BOTHUBO 28

Laban lau Jacob Puwuve

1Tithiu Isaac no Jacob kuno pa kümghatsü eno pa kichepiye tsü, “No ye anipu shinike Canaanmi totimi lu kevilo. 2Ithu no Paddan-aram lo o za papu Bethuel kilo wulo, eno o za peu Laban nonga dolo lakhi o nipu shinike luvelo. 3Akughushu Lhou no o kümghatsü peni eno o pelo athi pithilu eno kughukolu peniu, tishianguno no ye lighimi timi shilu peni. 4Pa pelo Abraham kükümgha pesü no eno o gholo o tikughukomi tsü peniu, tishino nono inami shi chekeu yeghi khikhi Alhou no Abraham tsü keno, tino o mheghi shilu peniu!” 5Ikehu Isaac no Jacob puwuve. Eno pa ye Paddan-aram lo Jacob ngo Esau pama paza Rebekah peu, Arameami Bethuel nu Laban lau wuve.

Esau no Ishmaelmi sasü Külave

6Isaac no Jacob kümghatsü no pa pelo Paddan-aram lono anipu lusaghi peniye tilau puwuve keu, eno pa no kümghatsü akelo Jacob vilo, “No ye anipu Canaanmi totimi lu kevilo,” ipi akeu Esau no ithive, 7eno Jacob ye pa puaza ghokulu shi Paddan-aram lo wuvae pi ithive. 8Ikehu kughou Esau no Canaanmi totimi ye pa pu Isaac lopiqi mlave pi ithi keno, 9Esau no Ishmael lau wuno pa nipu kütau akeqo nguno alau itaghi Abraham nu Ishmael nonga Mahalath, Nebaioth chepu pesü pa nipu shiniye luve.

Jacob Samo

10Jacob no Beersheba qhive no Haran küdau wuve. 11Pa no a-a lakhi lo ighi no tile tsüküzü do puwoa, kughengu khetsünhe ye ilove ke. Tipa-a lo atu lakhi ikhilu no pa no tipau pesü pa kütsü mükhü luve eno tile züniye ikiqi ihozüve. 12Ikelo pa no asamo pumo, julo, tile akala lakhi ayeghi lo ghope püaghi, eno tipau kütsüqa ye atsütsü kutolo toae. Eno julo, Alhouw kungumi no tipau lo mili ikuiqi aghi! 13Eno julo, Ampeu no tipau shou aghi no pi, “Ni ye Ampeu, o pu Abraham Lhou eno Isaac Lhou ke. Nono ayeghi khile ngo ani keno I no no eno o tikughukomi tsüni. 14O tikughuko no ayeghi lo ayeghimkhu jehi nani, eno no ye aghacheu kulolau ngo kipelau, eno ahuu ngo apeu qhawo nani, no eno o tikughuko vecheo ayeghi lo akibolomi kümtsü müghalu nani. 15Julo, I no o gholo ani eno nono khile khile wunamu I no o süsho nani, eno ayeghi hipau lo o sachile ighi nani. Kughengu I no o lau ashoqhi kiu shi keno tipau shive moke kutolo Ni ye o qhivemo nani.” 16Tileno Jacob no züida ithughi no pi, “Mtsüqheino Ampeu ye hipa-a lo animu ni ye ithi mono ae.” 17Eno pa ye msave no pi, “Hipa-a ye kiu toi qheghüi kelae! Hi ye kütau kumono Alhou ki, eno atsütsü khaghoe.”

18Ikehu Jacob no inaqhe itheno pa kütsü qholo atu mükhü akeu ikhiluve no tipau pesü atsükucho lakhi shi ghope qhive eno tipau shou thazü lepuku. 19Pa no tipa-a je pesü Bethel#28:19 Bethel kiqi ye Alhou ki kuvetsü, ikemu atüghü loye mishighüna tipau je Luz ipiche. 20Tishino Jacob no ashoqhi shino pi, “Tsala Alhou no I gholo aye eno I no wu chekeu laghi hipau lo I süsho, eno achuqupu ngo aphimini pepu kepu I tsü aye, 21tishianguno I pelo I pu kilo aloino ideighi lupe aye, Ampeu pesü I Lhou shini, 22eno atu hipau, khikhi I no atsükucho lakhi shi gho püani keno, ti ye Alhou ki shini. Eno Nono kiu I tsüni keno tipaqo kümtsü lo I no chighi saje O tsünie.”

Currently Selected:

BOTHUBO 28: SUMRVBSI

Highlight

Copy