BOTHUBO 27

Isaac no Jacob Kümghatsü

1Isaac no kitemi shive kethiu pa nhethi zamemeive kehu pa ye ithumlauve, pa no pa nu akichiu Esau kuno pa vilo pi, “I nu,”; eno pa no khochile, “Ni hile ani.” 2Pa no pi, “Julo, ni ye kitemi shivae; ni ye I kithi tsala mthae. 3Tighenguno itehi, o ghünanu ikhilulo, o leghubo eno ow shexilika ikhilulo, eno aluza lo I ghenguno ashi hawulo, 4eno I ghenguno achuqupu kivi, I no kimiye cheke toi kutope I no chukepu shi I lau süghilo, tishianguno I no thimphi lono I ngulho no o kümgha tsüni.”

5Kughou Isaac no pa nu Esau pütsa akeno Rebekah ye iniae. Ikehu kughou Esau no aluza lo ashi süghini ye hawuve keno, 6Rebekah no li nu Jacob vilo pi, “O pu no o mu Esau pütsa aghikeu I no chilue, 7‘I ghenguno ashi hasüghi no achuqupu kivi I sala kutolo, tishi aye I no tipau chuni eno I no thimphi lono Ampeu zülono o kümgha tsünie.’ 8Tighenguno I nu, itehi I no azah tsü aketoi I tsa lulo. 9Lhoxü loji lo wuno ane lhothe akivi kini I lau süghilo, tishiaye I no tipaqo pesü achuqupu kivi, o pu no kimiye cheke toi, pa ghenguno kuto tsüni. 10Eno no ye tipau pesü o pu pelo chu penike pewulo, tishiaye pa no thimphi lono o kümghatsü nani.” 11Ikemu Jacob no paza Rebekah vilo pi, “Julo, I mu ye amhi ghoghoi kemi, ikemu ni ye müdüniyi kemie. 12I pu no I kunhuju no ithive luvi, eno ni ye pa thaigha ake toive nani, eno kükümgha lakhi kumono angusü I shou ikughive nanie.” 13Pa za no pa vilo pi, “I nu, o ngusü ye I shou ikughive peni; I tsa likhi lulo, wuno tipaqo I lau süghilo.”

14Ikehu pa no wuno tipaqo ikhiluve, eno pa za lau süghi, eno pa pu no kimiye cheke toi, pa za no achuqupu kivi kuto tsü. 15Tishino Rebekah no li nu akichiu, Esau phimini akiviu khikhi li kilo akeno tipaqo ikhipe li nu ayitiu pipeve. 16Eno ane lhotheqo yiko pesü li no pa u eno pa kuo müdüniyi akeu lo süvetsü. 17Eno achuqupu kivi ngo asho, khikhi li no kuto keno, tipaqo li no ikhipe Jacob u lo sütsü.

18Ikehu pa no pa pu lau ilo no pi, “I pu.” Eno pa no pi, “Ni hile ani. No ye khuu kea, I nu?” 19Jacob no pa pu vilo pi, “Ni ye Esau, o nu anoghiu ke. Nono I vilo pi ketoi, I no ashi süghi anie; ithu iqa no I no ashi halu keu chulo, tishino o ngulho no I kümgha tsü penie.” 20Ikemu Isaac no pa nu vilo pi, “I nu, kishino no ye paikhavi no ti ithuluve kea?” Pa no khochile, “Kughengu Ampeu o Lhou no tokulu I tsüke.” 21Tithiu Isaac no Jacob vilo pi, “Kimiyeno I kupunu ighilo, tishino no ye kuchou no I nu Esau kemo keno I no o kunhuju no ithinie I nu.” 22Ikehu Jacob no pa pu Isaac kupunu wu, Isaac no pa kunhuju eno ithive no pi, “Asütsa ye Jacob sütsa, ikemu au ye Esau u kena.” 23Eno pa ye pa michilu move, kughengu pa u ye pa mu Esau u toi ighono amhi ghoghoi bulue. Ikehu pa no pa kümghatsü. 24Pa no pi, “No ye kuchou no I nu Esau keshea?” Pa no khochile, “Iyei.” 25Tileno pa no pi, “I nu no ashi hasüghi keu chuno o kümgha tsünike ti I phivilo süghilo.” Ikehu pa no tipau pa lau süghi, eno pa no chuve; pa no atsaizü peighi tsü, eno pa no ti shove.

26Tileno pa pu Isaac no pa vilo pi, “I kupunu ighi no I mümalo, I nu.” 27Ikehu pa no kupunu ighi no pa mümae. Isaac no pa phimini xo tsüngülu no pa kümghatsü ghi pi,

“Julo, I nu xo ye Ampeu no

kümgha tsükeu luza xo toike!

