BOTHUBO 22

Isaac pesü Aghashi

1Hipa thiu Alhou no Abraham peju no pa vilo pi, “Abraham!” Pa no pi, “Ni hile anie.” 2Alhou no pi, “O nu lakhi likhi akeu Isaac, khuu nono kimiye cheni keno, pa sasü Moriah yeghi lo wulo, eno tilau naghuto lakhi khikhi I no o piyeni keno tileno pa pesü akipti kümllagho shi tsülo.” 3Ikehu Abraham no inaqhe itheno ithuve no paw khurgha anhemgha xapipe, eno pa gholo apumi kini eno pa nu Isaac ishi sasü wuve. Akipti kümllagho ghenguno asü ghepuve no Alhou no khipa-a pa piye keno tilau wuve. 4Atsala aküthüni Abraham no pa nhethi tsüpukupe jukelo a-a hu putou no ithulu. 5Tileno Abraham no paw apumi pama vilo pi, “Hile khurha gholo ngo aghilo; anu nikujo no hule wuno mllave no ideighini.” 6Abraham no akipti kümllagho ghenguno asü pesü pa nu Isaac xapipeve. Eno pa no ami ngo azüta pa u lo peluve. Tishino pama ye kümtsa wuve. 7Isaac no pa pu Abraham vilo pi, “I pu!” Pa no pi, “Ni hile ani, I nu.” Isaac no pi, “Julo, ami ngo asü ye ani kemu akipti kümllagho ghenguno ambe khile ani kea?” 8Abraham no pi, “I nu, Alhou no akipti kümllagho ghenguno ambe tsü nani.” Ikehu pama no kümtsa wuve. 9Kughou pama no Alhou no kichetsü keu-a lo ighive keno, Abraham no tilehi akümlla-khache shiqhe no asü kithipe qhive eno pa nu Isaac tsüghave no akümlla-khache lo asü shou bepe qhive. 10Tishino Abraham no pa u chhope pa nu ghiqhive niye azüta ikhiluve. 11Ikemu Ampeu kungumi no atsütsü lono pa kuno pi, “Abraham, Abraham!” Pa no pi, “Ni hile ani.” 12Pa no pi, “O nu shou o u be kevilo momu pa lau kiumu shi kevilo, kughengu nono I launo o nu lakhi likhi akeu süchile move keu ithulu kelo no ye Alhou sümsa chenie pi itehi ye I no ithivae.” 13Abraham no pa nhethi tsüpuku jukelo pa thiu ambetsü lakhi atsünipho lo akibo künakufupe aghi. Pa no wuno ambetsü pesü pa nu züqhulo akipti kümllagho shi tsüve. 14Ikehu Abraham no tipa-a pesü, “Ampeu no tsü nani,” ipi kuvetsü; ishi kutolo hitoi pi cheni, “Ampeuw naghuto lono ti tsü nanie.”

15 Ampeuw kungumi no atsütsü lono akiniu Abraham ku 16eno pi, “I no I je kuno ashoqhi shivae, ipi Ampeu no asheshu, kughengu nono o nu lakhi likhi akeu süchile mono hi shive akehu, 17I no mtsüqheino o kümgha tsüni, eno mtsüqheino atsütsü lo ayepu ngo azüghimkü lo asaye toi o tikughuko kighishe tsüni. Eno o tikughukomi no pa ghümiqo khagho khasü luve nani, 18o tikughuko vecheo ayeghi lo shiye kümtsü no müghalu nani, kughengu nono I gholuke.” 19Ikehu Abraham ye paw apumi pama lau ideighive no panongu kümtsa Beersheba lo wuve. Abraham ye Beersheba lo küghüna ache.

20Hipa thiu Abraham vilo ishi pi, “Julo, Milcah ghi o thiküzüu Nahor lau anuli punuve tsüae: 21Pa nu anoghiu Uz, pa thiküzüu Buz, Aram papu Kemuel, 22Chesed, Hazo, Pildash, Jidlaph, eno Bethuel.” 23(Bethuel ye Rebekah papu.) Milcah no pano tache Abraham thiküzüu Nahor lau punu tsü. 24Tinguno alau pa nipu amishiu, khuu je Reumah keno, li no Tebah, Gaham, Tahash eno Maacah punu tsüe.

Currently Selected:

BOTHUBO 22: SUMRVBSI

Highlight

Copy