BOTHUBO 16

Sarai ngo Hagar

1Abram nipu Sarai ye pa lau atianuli punu tsümlave. Li ye Egyptmi aqelimi lakhi Hagar ipi keu ache. 2Sarai no Abram vilo pi, “Julo, Ampeu no atianuli pununi keu lono I lakhavae. I qeliu lau wulo; tishi aye li vecheo atianuli I lau punu tsüluvi ke.” Eno Abram no Sarai tsa inive. 3Ikehu Abram no Canaan yeghi lo ampe chighi ngove kethiu, pa nipu Sarai no li qeliu Egyptmi Hagar sawo anipu lakhi toi Abram tsüve. 4Pa no li lau wu, eno li ye mishive. Kughou li no mishiuve keu ithive keno, li no li mpeliu jukünathauve. 5Sarai no Abram vilo pi, “Akipimi I lau shive keu ye o shou ikughi peniu! I no o pelo valu penike I qeliu tsü, ikemu kughou li no mishi luvae pi ithi keno, li no I jukünathae. Ampeu pelo nikujo dolo xathatsü peniu!” 6Ikemu Abram no Sarai vilo pi, “Julo, o qeliu ye o küka qholo anie; o pulou kiqi lono li lau shilo.” Tileno Sarai no mghachhoi li peitha, eno li ye li launo pove.

7 Ampeuw kungumi no asayeqha lo Shur la lo azüpuki akeu lono li ithulu. 8Pa no pi, “Hagar, Sarai qeliu, no ye khilau no ighi eno khilau wucheni kea?” Li no pi, “Ni ye I mpeliu Sarai launo pocheni.” 9Ampeuw kungumi no li vilo pi, “O mpeliu lau idewolo eno li qhoqhülo.” 10Itaghi Ampeuw kungumi no li vilo pi, “I no mtsüqhei o tikughuko küghüsü tsü nani, tishikeu lono panongu ye aqokitikhi kihikha kümla shive nani.” 11Eno Ampeuw kungumi no li vilo pi,

“Julo, no ye mishipu ani

eno anu lakhi punu nani.

No ye pa je Ishmael kutsü nani,

kughengu Ampeu no o ghime chiluve tsüae.

12Pa ye timi ghenguno aghalo khurha toi nani,

pa u no kümtsü mjochile nani,

kümtsü no pa mjochile nani,

eno pa ye pa bolomi kümtsü sasü aghümi shi xünani.”

13Ikehu li no Ampeu khuu li pütsa keno, Pa je pesü, “No ye ithukuluu Lhou,” ipi kuvetsü, kughengu li no pi, “Kuchou no khuu no I jukuto akeno I no hileno pa ithuluvae.” 14Tighenguno azükhe hu pesü Beer-lahai-roi ipi kuvetsü; ti ye Kadesh ngo Bered dolo ani.

15Hagar no Abram lau anu punu tsü, eno Abram no anu je pesü Ishmael ipi kuvetsü. 16Hagar no Abram lau Ishmael punu tsüke ghuloki lo Abram ye ampe lhotache tsügho shiae.

Currently Selected:

BOTHUBO 16: SUMRVBSI

Highlight

Copy