BOTHUBO 30

1Kughou Rachel no Jacob nuli punu mlave keno, li no pafo ju anheshuve. Li no Jacob vilo pi, “Anuli I tsülo, tikumo aye ni ye thivenie!” 2Jacob ye li shou axuideve, eno pa no pi, “Alhou khuu no o launo atita lo xathi lakhave tsü akeno, ni ye Pa-a lo ngo ani keshea?” 3Tile li no pi, “I qeliu Bilhah hi anie; li lau ilolo, tishino li pelo I züqhushi punu tsü peni, tishi aye li vecheo ni ghi anuli ithuluvi ke.” 4Ikehu li no li qeliu Bilhah anipu shi pa tsü, eno Jacob no li lau ilove. 5Bilhah no mishipuve, eno Jacob lau anu lakhi punu. 6Tile Rachel no pi, “Alhou no I ghenguno küghatha tsüe, Pa no I sütsa ghi chilu tsüno anu lakhi I tsüvae.” Tighenguno li no pa je Dan kutsü. 7Rachel qeliu Bilhah ye itaghi mishipuve eno Jacob lau anu akiniu punu. 8Tithiu Rachel no pi, “Shishe kumgho keu lono I no I fo sasü kükha no tokulu shilue.” Ikehu li no pa je pesü Naphtali kutsü.

9Kughou Leah no anu punu move keno, li no li qeliu Zilpah pesü li kimi Jacob lau anipu shi tsüve. 10Tishino Leah qeliu Zilpah no Jacob lau anu lakhi punu tsü. 11Eno Leah no pi, “Angukivi shivae!” Ikehu li no pa je Gad kuvetsü. 12Leah qeliu Zilpah no anu akiniu Jacob lau punu tsü. 13Eno Leah no pi, “Ni ye alovi anie! Kughengu totimiqo no alokiviu ipi I kue.” Ikehu li no pa je Asher kuvetsü.

14Ashothi ghile ghuloki lo Reuben no aluza wuno zünilobo aghikeu ithulu kehu pewo paza Leah tsü. Tile Rachel no Leah vilo pi, “Kimiyeno o nuw zünilobo hami I tsülo.” 15Ikemu li no pi, “I kimi no o sawuve keu ye avehu tachu küghashi ani keshea? I nuw zünilobo ghi no ye ikhipe wuveni keshea?” Rachel no pi, “Tishi aye o nuw zünilobo chhekichile shi itiji no ye pa gholo zü lunani.” 16Kughou Jacob no avelau aluza lono ideighi keno, Leah no pa sasü kusho niye wuno pa vilo pi, “No ye I lau iloghi masae, kughengu I no I nuw zünilobo vecheo o piqevae.” Ikehu pa no tipaji li gholo züve. 17Eno Alhou no Leah sütsa chilu tsüno li ye mishipuve no Jacob lau anu apunguu punu tsü. 18Leah no pi, “Alhou no I jume I tsüvae, kughengu I no I qeliu pesü I kimi tsüke.” Ikehu li no pa je Issachar kutsü.

19Leah no itaghi mishipuve eno li no Jacob lau anu akütsüghou punu tsü. 20Tile Leah no pi, “Alhou no agho kivi pesü I pelo ighilu peke; itehi ye I kimi no I gihuniae, kughengu I no pa lau anu tsügho punuve tsüae.” Ikehu li no pa je Zebulun kutsü. 21Tithiu li no anga lakhi punu eno li je Dinah kuvetsü.

22Tishino Alhou no Rachel kümsülu, eno Alhou no li sütsa chilu tsüno li tita khaqhive tsü. 23Li no mishipuve no anu lakhi punu, eno li no pi, “Alhou no I jukünatha keu ikhipe wuve tsüae.” 24Li no pa je Joseph kuvetsü no pi, “Ampeu no I lau anu lakhi küpha tsüpeniu!”

