HOSEA 7
7
1Kughou I no Israel shipivini keno,
Ephraim xine ngo Samaria
kümla lhoksa pephe nani;
kughengu panoqo no pishikiqhi kilhisho shi
küpkami no hepho ilo,
eno khalau no süxa ishike.
2Ikemu pano lhoksa kümtsü
I no kümsülu ani kepi panongu ye kiqiju moe.
Itehi ye pano kümla no panongu
süho luvae eno ti ye I zülo ani.
3Panongu no pano küsakügha pesü akükau lopivi tsü,
eno panow thekuchu pesü kükapumi lopivi tsüe.
4Panongu kümtsü ashupumi;
panoqo ye amiphoki külü toi,
ti ye ashokishiu no asho kunupe
ingu ipeghi moke kutolo ami
chixemo no lüghüi qhike toie.
5Ni kükau tsala lo sakiphemiqo
ye aji shomzü keu no süuve;
Pa no thoküghami gholono pa u xachho tsüke.
6Kughengu amiphoki külü mlo toi panoqo no küsüqe ighi;
puthotsü pano mlokighide no kuchughei ngoa no
inaqhe no ami mili toi iqüe.
7Panongu kümtsü no amiphoki külü toike,
eno panongu no panow yepemi kütsave cheni.
Panow kükami kümtsü ikiqivae,
ikemu khunomu I ku ighimoe.
8Ephraim no ashiayeqo sasü xukütshü kungo cheni;
pa ye asho pügha kuthumo keue.
9Inaghami no pa kumto qhasü
luvae ikemu pa ye ti ithi amoe;
asa kümpa pa shou ikughi khavae,
ikeghi pa ye tiumu ithi amoe.
10Israel qheküza no pano zülo ashepe shitsü akeghi
panongu ye Ampeu pano Lhou lau ideighi moe,
tike kumono Pa phumove ke.
11Ephraim ye miqhedu toi,
mbomzü eno tsükhüi moe,
Egypt ku püzü Assyria lo pove.
12Panoqo no wuche kelono I khame pano shou vepukuni;
kungu ghauqo toi I no panongu saiqighive nani;
panongu no hekütsüpe akelono I no pano shikümzü nani.
13Panongu hasapue, kughengu pano ye I launo kauvae!
Panongu kütsave nani, kughengu panongu no I hebidevae!
Ni ye panongu xachile lunishi anamu panongu no
I shou akimki tsa pichenie.
14Panongu ye amlo tsüqhiyi I lau ighamku chemo
ikemu pano lüpa lono igha cheni;
athi eno aji ghenguno pano ampi ghüza cheni;
panongu no I hebide chenie.
15I no panongu qophe eno pano u shikumtotsü keghi
I shou alhoksa kuchughu ke.
16Panongu no ideighi, ikemu kunguu#7:16 Momu Shishe Akiqheu lau küdau kumoe;
panoqo ye thekuchu süzü toie;
panow kükapumiqo no timi kiphikumo mili xapu kehu
azütakikihi lono ikiqive nani.
Hipau ghenguno Egypt yeghi lo panongu cheqhi nani.
Currently Selected:
HOSEA 7: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
