EZEKIEL 23

Oholah ngo Oholibah

1 Ampeu tsa I lau ighi: 2Timi nu, aza lakhi nga totimi kini ache. 3Pama ye Egypt lo kütüqha che; pama ye alhothe lono kütüqha che; pama kichhi tsüqü tsüche eno athathe kichhi pemghave tsüe. 4Akichiu je ye Oholah eno li tsünipu je no Oholibah. Pama ye Iw shive eno pama no apu-angaqo punue. Pama je ye ishi, Oholah no Samaria, eno Oholibah no Jerusalem.

5“Oholah no Iw shi apülaghi kütüqhae, eno li lojipumi Assyriami, aghütomi mine, 6hughaike phi pepu kemi, angh ngo zatsümi, panoqo kümtsü apulhothe ajukivimi, khurshi shou iku iqa no khurkulu sache kemi. 7Li no panoqo sasü kütüqha, panongu ye kümtsü Assyriami kishekiphemi ke, eno li no khunoqo sasü ghaghu shi cheni keno panoqo sü-atu julho pesü li shikitiqe ke. 8Li ye asalha khikhi li no Egypt lono huthu keno ti phevemoe; kughengu li lhothe lono apulhothemi no li shou iku eno li thathe kichhi pemgha no panoqow kütüqha keu pesü li shou lepuku ke. 9Tighenguno, I no li lojipumi Assyriami khunoqo li sasü ghaghu shi akeno panoqo u lo li phesüve tsüae. 10Hipaqo no li phimpi lhapheve tsüe; panongu no li pu-angaqo küghaluve; eno panongu no azütakikihi pesü li ghiqhive; kughou küghakütha li shou bekeno li ye totimiqo zülo küghakiche lakhi shive.

11“Li tsünipu Oholibah no hipau ithulu, li ye li ghaghughale ngo kütüqha keu lo li pafo nguno alau alhoksa shive, ti ye li pafo nguno alhoksau shive ke. 12Li ye Assyriami, anghqo ngo zatsümi, ghüshimi aghü nanu chhitoi pepu akemi, khurshi shou iku iqa no khurkulu sache kemi, apulhothe ajukivimi pape ghaghu shike. 13I no li ye kitiqeve keu ithulu; pama gha alaghi aphiphi lo pülake. 14Ikemu li no liw kütüqha keu alau shive. Putukha keu tupikiye lo li no timiqo jutho ithulu, ti ye Chaldeami julhoqo huchuyi keu pesü ajutho shisü keu, 15panoqo polo apokha tsüghapu, akütsü lo akütsü küküzüphi chijeboi pepu no kümtsü hiyampemi mihie, Babylonmi khuno ghakhu Chaldea keno pano mihike. 16Kughou li no panoqo ithulu keno, li no panoqo pape ghaghu shino Chaldea lo panoqo lau atsapemi puwu. 17Babylonmi no kikivi keu lüpa lo li lau ighi no panow ghaghughale pesü li shikitiqeve. Panoqo no li shikitiqeve kethiu, li ye inhilai panoqo launo tsüghüve. 18Kughou li no li salha pekiphe shi eno aphikümsa pephe piye keno, I no aphimqhü qhiyi li pafo launo tsüghüve ketoi, Ni ye li launo aphimqhü qhiyi tsüghüve. 19Ikeghi li no li lhothe tsala lo Egypt yeghi lo kütüqha chekeu kümsülu ghi alau kütüqhauve, 20tilau li no alojipumi sasü ghaghu shi ache. Panoqo phighü ye khurhaqow toi, eno aphizü ipeghi keu no khurshiw toike. 21Ikehu kughou Egyptmi no o kichhi pemgha eno o lhothe kichhi tsüqü tsü keno no ye o lhothe lo kipti-toti dolo akimthe kumo kümla shikeu khelho ke.”

22Tighenguno, O Oholibah, Ampeu Alhou no ishi piani: “Julo, nono o lojipumi khunoqo launo inhilai tsüghüve keno I no panoqo xukutho nani eno ako kümtsü lono o lachile penike panoqo saighi nani: 23Babylonmi eno Chaldeami, Pekod, Shoa, Koa, eno Assyriami kümtsü gholono apumi ajukivi, angh, zatsümi, hiyampemi, akighichemi, khurshi küsami kümtsü saighi nani. 24Eno panongu no ahuu no khurkulu ngo akhokupu tuhakulu, eno timi aqokitikhi ishi o mjochile ighi nani. Panongu no azüto kije kitila, eno akütsükuqho xapusü ako kümtsü lono o shou aghili kutope khe nani; eno I no küghakütha panoqo shou qhivetsü nani, panongu no panoqow küghakütha kiqi lono o shou küghatha nani. 25I no I mlo kishikumo o shou puku nani, tishikeu lono panoqo no aloghu lono o peitha nani. Panongu no o nigipe eno o kini ghithave tsü nani, eno nongu ghülu kemi ye ghüyi lono wove nani. Panongu no o pu-angaqo küghaluve nani, eno nongu ghülu kemi ye ami lono pitiqhive nani. 26Panongu no o phimini ghi xaleve tsü no ow jukivi chiku-chila ghi pewuve nani. 27Ghaghughale eno kütüqha keu khikhi Egypt yeghi lono huthu keno I no ti kishekhave tsü nani, tishikeu lono no ye panoqo lau o nhethi jupuku move momu Egypt kümsü kithe move nani.

