BOTHUBO 29

Jacob no Leah ngo Rachel sasü Külave

1Tithiu Jacob no pa ghüzüla lo wuve no kipelaumi yeghi lo ighi. 2Pa no jupuwo kelo, aluza lo azükikhe lakhi ithulu, eno julo, ambe loji küthü tipa phivilo aghi, kughengu tipau zükikhe lono ambe lojiqo ye azü piye cheke. Azükikhe kichi lo atu akeu huye kije, 3eno kughou ambe loji sawo tile hekütsü luveni keno, ambekhemi no azükikhe kichi lono atu tukulove no ambeqo azü tsüche, eno atu tukulo sawo azükikhe kichi nhape qhiveche.

4Jacob no panoqo vilo pi, “I thiküzümiqo, nongu ye khilano ighi kea?” Panongu no pi, “Ningu ye Haran lono ighie.” 5Pa no panoqo vilo pi, “Nongu ye Nahor nu Laban ithi anima?” Panongu no pi, “Ningu ye pa ithi anie.” 6Pa no panoqo vilo pi, “Pa ye akivi shi anima?” Panongu no pi, “Akivi shi ani; eno julo, pa nonga Rachel ye ambe sasü chenie!” 7Pa no pi, “Julo, atsala mta shi aphi; lhoxü lojiqo hekütsü kepu do shimphie. Ambeqo azü tsüve no wulo, tipaqo pelo achu mza aghi pelo.” 8Ikemu panongu no pi, “Lhoxü loji kümtsü hekütsü kümtsa no azükikhe kichi lono atu tukulove paghi moke loye ningu ye tishi mlae; tithiuno ningu no ambeqo azü tsünie.”

9Pa no panoqo pütsa aphi lono, Rachel no papu mbeqo sasü ighi, kughengu li ye ambekhelimi lakhi ke. 10Jacob no pa za peu Laban nonga Rachel eno pa za peu Laban mbe ithulu kemtsa, pa no kupunu ighi no azükikhe kichi lono atu tukulove tsüno pa za peu Labanw lhoxü lojiqo azü piyeve. 11Tishino Jacob no Rachel müma no igha qauve. 12Eno Jacob no Rachel vilo pa ye papu no bolomi, eno pa ye Rebekah nuke ipi, eno li no posü wuno papu vilo pive.

13Laban no pa tikishiu Jacob sütsa chilu khavi pa sasü kusho niye posü wuno pa valuve no müma eno pa kilo pa saighi. Jacob no Laban vilo thokha kümtsü pive, 14eno Laban no pa vilo pi, “Mtsüqheino no ye I ghi eno I shi!” Eno Jacob no pa gholo aqhi lakhi ngove.

15Tithiu Laban no Jacob vilo pi, “No ye ni sholokumi kehu kümsano I qeni keshea? I vilo pilo, o jume ye kiu qhemi shi nani kea?” 16Laban ye anga kini ache. Akichiu je no Leah eno ayitiu je no Rachel. 17Leah nhethi ye juvi, ikemu Rachel no aju akoghe eno ahi vike. 18Jacob no Rachel kimiyeve. Eno pa no pi, “I no o nga ayitiu Rachel ghenguno ampe tsüni o qeni.” 19Laban no pi, “I no li pesü timi kütami tsüveni keu ye o tsüve keu no akiviue; I gholo ngovelo.” 20Ikehu Jacob no Rachel ghenguno ampe tsüni qeve, ikemu pa no li kimiye akeu ghenguno ampe tsüni ye pa ghenguno atsala aghulo toive.

21Tithiu Jacob no Laban vilo pi, “I nipu I tsüvelo, tishino I pelo li lau wulu pelo, kughengu I do ye tovae.” 22Ikehu Laban no tile timi kümtsü hekütsü kumqo no aghulhu lakhi tsü. 23Ikemu avelau ye pa no pa nonga Leah sawo Jacob tsüve, eno pa no li lau wuve. 24(Laban no pa qelimi Zilpah sawo Leah qeliu shi penike tsüve.) 25Julo, thanau totimi huye Leah shi aghive! Eno Jacob no Laban vilo pi, “No ye hi ye kiu I lau shive akea? Rachel ghenguno ni ye o qeke kumo keshea? Tishi aye kushiye no ye I pishiqhive akea?” 26Laban no pi, “Anoghiu züuno ayitiu tsüni keu ye ni ghakhu lo tishi chemoe. 27Hipa pinedo puwovelo, eno itaghi nono ampe tsüni I qeve aye, nino ayitiu ghi o tsüveni.” 28Jacob no tishive eno Leah pinedo kupuve tsü. Tithiu Laban no pa nonga Rachel pa nipu shi penike tsüve. 29(Laban no pa qelimi Bilhah sawo Rachel qeliu shi penike tsüve.) 30Ikehu Jacob no Rachel lau ghi wuve, eno pa no Leah nguno alau Rachel kimiyeve, eno itaghi ampe tsüni Laban qe kitheve.

Jacob Nuliqo

31Kughou Leah lau kikimiye mikheve keu Ampeu no ithulu keno, Pa no li tita khaqhive tsü, ikemu Rachel ye anuhami shive. 32Leah no mishipuve no anu lakhi punu, eno li no pa je Reuben kutsü, li no pi, “Kughengu Ampeu no I ghime shou jupuku tsüe; kughengu itehi I kimi ye I kimiye niae.” 33Li no itaghi mishipuve no anu lakhi punu, eno li no pi, “Kughengu I lau kikimiye mikheve keu Ampeu no chilu tsüno anu hi ghi I tsüe.” Eno li no pa je Simeon kutsüe. 34Itaghi li no mishipuve no anu lakhi punu, eno pi, “Itehi I kimi ye I ju aloniae, kughengu I no pa lau anu küthü punuve tsüae.” Tighenguno pa je Levi kuvetsü. 35Tithiu itaghi li no mishipuve no anu lakhi punu, eno pi, “Ishi ye I no Ampeu sheqheni.” Tighenguno li no pa je Judah kuvetsü. Tithiu li ye atianuli punu move.

Currently Selected:

BOTHUBO 29: SUMRVBSI

Highlight

Copy