BOTHUBO 24
24
Isaac eno Rebekah
1Abraham ye kitemi shive eno ampe kutomo shiuve. Eno Ampeu no thokha lo pa kümghave tsüe. 2Abraham no pa kibo lo aqemi akichiu, khuu pa mheghi jukütsü chekeno, pa vilo pi, “O u pesü I lukobo qholo qhilo, 3tishianguno I no o pelo Ampeu, atsütsü Lhou eno ayeghi Lhou vecheo tushoqhi peni, ti ye Canaanmi khuno dolo I no xüani keno panongu ngaqo pesü no ye I nu nipu lutsü moni, 4ikemu I ghakhu eno I bolomi lau wuno anipu lakhi I nu Isaac ghenguno lutsü lo.” 5Aqeu huno pa vilo pi, “Totimi huno I papesü ni yeghi lo ighimo luvie. Tishive aye, nono khipa yeghi lono ighi keno tilau ni ye o nu sachile woni keshea?” 6Abraham no pi, “No ye tilau I nu sachile woni keu shi kevilo. 7Ampeu, atsütsü Lhou, khuu no I limi eno I sholokumi yeghi lono I saipeghi, eno ‘O tikughukomi lau I no ayeghi hipau tsüni,’ ipi I pütsa eno I lau ashoqhi shi keno, Pa no Paw kungumi o züu puwu tsü nani, eno no ye I nu ghenguno tilauno anipu lusaghi nanie. 8Ikemu tsala totimi huno o pape ighini keu pulo move aye, no ye I shoqhi hipau lono kuqhopheve nani; no ye khilemu I nu tilau sachile wo kevilo.” 9Ikehu aqeu huno Abraham lukobo qholo pa u qhino hipau ghenguno tushoqhive.
10Tishino aqeu huno pa mpeuw sayeshi chighi eno agho jeli akiviu ikhipe wuve; eno pa no ithu Mesopotamia lo Nahor phughi lo wuve. 11Avelau totimiqo no azü puche keu süchedo lo pa no sayeshiqo pelo mishighüna khalau azükikhe phivilo qhoqhünhepe. 12Eno pa no pi, “O Ampeu, I mpeu Abraham Lhou, kimiyeno ishi tokulu I tsülo eno iqemokeu kikimiye I mpeu Abraham lau piye tsülo. 13Julo, ni ye azüpuki phivilo ngo ani, eno mishighüna lo timi ngaqo no azü punike ighi nani. 14I no ilimi khuu vilo, ‘Kimiyeno o zübohu kughoqhi tsülo, tishino I pelo yelu pelo,’ ipi kelo li no, ‘Yelo, eno I no ow sayeshiqo ghi azü piyeve tsüni’ ipini keno—li huno Nono o qeu Isaac ghenguno kimshi püakeu shi aghilu pelo. Hipau vecheo Nono iqemokeu kikimiye I mpeu lau piyevae pi I no ithini.”
15Pa no atsa pi tamphi lono, julo, Bethuel nonga Rebekah no azübohu li bighi lo xapu ighi. Bethuel ye Abraham thiküzüu, Nahor nipu Milcah no punuke. 16Ili lhothe huye ighono ajukivi, eno kiptimi khunomu shipixi mphi keu ilimi. Li no azüpuki lo iqi no li zübohu shepichhi luve no iqhoghi. 17Tileno aqeu huno li kushoni ye li lau posü ighi no pi, “Kimiyeno o zübohu lono I pelo azü kitila yelu pelo.” 18Li no pi, “Yelo, I mpeu.” Eno li no mtazü li zübohu li u lono peqhive no azü yelu penike pa tsüe. 19Kughou li no azü pesü pa piye tave keno, li no pi, “I no ow sayeshiqo ghi, panongu no aghapiqi lumoke kutolo azü piyeve tsünie.” 20Ikehu li no akimighi shi azübohu pesü lhoxü piye chekeu tughuko lo azü lesü tsüno itaghi azü pelu niye azükikhe lo posü wuve, eno li no paw sayeshi kümtsü ghenguno azü shophe tsü. 21Timi huno Ampeu ye pa ghüzüla lo tokulu shitsü nani kemo keno inaqhoi li chhejuae.
