BOTHUBO 18

1Atsala külü dolo Abraham no pa phiki hukikha lo iqa akelo, Ampeu no Mamre lo aphisübo phivi lono pa lau ipeghi. 2Pa no pa nhethi tsüpuku jukelo timi küthü pa zülo puthugho aghi. Kughou pa no panoqo ithulu keno, pa no panoqo sholu niye aphiki hukikha lono posü wuno ayeghi lo pishiqho luve 3eno pi, “O I mpeu, tsala o nhethe lo ni küpüqhiyi ithulu aghi aye, o qeu heche wuve tsü kevilo. 4Azü kitila süghi no nongu pukhu qhutsü pelo, eno asübo qholo nongu kulhoqhi lo, 5tishi ake lono I no asho kitila süghi no nongu ghüthi püxülu peni, tithiuno nongu la lo wulu penie—kughengu nongu no nongu qeu lau ighive ake.” Ikehu panongu no pi, “Nono pi aketoi shilo.” 6Abraham no akimighi shi aphiki lo Sarah lau ilo no pi, “Mtazülo! Ashomkhu akiviu süqhu kichhi lakhi kunulo, eno ashopa mlalo.” 7Abraham no atsü-aqu loji-a lo powu no amshiti lakhi, akümtsha eno akivi sawo apumi lakhi tsü kelo pa no papashi kutove tsü. 8Tithiu pa no akichhizüchi, akichhizü eno amshiti pa no kuto keu ikhilu no panoqo zülo qhitsü. Panongu no chu akelo pa ye asübo qholo panoqo gholo ngoae.

9Panongu no pa vilo pi, “O nipu Sarah ye khile ani kea?” Pa no pi, “Li ye aphiki lo ani.” 10Ampeu no pi, “Tokuu hipa ghuloki lo mtsüqheino I no o lau ideighini, eno o nipu Sarah ye anu lakhi ithuluve nani.” Sarah ye aphiki hukikha lo Abraham thiuno iniae. 11Abraham ngo Sarah pama ye ampe kutomo shive, eno Sarah ye totimi lhoaye ghi ashekha shiveke. 12Ikehu Sarah no li mlokutou no nu ghi pi, “I no kulhokugho shive kethiuno, eno I mpeu no kitemi shive kethiuno ni ye azüküvüpu shiluni keshea?” 13Ampeu no Abraham vilo pi, “Kushiye Sarah ye nu ghi ishi piani kea, ‘Itehi ni ye kitemi shive akeghi mtsüqheino anu ithulu nani keshea?’ 14Ampeu ghengu ye kiuala ighono kushokütsüpu ani kea? Tokuu hipau ghuloki lo, piqhi püakeu do lono I no o lau ideighi nani, eno Sarah ye anu lakhi punu nani.” 15Ikemu Sarah no ti milive no pi, “Ni ye nu moe,” kughengu li ye msaveke. Pa no pi, “Moe, no ye nuveke.”

16Tithiu timiqo ye tileno wuve, eno panongu no Sodom küdau jupiqi. Abraham no panongu phepuwu niye panoqo gholo wue. 17Ampeu no pi, “I no kiu shiniye ani keno Ni ye Abraham launo küsüveni keshea? 18Abraham ye mtsüqheino kije eno akughushu shiye shi nani, eno ayeghi lo shiye kümtsü pa vecheo müghalu nani. 19Kughengu I no pa kisheluvae, pa no pa nuliqo azah tsü no achipiu mikucho eno kuchou xakütha shikeu vecheo Ampeu laghi lo cheche peniye eno tishikeu lono Ampeu no kiu Abraham vilo piqhi püani keno tipau pa lau süghilu peniye ke.” 20Tishino Ampeu no pi, “Sodom ngo Gomorrah shou ngukube igha keu no kije shivae eno panongu xine no kuthoküzü shive akehu, 21I no iqi no panongu ye I lau ighamku ighi akeu kiqi lono xüani keo kishi keno juni. Eno tsala tishi aghimo aye, I no ithiveni.”

Abraham no Sodom Ghenguno Qhüiniju

22Ikehu timiqo no tileno tsüghüsü Sodom küdau iqive, ikemu Abraham ye Ampeu zülo puthugho ae. 23Abraham no kupunu ighi no pi, “No ye mtsüqheino kixikilami gholono amikuchomi joleveni keshea? 24Kümsüju kelo mishighüna lo amikuchomi lhopungu aghi aye, amikuchomi lhopungu tile akeqo ghenguno mu No ye ghümono joleveni keshea? 25Tikithipu shi amikuchomi pesü küsaküghami gholono pithiveni keu ye O launo putosüve lo, tishive aye amikuchomi ye küsaküghami paphi shivae! Ti ye O launo putosüve lo! Ayeghi kümtsü shou Xaküthau ye achipiu shimoni keshea?” 26Ampeu no pi, “Tsala Sodom lo amikuchomi lhopungu mishighüna lo aghi aye, panoqo ghenguno I no tipa-a kümtsü ghüluve tsüni.”

27Abraham no khochile no pi, “Julo, ni ayeghimkhu eno ayevu huno Ampeu pütsa ayae. 28Tsala amikuchomi lhopungu gholo pungu mikheve aghi aye, No ye pungu kühave ke ghenguno mishighüna kümtsü kütsaveni keshea?” Pa no pi, “Tsala lhobidi pungu tile ithulu aye, Ni ye tipau kütsave monani.” 29Itaghi pa no Ampeu pütsa no pi, “Tsala lhobidi tile ithulu aye?” Pa no khochile, “Lhobidi ghenguno Ni ye tishimo nani.” 30Tithiu pa no pi, “O Ampeu no amloide tsü kevilo, I no pijuni. Tsala tile shighi ithulu aye?” Pa no khochile, “Tsala I no tile shighi ithulu aye, Ni ye tishimo nani.” 31Pa no pi, “Julo, ni ye Ampeu pütsa ayae. Tsala tile muku ithulu aye?” Pa no khochile, “Muku ghenguno Ni ye ti kütsave monani.” 32Tithiu pa no pi, “O, Ampeu no amloide tsü kevilo, ikemu I no itaghi hilikhi pijunie. Tsala chighi tile ithulu aye?” Pa no khochile, “Chighi ghenguno Ni ye ti kütsave monani.” 33Kughou Ampeu no Abraham pütsaqhive keno, Pa ye wuve, eno Abraham ghi pa kilo idewove.

Currently Selected:

BOTHUBO 18: SUMRVBSI

Highlight

Copy