EZEKIEL 46
46
Kükapuu eno Tiqhetiniqo
1“Ampeu Alhou no ishi piani: Akikhala alou khagho kipelau akeu ye atsala tsügho khape qhini, ikemu Sabbath tsalani ye khaqhini, eno aqhi akithe ipeghike tsalani ti ye khaqhini. 2Kükapuu no khagho lo achebo alou akeu lono iloghini, eno khagho tsükucho lo ngoni. Achinemi no paw akipti kümllagho eno külakishi kümllagho pesü tsüni eno khagho lashe lono mllani. Tishino pa ye ipeveni, ikemu khagho ye avela kutolo khamo no qhini. 3Nongu yeghi lo timiqo ye Sabbath eno aqhi kithe lo khagho ikulo lo Ampeu zülo pishiqhoni. 4Kükapuu no Sabbath tsala lo Ampeu lau akipti kümllagho mllani keu ye tukutiye kühakeu mbe tsügho eno ambetsü lakhi. 5Ambetsü gholono athi kümllagho ye ephah lakhi shini, eno ambeqo gholono athi kümllagho ye pa no tsükulupu qhemi shini, ti ye ephah lakhikhi lo thazü ahu küthü shini. 6Aqhi kithe tsalani pa no tukutiye kühakeu mishitsü lakhi, ambe tsügho, eno ambetsü lakhi tsüni. 7Athi kümllagho ye amshitsü gholono ephah lakhi, ambetsü gholono ephah lakhi, eno ambeqo gholo pa no tsükulupu qhemi, tipau gholono ephah lakhikhi lo thazü ahu küthüthü ishi kutoni. 8Kughou kükapuu no iloghini keno, pa ye khagho lo achebo küdau no iloghini, eno tipau züsü ipeveni.
9“Tiqhetini tsalaqo lo no yeghi lo timiqo no Ampeu zülo iloghi kelo khuu no ahuu khagho lono iloghini keno pa ye apeu khagho lono ipeveni, eno khuu no apeu khagho lono iloghini keno pa ye ahuu khagho lono ipeveni: khumu pa no iloghi keu la züsü ipe moni, ikemu kümtsü no vejoi azüuno ipeveni. 10Kughou panongu no iloghini keno, kükapuu ye panoqo gholono iloghini, eno kughou panongu no ipeveni keno, pa ghi ipeveni.
11“Aghulhu eno tiqhetiniqo lo athi kümllagho ye amshitsü gholo ephah lakhi, ambetsü gholo ghi ephah lakhi, eno ambeqo gholo tsükulupu qhemi tsüni, tipa gholo ephah lakhi lo thazü ahu küthü. 12Akipti kümllagho na külakishi kümllagho namu kughou kükapuu no pulokini kümllagho Ampeu tsüni keno, pa ghenguno kipela khagho khaqhi tsüni. Sabbath tsala lo tsü cheke toi pa no akipti kümllagho momu külakishi kümllagho ikhiphe tsüni. Tishino pa ye ipeveni, eno pa no ipeve kethiu khagho ye khaveni.
13“Tsalakipetsü nongu ye ampe lakhi mbe lakhi akipti kümllagho shi Ampeu lau tsüni; inaqhe atsütsü nongu ye tipau tsüni. 14Inaqhe atsütsü nongu ye athi kümllagho ahu kini eno ashomkhu kunu kepu thazü ahu lakhi süküqha no akümllagho shini. Hi ye alholo ghenguno akhuaye lakhi ke. 15Ikehu inaqhe atsütsü tamono akipti kümllagho shikepu ghenguno ambe ngo achuqupu kümllagho eno thazü ishi tsülo.
16“Ampeu Alhou no ishi piani: Tsala kükapuu no pa nuli dolo khukhumu amheghi tsü aye, ti ye pa nuli sala shive nani. Ti ye panoqo no amheghi shi ighi luvae. 17Ikemu pa mheghi lono pa no agho lakhi shi pa qemi tsü aye, ti ye khaqhikiphe mpe kutolo paw ake. Tithiu ti ye kükapuu lau tsüchileve nani; mtsüqheino ti ye pa mheghi ke, ti ye pa nuli mheghi ke. 18Kükapuu ye timiqo mheghi kiumu lumoni, panoqo mheghi lono pano kopheve moni. Pa ye pa mheghi lono pa nuliqo saje tsüni, tishikeu lono Iw timiqo ye pano mheghi lono apanaghave monani.”
Akümllagho Bekülhü ke-a
19Tithiu pa no khagho phelo akulaghi achinemi ghenguno akimthe chebo ajo ajoshi ahuu akeqo-a lo I saighi, eno julo, kulolau ashekhau-a I piye. 20Pa no I vilo pi: “Achinemi no akipimi kümllagho eno axine kümllagho bekülhü kepu-a ye hike, eno tilehi no panongu no athi kümllagho pügha nani, tishikeu lono tipaqo pesü khalau kikhala lo peipe pemo niye ke eno tishianguno akimthepu ye timiqo lau iku pemo niye ke.”
21Tithiu pa no khalau kikhala lo I saipe eno akikhala ako bidi lo I sawu. Eno julo, ako lakhikhi lo akikhala kütau lakhikhi aghi, 22ako bidi lo akikhala aghulo, akushulau auxakuchho 20 eno akijelau auxakuchho 15 ae, ako bidi ye akije akushulau aqhemi. 23Akikhala alou lakhikhi lo atu no aye shisü keu ajo ajoshi qhipüa, eno aqhou amiphoki no ajo ajoshi vehope mlapüae. 24Tileno pa no I vilo pi, “Hipaqo ye achineki lo hukuthumi no timi ghakishiqo lho chekeu-a ke.”
Currently Selected:
EZEKIEL 46: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
