BOTHUBO 21

Isaac Punu

1 Ampeu no piqhi ketoi, Pa no Sarah xuju, eno Pa no ashoqhi shi ketoi Sarah lau mlatsüe. 2Sarah ye mishipu luve eno Abraham no kitemi shive kethiuno Alhou no piqhi püakeu do ghuloki lono anu lakhi punu. 3Abraham no pa nu, khuu Sarah no punu keno, pa je Isaac kuvetsü. 4Kughou pa nu Isaac no atsala tache shi akeno, Alhou zakütsü kiqi lono Abraham no pa phighüyiko ghavetsü. 5Pa nu Isaac punu kelo Abraham ye ampe aqhe shiae. 6Eno Sarah no pi, “Alhou no I pelo nu lupe; kughengu khukhumu hi chilu keu ye I gholono nu nani.” 7Li no pi, “Khuu no Abraham vilo Sarah ye anuli saputhu nanie piluni che kea? Ikeghi pa no kitemi shive kethiuno I no anu pa lau punu tsüe.”

Alhou no Hagar ngo Ishmael Süsho

8Anu no thuwuve eno pa khoveke tsalani Abraham no aghulhu kije shie. 9Ikemu Egyptmi Hagar no Abraham lau punu tsükeu anu huno nu aghikeu Sarah no ithulu. 10Ikehu li no Abraham vilo pi, “aqüaxeu atopuu hipau li nu gholono hapheve lo, kughengu aqüaxe topuu hipau nu ye I nu Isaac gholo amheghi ighi monani.” 11Abraham ye pa nu vehu ghenguno ighono pa loshipüsüve. 12Ikemu Alhou no Abraham vilo pi, “Anu ghenguno eno o qüaxeu atopuu ghenguno aloqimo no akevilo. Sarah no o vilo kiu piani keno titoi shilo, kughengu Isaac vecheo o tikughuko kihi nani. 13I no aqüaxeu atopuu nu ghi shiye lakhi shitsü nani, kughengu pa ye o tikughuko ke.” 14Ikehu Abraham no inaqhe itheno ithu asho ngo azü hughi pesü Hagar bighi lo anu gholono xipipeve no li puwuve. Li ye cheve no Beersheba sayeqha lo itsü wuve.

15Kughou ahughi lo azü kühave keno, li no atsünipho qholo anu qhive. 16Tishino li no shexilika kapuwulu kepu qhemi lo wuno aghüngü lo iqave, kughengu li no pi, “Ni ye anu kithi ju amlae.” Li no anu ghüngü lo iqa no asütsa süqhe ghi qae. 17Eno Alhou no anu sütsa chiluve eno Alhouw kungumi no atsütsü lono Hagar kuno pi, “Kiu no o pünaqhi ani kea, Hagar? Msa kevilo, kughengu anu no ngo akeu-a lono Alhou no pa sütsa chiluve tsüae. 18Ithulo! Anu khape lulo, eno o u no mtotoi pa khapelo, kughengu I no pa pesü shiye kije shitsü nani.” 19Tishino Alhou no li nhethi khaqhitsü, eno li no azükhe lakhi ithulue. Li no wuno ahughi lo azü shepichhi luve no azü anu piyeve. 20Alhou no anu gholo ae, eno pa ye thuwuve. Pa ye asayeqha lo ache eno shexilika kipe lo shitsa shive. 21Pa ye Paran sayeqha lo ache, eno paza no Egypt yeghi lono anipu lakhi pa ghenguno luvetsü.

Abimelek sasü Visho shi

22Tipa ghuloki lo Abimelek ngo paw ghüshimi zatsüu Phicol pama no Abraham vilo pi, “Alhou ye nono shikeu kümtsü lo o gholo ani. 23Tighenguno itehi hileno no ye Alhou jelono ni eno I laghami eno I tikughuko pishiqhi moni, ikemu I no kimiyeqhiyi o lau mla ketoi, no ghi I lau eno ayeghi khile nono inami shi ani keno tipau kimiyeqhiyi nipi I lau tushoqhi lo.” 24Eno Abraham no pi, “I no tushoqhini.”

25Kughou Abraham no Abimelek vilo pa qemi no azükhe süxa luve tsükeu muchho keno, 26Abimelek no pi, “Khuu no hipau shi keno ni ye mthae; no ye I vilo pimoe, eno ni ye ishi kutolo hi chilu mphie.” 27Ikehu Abraham no ambe ngo amshitsü hasawo Abimelek tsüno pama visho shive. 28Abraham no atsü-aqu loji lono ambeti tsüni hathape qhie. 29Abimelek no Abraham vilo pi, “Ambeti tsüni nono hathape qhipüa keu kiqi ye kiu kea?” 30Pa no pi, “Ambeti tsüni hipaqo nono Iw lono ikhilu tsülo, hipau no I no azükhe chhu kepi I ghenguno thopi shipelo.” 31Ikehu tipa-a pesü Beersheba#21:31 Ti ye azükhe tsüni momu ashoqhi zükhe ipi kutsü, kughengu tileno pama no ashoqhi shike. 32Ikehu pama no Beersheba lono puloshoqhi shie. Tishino Abimelek ngo paw ghüshimi zatsüu Phicol pama ye ithu no Philistia yeghi lo idewove. 33Abraham no Beersheba lo tamarisk bo lakhi shosü eno tileno Ampeu, Shekhaha Lhou sheqhe. 34Abraham ye Philistia yeghi lo ado kushuo inami shi itsüche.

Currently Selected:

BOTHUBO 21: SUMRVBSI

Highlight

Copy