Jacob Küakini

25Rachel no Joseph punu khavi Jacob no Laban vilo pi, “I puwuve lo, tishino I pelo I ki eno I ghakhu lo wolu pelo. 26I nipu pama ngo I nuli, khunoqo ghenguno I no o qeve akeno I tsüvelo, tishino I pelo wolu pelo, kughengu I no o qeighi keu nono ithi anie.” 27Ikemu Laban no pa vilo pi, “Tsala nono I küpüqhiyi ithulu aghi aye, I no saqhisali lono ithivae, ti ye o ghenguno Ampeu no I kümghave tsüae. 28O jume pijulo, eno I no ti o tsünie.” 29Jacob no pa vilo pi, “I no kishi o qeve eno o tsü-aqu no kishi I gholo ikowove akeno no ampi no ithi anie. 30Kughengu I no ighi moke züu no ye aghulo likhi ae, ikemu tipau ye kupukuno shi ikowovae, eno I no khilau tsüghüwo keno Ampeu no o kümgha tsüe. Ikemu itehi ye I kibo ghenguno ni ghi kughono kutoni kea?” 31Pa no pi, “Ni ye kiu o tsüni kea?” Jacob no pi “No ye kiumu I tsü akepu shimo nani. Tsala nono I ghenguno hipau shitsü aye, I no itaghi o tsü-aqu tucho eno khekuto tsü nani: 32ishi I pelo o tsü-aqu xujulu pelo, tipaqo dolo ambe yetamüghüi keu, asüphakive eno tsübui keqo küta shiveni, ane ghi doghü-doghü keu ngo asüphakiveqo küta shive no tipaqo no I jume shini. 33Ikehu hithiu kughou nono I jume juniye ighini keno, I mikucho huno I ghenguno khochile nani. Ane asüphakive kumo keu momu yetamüghüi mokeu eno ambeqo dolo tsübuimo keu, I tsü-aqu gholo ithulu aye, tipaqo ye aküpka kepi kihini.” 34Laban no pi, “Alova! Nono pi aketoi tishini.” 35Ikemu tipa tsalani Laban no anetsü yetamüghüi eno doghü-doghü keqo küta shive, eno anequ asüphakive, doghü-doghü keu, metsüghoi keqo ngo ambe tsübui keqo kütashi hasawo pa nuli pelo jukütsü peniye qhive. 36Eno pa no Jacob ngo pama tsü-aqu dolo atsala küthü lache qhemi qhive, Jacob ye Laban tsü-aqu jukuto ae.

37Tithiu Jacob no khotsüsü loka ngo almond loka eno tsüzüsü loka ishi süghi no ayikola aqe-aqe shi miyeve, ikehu aküsü tipaqo lo metsüghoi keu ithulua. 38Pa no asü kholhave keqo pesü atsüaqu zü tughuko zülo qhive, ti ye azü tsü chekeu-a, khilehi atsüaqu no azü yeniye ighi chekeno tipa-a ke. Lhoxüqo no azü yeniye ighike lono ipache kehu, 39atsüaqu no asü lokaqo zülono ipave kelo kuchono yetamüghüi keu ngo asüphakive eno doghü-doghü shikeqo pitie. 40Jacob no ambequqo kütashi qhino tipaqo gi pesü Laban tsüaqu yetamüghüi keu ngo tsübui keqo küdau jupuwope. Pa no paw lhoxüqo küta shive no Laban tsüaqu gholo qhimove. 41Kughou atsüaqu kumto no kiveni keno, Jacob no asü lokaqo pesü atughuko lo atsüaqu zülo qhitsü, tishianguno panoqo pelo asü lokaqo dolono kivelu peniye ke, 42ikemu atsüaqu miqemlei keqo ghengu ye pa no tile qhitsümoe. Ikehu miqemlei keu thaqhü no Labanw shive eno akumto thaqhü no Jacobw shive. 43Ikehu timi huye ighono kughuko luve eno atsüaqu, aqemi totimi ngo kiptimi, eno sayeshi ngo khurhaqo kutomo shive.

Currently Selected:

BOTHUBO 30: SUMRVBSI

Highlight

Copy