BOTHUBO 23
23
Sarah Thive eno Qhove
1Sarah ye ampe 127 xü. 2Li ye Canaan yeghi lo Kiriath-arba (ti ye Hebron) lono thive, Abraham no wuno Sarah ghenguno mloqae. 3Abraham no akumo-a lono puthugho luve no Hittimi vilo pi, 4“Ni ye kupokichemi eno nongu gholo inami; akumo kuqho-a ghenguno nongu mheghi lakhi I tsülo, tishianguno I no Iw kithimi shiqho luni.” 5Hittimi no Abraham khochile, 6“Ningu tsa inilo, I mpeu; no ye ningu gholo Alhouw kükapumi lakhie. Ningu kumoki akiviu lo ow kithimi shiqholo. Ningu khunomu o launo ni kumoki süchilepe o tsümove keu shimo nani.” 7Abraham no puthugho no Hittimi, aphughi lo timiqo zülo itsaqi. 8Eno pa no panoqo vilo pi, “Tsala nongu no I pelo akumo qholu penike pulo aghi aye, I tsa ini tsülo eno I ghenguno Zohar nu, Ephron qhüiniju tsülo, 9tishianguno pa no pighi akeu Machpelah tuki khikhi pa luza shekichi lo ani keno tipau I tsü penie. Nongu nhethe lono akumoki ghenguno amheghi lakhi shi ame lono I tsüve pelo.”
10Ephron ye Hittimi gholo iqa ae, eno pa no mishighüna khagho lo Hittimi akeqo kümtsü zülono Abraham khochile, 11“Moe, I mpeu, I tsa ini tsülo: I no aluza o tsüveni, eno tile atuki akeu o tsüveni. Iw timi nuliqo zülono I no tipau o tsüve anie. Nono kithimi shiqho lulo.” 12Tileno Abraham no aphughi lo timiqo zülo pishiqho. 13Eno pa no aphughi lo timiqo zülono Ephron vilo pi, “Ikemu tsala nono pulo aghi aye, I tsa ini tsülo: I no aluza me o tsüvenie. I launo tipau ikhilu tsülo, tishianguno I no kithimi shiqho lunie.” 14Ephron no Abraham khochile, 15“I mpeu, I tsa ini tsülo: ayeghi ye ghükayi ahu bidi me qhemike, ti ye nikujo dolo kiu pi ania? Nono kithimi shiqho lulo.” 16Abraham no Ephron tsa inive, eno Ephron no Hittimi zülono ame piqhive keu kiqi lono Abraham no ghükayi ahu bidi, ti ye lhidimi kimghipu kiqi lono mighipe tsüve.
17Ikehu Machpelah lo Ephron luza khikhi Mamre kipelau akeno tile atuki eno asüboqo akeu tipaqha kümtsü 18Hittimi khunoqo mishighüna khagho lo ighi akeno panoqo zülono Abraham lau amheghi lakhi shi ikhipe tsüve. 19Tithiu Abraham no Canaan yeghi lo Mamre (ti ye Hebron) kipelau Machpelah luza lo atuki akeu lo pa nipu Sarah shiqhove. 20Aluza eno tile atuki akeu ye Hittimi no Abraham lau amheghi lakhi shi akumo kuqho-a shi penike tsüve.
Currently Selected:
BOTHUBO 23: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
