HOSEA 6
6
Israel ngo Judah no Xaidemoe
1“Ighilo, ningu Ampeu lau idewoni;
Pa no ningu ghüzave kehu Pa no shipivi tsü penie;
Pa no ni hekuluqhi ke ningu zaku khavetsü nani.
2Atsala kini thiu Pa no ningu püxü kithetsü nani;
atsala aküthüu lono Pa no ningu sünheqhe nani,
tishianguno nino Pa zülo xüni.
3Ningu pükapütsa no Ampeu ithini nolo;
Pa ipeghini keu ye tsüküvü toi mtsüqhei ke;
tsülü tusho tsütsüghu no ayeghi vapütsü keshi Pa no
tsütsüghu toi ni lau ighi nani.”
4Ni ye o pesü kiu shiveni kea, O Ephraim?
Ni ye o pesü kiu shiveni kea, O Judah?
Nonguw kikimiye ye inaqhe kimhi toi,
itheno hauve keu tsüzü toike.
5Tighenguno I no tungkupmi vecheo panoqo michevae;
I kichi lo tsa pesü I no panoqo ghiqhivae,
eno Iw küghakütha ye aküvü toi ipeghi nani.
6Ni ye aghakishi kumono iqemokeu kikimiye lunishi,
akipti kümllagho kumono Alhou ithitoi keu laju ani.
7Ikemu Adam toi panongu no puloshoqhi hebideve;
tilau panoqo ye I pükhü mlave.
8Gilead ye küsaküghami phughi,
anepa kümtsü aji pusüsü ani.
9Küpkami no ala khe akeshi,
achinemi ghi hekütsü kumqope acheni;
panongu no Shechem laghi lono timi ghiqhi cheni;
panongu no kixikila shi cheni.
10Israel lagha lo aküighüpu lakhi I no ithulu püani;
Ephraim salha ye tile ani; Israel ye kitiqevae.
11Kughengu, O Judah, o ghengu ghi ghile do ye kutovae.
Ti ye I no Iw timiqo küakini tsüchileni keu doke.
Currently Selected:
HOSEA 6: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
