BOTHUBO 17

Aphighüyiko kügha Puloshoqhi

1Kughou Abram no ampe lhotoku toku shi akeno Ampeu no Abram lau ipeghi no pa vilo pi, “Ni ye Akughushu Lhou;#17:1 Hebrew lo El Shaddai I zülo chechelo, eno tukutiye shikevilo, 2tishianguno Iw puloshoqhi nikujo dolo shini, eno no ye shishe kije ikowolu nani.” 3Tile Abram no pa gi pishiqho luve. Eno Alhou no pa vilo pi, 4“Julo, Iw puloshoqhi ye o gholo anie, eno no ye aqokitikhi shiyeqo papu shi nani. 5O je ye Abram ipi kumoae, ikemu Abraham#17:5 Momu aqokitikhi papu shiniae, kughengu I no o pesü aqokitikhi shiyeqo papu shive tsüae. 6I no o pelo shishe athi pithi lupe nani, o pesü shiye kutomo kughulho nani, eno o launo kükamiqo ighi nani. 7I no o Lhou eno o thiu tikughukomi Lhou shinike Iw puloshoqhi Nikujo dolo shi nani eno o thiu tiqheli kupuju lo shekhaha puloshoqhi shi nani. 8No eno o thiu o tikughukomi lau nono kachena shi akeu yeghi, Canaan yeghi kümtsü I no shekhaha mheghi shi tsüve nani, eno I no panoqo Lhou shi nani.”

9Alhou no Abraham vilo pi, “No eno o thiu o tikughukomi tiqheli no tiqheli kutolo Iw puloshoqhi papelo. 10Nikujo dolo eno o thiu o tikughukomi dolo Iw puloshoqhi khikhi nono pape masa keno ti ye hike: O gholo kiptimi kümtsü aphighüyiko ghaveni. 11Aphighü lo ayiko azüu akeu ghaveni, eno tino Nikujo dolo puloshoqhi michipu shinie. 12Nongu dolo kiptimi khukhumu punuwo atsala tache shive keu ye aphighüyiko ghaveni. Tiqheli kupuju lo o ki lono punu keu shi aghina, o tikughukomi kumo namu inaghami ow pisa no qhüluve kemi pinamu, 13khuu o ki lono punu momu ow pisa no qhülu keno kümtsü mtsüqheino aphighüyiko ghave tsüni. Tishianguno Iw puloshoqhi ye shekhaha puloshoqhi shi o philo ananike. 14Kiptimi khukhumu aphighüyiko ghamo keu ye paw timi launo kütüta shiveni; pa ye Iw puloshoqhi hephovae.”

Isaac Punu Pikiqhitsa

15Alhou no Abraham vilo pi, “O nipu Sarai ghenguno, no ye li pesü Sarai ipi moae, ikemu li je ye Sarah#17:15 Sarah kiqi ye kükaliu ipi kuniae. 16I no li kümghatsü nani, tinguno alau ghi, I no li vecheo anu lakhi o tsü nani. I no li kümghatsü nani, eno li ye shiyeqo paza shi nani; li launo ashiaye kükamiqo ipeghi nani.” 17Tileno Abraham no pa gi pishiqhope nuuve no pa likhi pa pütsa ghi pi, “Ampe aqhe shive kemi lau anu punulu nani keshea? Ampe lhotoku shive keu Sarah huye anu mishilu nani keshea?” 18Eno Abraham no Alhou vilo pi, “Ishmael no O zülo akivishi xülu keaye lae!” 19Alhou no pi, “Moe, o nipu Sarah no anu lakhi punu nani, eno nono pa je Isaac#17:19 Isaac kiqi ye pa no nue kutsü nani. I no pa thiu pa tikughukomi lau shekhaha puloshoqhi shi ghi pa sasü Iw puloshoqhi shi nani. 20Ishmael ghengu ye, I no o tsa chiluvae; julo, I no pa kümghave tsüae eno pa pelo shishe athi pithilu eno kughukolu penani. Pa ye yepemi chighikini papu shi nani, eno I no pa pesü shiye kije lakhi shitsü nani. 21Ikemu I no Isaac, khuu Sarah no tokuu hipa ghuloki lono o lau punutsü nani keno, pa sasü Iw puloshoqhi shi nani.”

22Kughou Alhou no pa sasü küptsa tave keno, Pa ye Abraham launo wuve. 23Tithiu Abraham no pa nu Ishmael eno pa ki lono punu keqo momu paw pisa no qhülu keqo, Abraham kilo kiptimi akeqo kümtsü saighi no Alhou no pa vilo pike toi, tipani no panoqo phighüyiko ghave tsü. 24Kughou Abraham no ampe lhotoku toku shi akeno pa ye tileno aphighüyiko ghae. 25Eno pa nu Ishmael no ampe chighiküthü shi akelono aphighüyiko ghae. 26Tipa tsalani no Abraham eno pa nu Ishmael ye aphighüyiko ghave. 27Kiptimi khunoqo pa ki lono punu eno pa no inaghami launo pisa no qhülu keno tipaqo kümtsü pa gholono aphighüyiko ghave.

Currently Selected:

BOTHUBO 17: SUMRVBSI

Highlight

Copy