28Alhou no atsütsü lo tsüzü eno

ayeghi lo ghüma kivi, eno athi

ngo atsaizü pofushi o tsü peni.

29Ashiayeqo no o qe peni eno

shiyeqo no o zülo itsaqi peni.

O thiküzümi shou ampeu shilulo,

eno o za nuliqo pelo o zülo pishiqho peni.

Khukhumu o müsüini keu ye müsüinive peniu,

khukhumu o kümgha tsükeu ye müghalu peniu!”

30Isaac no Jacob kümghave tsü kemtsa, Jacob no pa pu Isaac zülono khalau ipelu mphi lono, pa mu Esau ye ashi hawu no ighi. 31Pa ghi achuqupu kivi kutope pa pu lau peighi. Eno pa no pa pu vilo pi, “I pu, ithughi no o nu no ashi hasüghi keu chulo, tishino I kümgha tsülo.” 32Pa pu Isaac no pa vilo pi, “No ye khuu kea?” Pa no khochile, “Ni ye o nu anoghiu, Esau ke.” 33Tileno Isaac ye ighono thüthüshi ithauve no pi, “Imaye ashi hasüghi no I lau peighi püzü no ighikumo zülono I no chuve no pa kümghave tsükeu huye khuu kea? Iyei, pa ye mügha nanie.” 34Esau no pa pu tsa chilu khavi, pa ye shishe kukhukimji shi igha qauve eno pa pu vilo pi, “I kümgha tsülo, ni ghi I kümgha tsülo, O I pu!” 35Ikemu pa no pi, “O thiküzüu no amqüshi ighi no ow kükümgha pewuvae.” 36Esau no pi, “Pa ye achipishi Jacob ipi aje kutsüke kumo? Kughengu ishi pha hi akiniu I pishiqhivae. Pa no I punuchipiu luvetsü, eno julo, itehi pa ye itaghi Iw kükümgha pewuve tsüae.” Tishino pa no pi, “No ye I ghenguno kükümgha lakhimu qhi püatsü anima?” 37Isaac no Esau khochile, “Julo, I no pa pelo o shou ampeu shivepe ae, eno I no pa thiküzümi kümtsü pa qemi shi penike tsüvae, eno athi ngo atsaizü vecheo I no pa pelo xülu peni keu shivae. Tishi aye I nu, o ghenguno ni ye kiu shitsü luni kea?” 38Esau no pa pu vilo pi, “No ye kükümgha lakhi likhimu anima, I pu? Ni ghi I kümgha tsülo, O I pu.” Esau no pa sütsa süqhe no qae.

39Tileno papu Isaac no khochile pa vilo pi:

“Julo, o kungo-a ye ayeghi ghüma kivi lono putosü niae,

eno kunguu atsütsü lo tsüzü launo putosü niae.

40O zütakikihi lono no ye xünani,

eno no ye o thiküzüu qe nani;

ikemu kughou nono hebideni keno paw kuokhasü o kuo

lono nono hechhe nani.”

41Kükümgha khipau pesü Isaac no Jacob kümghatsü keno tipau ghenguno Esau no Jacob mithive, eno Esau no pa ampi vilo pi, “I pu ghenguno mloqa kepu tsala ye kupunu wocheae; tithiu ye I no I thiküzüu Jacob heqhiveni.” 42Ikemu Rebekah nu anoghiu Esau tsa li vilo pive. Ikehu li no anu ayitiu kupuwu no pa vilo pi, “Julo, o mu Esau ye o heqhive niye kughu keu lono pa lopiqilu ani. 43Tighenguno I nu, itehi I tsa lulo. Ithu Haran lo I peu Laban lau povelo, 44eno o mu xukighide tave moke kutolo, pa gholo ado hami ngove lo— 45o mu mlokighide o launo ashekha shive moke kutolo, eno nono pa lau kiu shive keno pa no kümsümave moke kutolo tilau aghilo. Tithiuno I no timi khami puwuni eno tilauno o saighini. Kushiye ni ye atsala lakhi lono nokujo kinikujo pühaveni kea?”

46Tishino Rebekah no Isaac vilo pi, “Hittimi totimi ghenguno ni ye I küxü azüzüvae. Tsala Jacob no aphughi hipau lo Hittimi totimi lakhi luve aye, I ghenguno I küxü ye kiu akivi anani kea?”

Currently Selected:

BOTHUBO 27: SUMRVBSI

Highlight

Copy