22Kughou sayeshiqo no azü yeluve keno, timi huno ameshoyi nguthi lakhi gram pungu, eno ameshoyi aumlo kükha kini gram 100 kimshi ikhiphe, 23eno pi, “Kimiyeno no ye khuno nga keno I vilo pi lo. O pu kilo ningu pelo tsüküzü do puwolu penike ghenguno achebo anima?” 24Li no pa vilo pi, “Ni ye Nahor nipu Milcah no punu keu Bethuel nonga ke.” 25Li no itaghi pi, “Ningu ye aghijini ngo lhoxü chuqupu kupukuno shi ani eno achebo ghi anie.” 26Timi huno pa kütsü pishiqho luve no Ampeu mlla 27eno pi, “I mpeu Abraham Lhou, Ampeu, khuu no Paw iqemokeu kikimiye eno Paw pükhükulu I mpeu launo süchileve mo keno, Pa sheqhelo. I ghengu ye, Ampeu no ala kupuju lo I kiche sasü I mpeu no bolomi kilo süve tsüae.” 28Tithiu ayiliu no posüwo li paza kibolomi vilo hipaqo vehu pive.
29Rebekah ye apeu lakhi ache, pa je ye Laban. Laban no azüpuki küdau timi lau powu. 30Pa no anguthi ngo pafo umlo lo asapu ithulu eno pafo Rebekah tsa, “Timi huno ishi I vilo pi,” ipikeu chilu khavi, pa no timi lau powue. Eno julo, pa ye azüpuki lo sayeshiqo phivilo puthugho aghi. 31Pa no pi, “Ighilo, O Ampeu no kümgha tsükeu. Kushiye no ye khalau puthugho ani kea? Kughengu I no aki eno sayeshi ghenguno a-a kutove tsüae.” 32Ikehu timi huno aki lo iloghi no sayeshi kho liqhive, eno aghijini ngo achuqupu sayeshi tsüve, eno tile pa ngo pa gholo timi khunoqo chekeno panoqo pukhu qhukepu zü ae. 33Tithiu achuqupu kutope pa zülo qhitsü. Ikemu pa no pi, “I no kiu piniye ani keno tipau pive paghi moke loye ni ye chumono aghini.” Laban no pi, “Pijulo.”
34Ikehu pa no pi, “Ni ye Abraham qeue. 35Ampeu no shishe I mpeu kümghatsü, eno pa ye kije shivae. Atsü-aqu, ghükayi ngo ameshoyi, aqemi kiptimi ngo totimi, sayeshi ngo khurhaqo ishi Ampeu no pa tsüe. 36I mpeu nipu Sarah no kitemi shive kethiuno I mpeu lau anu lakhi punu tsü, eno I mpeu no akeu kümtsü pa tsüvae. 37I mpeu no I pelo ashoqhi shipe no pi, ‘No ye I nu nipu ghenguno Canaanmi, khuno yeghi lo I no xüani keno, pano ngaqo lutsü kevilo, 38ikemu no ye I limi eno I laghami lau wuno I nu ghenguno anipu lakhi lutsü lo.’ 39I no I mpeu vilo pi, ‘Totimi huno I pape ighimo luvie.’ 40Ikemu pa no I vilo pi, ‘Ampeu, khuu zülo I no checheni keno, Pa no Paw kungumi o gholo puwu nani, eno o laghi heshetsü nani. No ye I nu nipu ni sholokumi eno I limi dolono lusaghi tsülo. 41Tishino kughou nono ni sholokumi lau ighini keno, no ye I shoqhi lono kuqhopheve nani. Tsala panongu no li pesü o tsümove aye, no ye I shoqhi lono kuqho pheve nani.’
42“Ishi I no azüpuki lo ighi no pi, ‘O Ampeu, I mpeu Abraham Lhou, tsala Nono itehi I no wuche keu la heshetsü aghi aye, 43julo, ni ye azüpuki lo puthugho anie. Athathelimi khuu no azü puniye ighini keno, li vilo I no, “Kimiyeno o zübohu lono azü kitila yelu nike I tsülo,” ipi kelo, 44khuu no, “Yelo, eno I no ow sayeshi ghengu ghi shophe tsünie,” ipi I vilo pini keno, tino Ampeu no kimshi tsükeu I mpeu nu nipu shi aghi pelo.’
