BOTHUBO 26

Isaac lau Alhou Shoqhi

1Azüu Abraham ghuloki lo püqümiye ighi keu nguno alau, itaghi püqümiye lakhi ayeghi lo ighi. Ikehu Isaac no Gerar lo Philistiami kükau Abimelek lau wu. 2Ampeu no pa lau ipeghi no pi, “Egypt yeghi lo iqi kevilo; I no ayeghi khikhi o piyeni keno tile küghüna lo. 3Hipa yeghi lo ado hami ngolo, eno I no o gholo anani eno o kümghatsü nani, kughengu o lau eno o tikughukomi lau I no ayeghi hi kümtsü tsü nani, eno o pu Abraham lau ashoqhi khikhi I no tushoqhi keno tipau shikupu tsü nani. 4I no o tikughuko atsütsü lo ayepuqo toi kighishe tsü nani eno o tikughuko lau ayeghi hipaqo kümtsü tsü nani. Eno o tikughuko vecheo ayeghiqha lo shiye kümtsü kümghatsü nani, 5kughengu Abraham no I tsa gholu eno I no shilo pikeu, I zakütsü, I khuaye, eno I yezah pape ke.”

Isaac ngo Abimelek

6Ikehu Isaac ye Gerar lo küghünave. 7Kughou tipa-a lo timiqo no pa nipu vehu iniju keno, pa no pi, “Li ye I chepue,” kughengu pa ye, “I nipu” ipini keu msave ke, “tikumo aye hipa-a lo timiqo no Rebekah ghenguno I heqhive nosae” ipi kümsüve, kughengu li ye ajukivi ke. 8Pa no tile ado kushuo ngove kethiu, Philistiami kükau Abimelek no alashe lono jupipe kelo Isaac no pa nipu Rebekah sasü kunuvüqai aghi keu ithulu. 9Ikehu Abimelek no Isaac kuno pi, “Julo, li ye o nipue. Tishi aye kishino no ye, ‘Li ye I chepu,’ ipi kea?” Isaac no pi, “Kughengu I no ishi kümsüve, ‘Tishimo aye li ghenguno ni ye thive nani.’” 10Abimelek no pi, “No ye hi ye ningu lau kiu shive akea? Milakhi no mlalei o nipu sazüve tsü aye, no ye ningu shou akipimi süghini cheke.” 11Ikehu Abimelek no timi kümtsü ghutu ghi pi, “Khukhumu timi hipau momu pa nipu bukeu ye mtsüqheino pithive nani.”

12Isaac no tipa yeghi lo apiti qüsü eno tipa mpe lo ghile ghuthu aqhe no küghüsü ithulu. Ampeu no pa kümghatsüe, 13eno timi huye kinimi shive no alau-alau kighishelu no ighono kinimi shive. 14Pa ye atsü-aqu eno lhoxü loji ngo aqemi kutomo pighi luve, ikehu Philistiami ye pa ju anheshuve. 15(Philistiami no azükikhe papu Abraham ghuloki lono aqemiqo no chhuphe keqo kümtsü ayeghi pesü venhave tsü.) 16Abimelek no Isaac vilo pi, “Ningu launo wuvelo, kughengu no ye ni nguno akumtou shivae.”

17Ikehu Isaac ye tileno cheve eno Gerar Khila lo aghazü shipe ngono tilau küghüna auve. 18Isaac no itaghi azükikhe pa pu Abraham ghuloki lono chhu keqo, khikhi Philistiami no Abraham thive kethiu no lakhave tsü keno, tipaqo chhu kithe. Eno pa pu Abraham no kutsü ketoi pa no tipaqo je kutsü. 19Ikemu kughou Isaac qemi no akhila lo chhu no azüpuki ithulu keno, 20Gerar lo amishi khemi no Isaac mishi khemi sasü mtouve no pi, “Azü ye niw ke.” Ikehu pa no azükikhe je pesü Esek#26:20 Akiqi ye kohakishi kuvetsü, kughengu panongu no pa sasü kishi ke. 21Tithiu panongu no azükikhe kütau chhu, eno tipau lo ghi mtove, ikehu pa no tipau je Sitnah#26:21 Akiqi ye kimthikile kuvetsü. 22Pa ye tileno iqesü wuve eno itaghi azükikhe kütau chhu, eno panongu ye tipa ghenguno kighe move. Ikehu pa no tipau je Rehoboth#26:22 Akiqi ye ililaike-a kuvetsü no pi, “Itehi ye Ampeu no ningu ghenguno a-a kutove tsüae, eno ningu ye ayeghi hipau lono athi pithi luniae.”

23Tilau no pa ye Beersheba lo iqhove. 24Eno Ampeu no tipaji pa lau ipeghi no pi, “Ni ye o pu Abraham Lhou ke. Msa kevilo, kughengu I no o gholo ani, eno o kümghatsü nani eno I qeu Abraham je lono o tikughuko kighishe tsü nani.” 25Ikehu pa no tilehi akümlla-khache shiqhe no Ampeu mlla eno pa phiki shiqhe. Eno Isaac qemi no tilehi azükikhe lakhi chhue.

26Kughou Abimelek no paw mijekütsüu Ahuzzath ngo ghüshimi zatsüu Phicol pama sasü pa lau ighi keno, 27Isaac no panoqo vilo pi, “I mithi eno nongu gholono I hapheve püzü kushiye I lau ighi ani kea?” 28Panongu no pi, “Ampeu no o gholo anie pi ningu no mtsüqhei ithulu ani. Ikehu ningu no pi, ningu dolo visho shoqhi qhini, no eno ningu dolo, eno ni pelo o sasü puloshoqhi shipelo, 29ti ye nino o bumo eno akivi likhi kumo aye o lau kiumu shimo no aloinoqhiyi o puwuve ketoi no ghi ni lau alhoksa shimoni. Itehi Ampeu no o kümghave tsüae.” 30Ikehu pa no panoqo ghenguno aghulhu kutotsü eno panongu no chushove. 31Inaqhe panongu no itheno ithu no tushoqhi kileve. Eno Isaac no panongu kini puwove, eno panongu ye aloinoqhiyi pa launo wuve. 32Tipa tsalani Isaac qemi no ighi no panongu no azükikhe chhukeu ghili pa vilo pi, “Ningu ye azü ithuluvae.” 33Pa no tipau je Shibah#26:33 Akiqi ye ashoqhi kuvetsü; tighenguno mishighüna tipau je ye ishi kutolo Beersheba ipi cheni.

34Kughou Esau no ampe lhobidi shi akeno, pa no Hittimi Beeri nonga Judith eno Hittimi Elon nonga Basemath pa nipu shinike luve, 35eno pama no Isaac ngo Rebekah pama küxü mijimlaive tsüe.

Currently Selected:

BOTHUBO 26: SUMRVBSI

Highlight

Copy