EZEKIEL 47
47
Achineki lono Azü Qowu
1Tishino pa no achineki hukikha lo I sachile iloghi, eno julo, achineki hukikha lono kipela küdau azü qowu ae (kughengu achineki ye kipelau küdau juake). Azü ye achineki apeu aqhou no qoiqi ae, ti ye akiptia apeu küdau ke. 2Pa no khagho ahuu küdau no I saipeghive no khagho khalau khikhi kipelau ju akeno ti küdau I sawu; eno julo, khagho apeu azü ijiqighi aghie.
3Pa u lo akimghipu süta pesü kipelau ipeche kelo timi huno auxakuchho 500 mighiju, tishino azü lo I sailo kelo alaunhe kuto thoilo ae. 4Pa no auxakuchho 500 mighiju, eno I sasü azü lo ilo kelo akhonhe kuto thoilo. Itaghi pa no auxakuchho 500 mighiju, eno I sasü azü lo ilo kelo ti ye achita kutolo ikughive. 5Itaghi pa no auxakuchho 500 mighiju kelo ti ye aghoki ilhouve kehu ni ye katha mlave, kughengu azü no thoikughive. Ti ye azümihi kepu qhemishi thonheive, aghoki ye kathalu kepu shimove. 6Pa no I vilo pi, “Timi nu, no ye hipau ithuluve akema?”
Tishino pa no aghoki xüsa lo I sachile ipeghive. 7I no idewo kelo aghoki xüsa lo asübo kutomo hukukuu eno hikukuu aghikeu ithulue. 8Pa no I vilo pi, “Azü hipau ye kipela tokukujo küdau qowu ani eno Arabah lo qoiqi no Akithi Züghi lo ilove ani; kughou azü no azüghi lo qoilove keno, azü ye tsüghükhüive nani. 9Aghoki no khila qowuni keno, itikiche lhoxüqo no tile xüuve nani, eno tile akha ye ighono kutomo auve nani. Kughengu azü hipau no qowu akeu ye azüghi zü pelo tsüghükhüive peniye ke; tishikeu lono aghoki no qowuke-a lo thokha kümtsü xülu peniye ke. 10Akhakükhami no azüghi phivilo puthugho nani. Engedi lono Eneglaim kutolo akhame vesü keu-a shive nani. Tipau lo akha ye Azüghi Kije#47:10 Momu Mediteriya Züghi lo kha toi ajeli kutomo shi nani. 11Ikemu tipau mkülo azükucho eno anixoxo lo azü akeqo ye tsüghükhüi monani; tipaqo ye amti khuki shi qhive nani. 12Aghoki xüsa hikukuu eno hukukuu achuqupu shi penike asübo jeli thuipeghi nani. Tipaqo nipa ye ighüivemo momu athi pithi-ixivemo nani, ikemu aqhi atsütsü axathi anileshi pithi nani, kughengu tipaqo ghenguno akimtheki lono azü qoighi nani. Tipaqo xathi no achuqupu shi nani, eno anipaqo no shikipivi ghenguno peitha nani.”
Ayeghi Kokütha
13 Ampeu Alhou no ishi piani: “Hipau ye alughi eno hipau vecheo Israel shiaye chighikini dolo ayeghi kotha nani. Joseph no asaje kini ithulu nani. 14I no kiu o puasüqo tsünike tushoqhi keno ti ye nongu dolo aqhemi shi kije nani. Ayeghi hipau ye nongu ghenguno amheghi shi nani.
15“Ayeghi ghuthu ye hitoi nani: Ahuu no Azüghi Kije, Hethlon la lono Lebo-haath eno Zedad kutolo, 16Berothah, Sibraim (Damascus eno Hamath lughi dolo akeu) lono Hazer-hitticon, khikhi Hauran lughi lo ani keno tipau kutolo. 17Ikehu alughi ye azüghi lono Hazer-enam kutolo, ti ye ahuu Damascus lughi lo ani, tipau lughi ye ahuu Hamath kutolo. Hi no ahuu küdau lughi.
18“Kipelau no Hauran lono Damascus kuto; Jordan züsü Gilead ngo Israel yeghi do; kipelau Tamar qha kutolo. Hi no kipelau lughi.
19“Apeu no Tamar lono Meribah-kadesh züpuki kuto, tishino Egypt Ghokiti lono Azüghi Kije kuto. Hi no apeu lughi.
20“Kulolau no Azüghi Kije no alughi shinani eno Lebo-hamath ghüngü kutolo shinani. Hi no kulolau lughi.
21“Ikehu nongu no Israel shiaye kiqi lono ayeghi hipau kijeni. 22Nongu dolo eno inaghami nongu gholo auve no atianuli shive kemi sasü amheghi shi kijetha tsülo. Panongu ye Israelmi tianuli aghakütsami kiqi lono kihini, eno nongu Israel shiaye gholono amheghi kothape tsüni. 23Inaghami no khuno shiaye gholo xüni keno, nongu no tilehi pa sala amheghi kije tsüni ipi Ampeu Alhou no asheshu.
Currently Selected:
EZEKIEL 47: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