45“I no I mlo lono atsa pi tamphi lono, julo, Rebekah no li zübohu abighi lono xapu ighi, eno li no azüpuki lo iqi no azü shophe. I no li vilo pi, ‘Kimiyeno I pelo azü yelu pelo.’ 46Li no mtazü li bighi lono azübohu peqhi no pi, ‘Yelo, eno I no sayeshi ghi piyeni.’ Ikehu I no yeluve, eno li no sayeshi ghi yelu penike tsüve. 47Tishino I no li vilo iniju, ‘No ye khuno nga kea?’ Li no pi, ‘Nahor nipu Milcah no punu keu Bethuel nonga ke.’ Ikehu I no anigikighi li nigi lo sütsü eno asapu li u mlo lo pipeve. 48Tithiu I no I kütsü pishiqhope I mpeu Abraham Lhou, Ampeu khuu no alaghi achipi lono I mpeu nu ghenguno I sasü pa sholokumi nonga lau ighi keno, Pa mlla eno Pa je sheqhe. 49Ikehu itehi, tsala nongu no iqemokeu kikimiye eno pükhükulu I mpeu lau piyeni shi aye, I vilo pilo; tishimla namu I vilo pilo, tishianguno I no au ajeu momu piyiu tsüghü wu junie.”
50Tileno Laban ngo Bethuel pama no khochile, “Avehu ye Ampeu launo ighivae; ningu ye o vilo akivi momu aküsa pimlavae. 51Julo, Rebekah o zülo anie; Ii sasü wolo, eno Ampeu no piqhive ketoi, li no o mpeu nu nipu shilu pelo.”
52Kughou Abraham qeu no panongu tsa chilu keno, pa no Ampeu zülo ayeghi lo pishiqho luve. 53Eno aqeu huno ghükayi ngo ameshoyi chi eno aphiminiqo ikhipe Rebekah tsü. Pa no li peu eno li paza ghi amekusho tüna-nanuqo tsü. 54Tishino pa eno pa gholo chekemi ye chushove, eno kijiliu ye tile ngove. Kughou panongu no inaqhe ithughi keno, aqeu no pi, “I mpeu lau I puwove lo.” 55Li peu ngo li paza no pi, “Ayiliu pelo ni gholo ado hami, akimkheu no atsala chighia ngolu pelo; tithiuno li no wolu penie.” 56Ikemu pa no panoqo vilo pi, “Ampeu no I la hesheve tsüake I süpushu tsü kevilo. I puwuve lo, tishianguno ni ye I mpeu lau woveni.” 57Panongu no pi, “Nino ayiliu kuno li vilo inijuni.” 58Panongu no Rebekah kuno li vilo pi, “No ye timi hipau gholo no wunima?” Li no pi, “Ni ye wunie.” 59Ikehu panongu no pano chepu Rebekah eno li qeliu, Abraham qeu eno paw timi ishi puwove. 60Eno panongu no Rebekah kümghatsü no li vilo pi,
“Ni chepu, o pelo qhethonhe no
qhethonhe paza shilu peniu,
eno o tikughuko no pano mithi
chekeqo khagho lelu peniu!”
61Tishino Rebekah eno li qeliu pama ye ithu sayeshi lo ikuve eno timi hu pape wuve. Ikehu aqeu huno Rebekah saluve eno pa la lo wove.
62Ikelo Isaac ye Beer-lahai-roi lono ideighive no Negeb lo küghüna ache. 63Isaac ye kümsüputho nike avelau aluza lo wuve. Pa no pa nhethi tsüpuku no jukelo sayeshi cheghi keu ithulu. 64Rebekah no li nhethi tsüpuku, eno kughou li no Isaac ithulu keno, li no sayeshi lono iqighive, 65eno aqeu vilo pi, “Timi hupau ningu sasü kusho niye aluza lo chekeu ye khuu kea?” Aqeu huno pi, “Ti ye I mpeu ke.” Ikehu li no agi künhaphi pesü nhapuve. 66Aqeu huno Isaac vilo pa no kiu shi keno kümtsü pive. 67Tileno Isaac no paza Sarah phiki lo li sailove no Rebekah luve, eno li ye pa nipu shive, eno pa no li kimiye. Ikehu Isaac paza thive kethiu hi no pa lokughuno tsüe.
Currently Selected:
BOTHUBO 24: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
