EZEKIEL 22

Israel Ji Pele

1 Ampeu tsa I lau ighi no pi, 2“No, timi nu, no ye küghathabeni ma, no ye aji pele keu mishighüna shou küghathabeni ma? Liw aphikümqhüpu kümtsü li vilo sheshu lo. 3No ye ishi pilo, Ampeu Alhou no ishi piani: Mishighüna no aji pele, eno asü-atu julhoqo mla no li ampi shikitiqe kehu li tüqhüdo ye ighivae! 4Nongu no aji pele keu vecheo akipimi shivae, eno asü-atu julhoqo mla keu no nongu shikitiqevae, nongu no nongu tsala kupunu saghivae, nongu mpe kihitha püakeu do ye ighivae. Tighenguno I no nongu pesü shiyeqo lau küthaküghapu eno aghakhu kümtsü zülo jukünatha kepu shive tsüae. 5Nongu kupunu akemi eno nongu launo putosü akemi no nongu thaigha nani; nongu je ye shikitiqevae; nongu ye mbumghu keu no chhitoivae.

6“Israel sakiphemi nongu gholo akeqo julo, lakhikhi no pütüta küka kiqi lono tamono aji pele ani. 7Apu ngo aza noqo ye nongu no küthaküghapu shi peitha ani; kichiqhi süxachu keu lono kupokichemi no ime ani; eno nongu gholo mighimi ngo chimemi peitha püsa ani. 8Nongu ye Iw akimthe thimeqo thaigha eno Iw Sabbath shipixivae. 9Nongu dolo aji peleni ye akimki tsa pikemi ani, eno naghutoqo shou iku no chusho chekemi ani; panongu no kipti-toti dolo mithekumo shie. 10Nongu dolo kiptimiqo no panoqo papu phimini lhaphe tsü; khami no totimi no aji woake ghuloki lono anguka shi sazüe. 11Khami no pa kisüghüu nipu sasü aphikümqhüpu shi; khami no pa mukishiu shipütha; khami no pa chepu sasü anguka lono sazüke. 12Nongu dolo panongu no aji peleni ye külügho luke; nongu no akighishe eno ala lue, eno akisüghüu launo kichiqhi süxachu keu lono ala shilue; ikemu nongu no I kümsümave kepi Ampeu Alhou no asheshu.

13“Julo, nongu no amikucho kumo lono ala shilu keu eno nongu gholo aji pele keu lono I no I u be nani. 14I no nongu peithani ke tsalani nongu ye amlo mtolu nani keshea momu nongu u ye mtolu nani keshea? Ni Ampeu no piqhivae, eno I no tishi nani. 15I no shiyeqo gholo nongu kutholeve nani eno aghakhuqo lo nongu hale puwuve nani, eno I no nongu mithekumo kishekhave tsü nani. 16Shiyeqo zülo nongu ye no kümlaqo vecheo shikitiqeve nani, eno Ni ye Ampeu kepi nongu no ithi nani.”

17 Ampeu tsa I lau ighi: 18“Timi nu, Israel laghami ye I zülo abaghu shivae; panoqo ye kümtsü ayi kiyiqibo miküqü lo alazayi, tinyi, ayi eno aküsayi toivae; panongu ye ghükayi baghu shivae. 19Tighenguno Ampeu Alhou no ishi piani: Nongu no abaghu shive ake ghenguno julo, I no Jerusalem lono nongu hekütsü luve nani. 20Milakhi no ghükayi, alazayi, ayi, aküsayi, eno tinyi pesü ayi kiyiqi miküqü lo xukumqo no ami lono tipaqo piti niye fuake toi I mlokighide eno I loghu lono I no nongu xukütsü nani, eno I no tile nongu vesüve no pitive nani. 21I no nongu xukütsü nani eno I loghu miküqü nongu shou puku nani, nongu ye tipau lono pitive nani. 22Ayi kiyiqi miküqü lono ghükayi pitive ketoi, nongu ye tipau lono pitive nani, eno Ni ye Ampeu kepi nongu no ithi nani; I no I loghu nongu shou lepuku nani.”

23 Ampeu tsa I lau ighi: 24“Timi nu, li vilo pilo, No ye aloghu tsala lo mithemo keu momu tsüghumo keu yeghi ke. 25Liw tungkupmiw pishikiqhi ye abongshuu no lhoxü tsüqhipe ighamku aketoi; panongu no timi küxü tsüchuvae; panongu no küakini eno akughupu thimeqo luvae; panongu no pano yeghi lo chimemi kutomo shive tsüae. 26Li chinemi no I yezah shou ngukangugha shivae eno Iw akimthe thimeqo shikitiqevae. Panongu no akimthe ngo balha dolo kishe kütüta shimoe, momu mithekumo ngo akimthe dolo kiyeqü keu shika tsümoe, eno Iw Sabbath gihu tsümoe, ikehu panongu gholo Ni shikitiqevae. 27Liw yepemi no atine no lhoxü tsüchu aketoi aji pele, aküxü kütsa no achipikumo lono ala shiniye shie. 28Liw tungkupmi no panoqo ghenguno metsüghoi keu no nuda ketoi nudave tsüno kichile kungunhetsü ithulu eno akimki saqhi tsüno Ampeu no piqhimo keghi, ‘Ampeu Alhou no ishi piani,’ ipike. 29Ayeghi hipau lo timiqo no kichiqhi süxachu eno pükake. Panongu no kumlhomi eno akukuphu avehupu shi akemi qodaqhi, eno achipiu shitsü mono kupokichemi kichi kümsa eno süxachu ke. 30Khuu no putukha keu tupikiye shiqhe puku eno ayeghi ileqive keu lo I zülo puthugholu nani keno I no phuju, tishianguno tipau kütsa moni ye ke, ikemu Ni ye khumu phumlae. 31Tighenguno I no I loghu panoqo shou lepuku ke. I no I loghu miküqü pesü panoqo pitive. I no panoqo laghi pesü pano kütsü lo lepuku tsü kepi Ampeu Alhou no sheshu.”

Currently Selected:

EZEKIEL 22: SUMRVBSI

Highlight

Copy