni keno I pu no pa gihu nani.”

Timi Nu pesü Süqhe Masae!

27“Itehi I ngulho no kütakihi auvae. Ni ye kiu pini kea? ‘Apu, hipa tüqhüdo lono I xalulo’ ipini keo? Ikemu hipau kimji ghenguno ni ye aghime tüqhüdo hipau lo ighivae. 28Apu, O jekipipu shilo.” Tileno kungugha lono asütsa ighi, “Ni ye ajekipipu shivae eno itaghi ajekipipu shi nani.” 29Aqokitikhi tile puthugho akeqo no chilu püzü ti ye tsütsüsü anie pi. Kütami no pikeu no kungumi no pa pütsa anie pi. 30Jisü no khochile, “Asütsa hi ye nongu sala kethono I sala kumoe. 31Itehi ye hipa yeghiqha shou küghakütha ghulokiae, itehi ye hipa yeghiqha yepeu haphe kepu ghulokiae. 32Kughou ayeghi lono ni ikhiqhe luveni keno, I no timi kümtsü I lau sünhe luve nani.” 33Pa ye kiu kithi ghola lono thiniye akeno ti piyeni ye hi pike. 34Ikehu aqokitikhi no pa khochile, “Ningu no Ayezah lono chiluke Khristo ye alholo ache nani ipie. Tishiaye no ye kishino Timi Nu ye ikhiqhe luve masae piani kea? Timi Nu huye khuu kea?” 35Tile Jisü no panoqo vilo pi, “Aküvü ye ado hami likhi nongu sasü aniae. Aküvü aphi lono chelulo, tikumo aye aküzü no nongu züthave nosae. Khunono aküzü lo checheni keno pa ye khila wucheni keno mthae. 36Nongu no aküvü aphi lono aküvü shou pülübelo, tishianguno nongu ye aküvü nuliqo shilu nani.”

Timiqo Küpülükumo

Jisü no hipaqo pive no wuve eno panoqo launo itshüve. 37Panoqo zülo pa no amchipu kümla kutomo shikeghi panongu no pa pülümoe, 38ti ye Isaiah tungkupu no pikeu shikupu niyeke:

“Ampeu, khuu no ni tsa pülü,

eno khuno lau Ampeu küka pephe piye kea?”#Isa 53:1

39Tighenguno panongu ye pülülu mlae, kughengu Isaiah no hi ghi pivae,

40“Pa no panoqo nhethi kighicheve tsü

eno pano mlo shikümkave tsü,

tikumo ye pano nhethi no ithulu,

pano mlo no vethalu no xaide

kelo I no pano shipivilu nosae.”#Isa 6:10

41Isaiah no hipaqo pikeu ye pa no Jisü jekipipu ithulu eno pa ghili pike. 42Tishimu kutomo no eno yepemi gholo ghi pa pülübe luve, ikemu Phariseemi msa kehu panongu ye piphemoe, tishianguno panoqo pesü sinagog lono haphe pemo niye ke; 43kughengu panongu ye Alhou launo ighikeu jekipi ye timi launo ighikeu jekipiu kimiye kütüke.

Jisü ye Ayeghiqha Xalu nike Ighi

44Jisü no ighamku pi, “Khunono I pülü ani keno, I pülü anike kumoe ikemu I puwu keu pülü ani. 45Khukhumu ni ithulu keu ye I puwu keu ithulu ani. 46Ni ye aküvü shi ayeghi lo ighi, tishianguno khunono I pülüni keno aküzü lo ngomo nani. 47Khunono I tsa chilu no pemlani keno, ni ye pa shou küghathabe monani; kughengu ni ye ayeghi lomi shou küghathabeni ke ighike kumoe ikemu ayeghi lomi xaluni ke ighie. 48I milive no I tsa ikhilumo keqo ghengu ye küghaküthau lakhi ani; I no pive keu tsa no ashekha tsala lo pa shou küghathabe nani. 49Kughengu ni ye I kükagha lono pi püamoe, ikemu Apu I puwu keu no I no pikepu momu pimo kepu za I tsüpüani. 50I no ithi akeu no Pa no azah tsükeu ye lhokta küxü ke. Tighenguno I no kiu pi keno, ti ye Apu no I vilo pikeu ke.”

Currently Selected:

JOHN 12: SUMRVBSI

Highlight

Copy