28“Kughengu Ampeu Alhou no ishi piani: Julo, nono khunoqo mithi cheni eno khunoqo launo inhilai shi tsüghüve keno I no panoqo u lo no phesüve nani, 29panongu no akimthipu shi o peitha nani eno nono aghimeshi mlaitha keu xathi pewuve nani, eno aphimini pepipe mono aphikümsa o qhive nani, nono kütüqha keu phikümsa shi akeu ye lhapheve tsü nani. O salha eno kütüqha keu 30huno o shou hi süghivae, kughengu nono shiyeqo sasü kütüqha eno asü-atu julho pesü o shikitiqeve ke. 31No ye o fo laghi lo wuvae; tighenguno I no li jukhu pesü o u lo süvetsü nani. 32Ampeu Alhou no ishi piani:

“No ye o fo jukhu lono sho nani

ti ye kije eno thonhei;

o junuqhi nani eno cheqhi nani,

kughengu ti ye chhitoi ani;

33no ye shokümzü ngo amloksa likhi nani.

Akümsapu ngo kütsakungo jukhu,

o fo Samaria jukhu ke;

34nono ti qhoi tayeve nani,

eno ajukhu tsapho no atachu

pesü o kichhi ghale nani;

kughengu I no piqhivae, Ampeu Alhou no asheshu. 35Tighenguno Ampeu Alhou no ishi piani: Nono I kümsümave eno I pesü o thiu qhiveke ghenguno no ampi no o salha ngo kütüqha keu shekichile xapu masa nani.”

36 Ampeu no I vilo pi: “Timi nu, no ye Oholah ngo Oholibah pama shou küghathabeni kema? Pama vilo pamaw aphikümqhüpu sheshu lo. 37Kughengu pama ye shupuvae, eno pama u lo aji hedape ani. Pamaw asü-atu julho sasü shupuvae, eno pama ye anuli khunoqo pama no punu keno tipaqo pesü achuqupu shi asü-atu julhoqo mllavae. 38Tinguno alau, pama ye I lau hipau shivae: pama ye atsala lakhi lono I kimthe chineki shipixi eno Iw Sabbath shikitiqevae. 39Kughengu kughou pama no asü-atu julho lau pama nuliqo akümllagho shi ghiqhive keno, tipau tsalani no pama no I kimthe chineki shikitiqe niye tile ighike. Eno julo, pama no I kilo shikeu ye hipau ke. 40Pama no putou ghi atsapemi puwu no timiqo kusaghipe; eno panongu no ighi. Panoqo ghenguno nokujo no azü kuchhuve, anhethi lo nudapuve, eno chiku-chilaqo xapuke. 41Nokujo no amekusho lakhü lo iqae, tipau zülo aghulhu lüpa qhi eno tipau shou Iw axokütsüngü ngo Iw thazü ghope qhike. 42Ghuthoghüzai kemi sütsa chilu ae, eno asayeqha lono shokümzümi saghi; panongu no totimiqo u lo asapu sütsü eno jukivi kütsüqho pipeke.

43“Tithiu asalha lono süqo sünheve keu li vilo I no pi, Itehi li ye kütüqhalimi shi panongu no peitha nani! 44Kughengu kiptimi no kütüqhalimi lakhi lau wuche ketoi panongu no li lau wuvae. Panongu no Oholah ngo Oholibah, ghaghulimi lau wuke. 45Ikemu amikuchomi no shupu-salha kemi eno totimi aji pele kemi lau küghakütha shikeu pesü panoqo lau küghatha nani, kughengu pama ye shupu-salha chekemi eno pama u lo aji hedape ani.”

46Kughengu Ampeu Alhou no ishi piani: “Pama lachile kepushi aqokitikhi saghilo eno pama shithüghüi no pükaqhi pelo. 47Aqokitikhi no atu pesü pama veqhi nani eno panoqo zütakikihi pesü pama ghiqhive nani. Panongu no pama pu-angaqo ghiqhive nani eno pama kiqo pitive tsü nani. 48Tishino I no ayeghi hipau lono ashupu asalha kishekhave tsü nani, tishikeu lono totimi kümtsü ghutu luno nokujo toi shupu-salha move nani. 49Panongu no nokujo salha pesü nokujo shou lepuku tsü nani, eno nokujo no asü-atu julho xine makho xapu nani, eno Ni ye Ampeu kepi nongu no ithi nani.”

Currently Selected:

EZEKIEL 23: SUMRVBSI

Highlight

Copy