EZEKIEL 21

Ampeu Zütakikihi

1 Ampeu tsa I lau ighi: 2“Timi nu, Jerusalem küdau o gi kughopuwo no akimthe-a lachile ghi kütsüshika lo. Israel yeghi lachile ghi tungkuptsa pilo 3eno Israel yeghi vilo pilo, Ampeu no ishi piani: Julo, Ni ye nongu lachile ani eno asükhi lono I zütakikihi süjove no amikuchomi na kixikilami namu ghiqhive nani. 4I no nongu launo amikuchomi na kixikilami namu pithiveni ke ghenguno apeu lono iqho ahuu kutolo timi kümtsü lachileni ke asükhi lono I zütakikihi süjo nani. 5Eno timi kümtsü no Ni ye Ampeu kepi ithi nani. I no asükhi lono I zütakikihi süjo luvae; tipau ye ikhisü kithemo nani.

6“O ghengu ye, timi nu, mloqa lo; amlo hepho eno kukhukimji küqa shilo, panoqo nhethe lono mloqa lo. 7Kughou panongu no o vilo, ‘Kushiye no ye mloqa ani kea?’ ipi aye pilo, ‘Sütsasüli ighini ye akeu ghenguno ke. Timi kümtsü mlo hauve nani, eno kümtsü u khokhoive nani; kümtsü ghungu aphi ije move nani, eno kümtsü khonhe no azü toi qeive nani. Julo, ti huye chenie, eno shikupu nani.’” Ampeu Alhou no asheshu.

8 Ampeu tsa I lau ighi: 9Timi nu, tungkuptsa panoqo vilo pilo, Ampeu no ishi piani, ipilo:

“Azütakikihi, azütakikihi ye tsüghaminhei chighivae

eno ilomphuivae,

10ghiqhi nike ghenguno tsüghaminhei chighivae,

tsütsüküsü kulopha aketoi ilomphuivae!

(Ikeo ningu ye alovini kea? I nu, nono asü ngo ayi kümtsü qhoi milive ke.) 11Ikehu azütakikihi ye ilomphui peniye tsüvae, tishikeu lono tipau ye au no tsüqülu peniye ke. Ti ye ghikiqhimi u lo süve tsüni ye tsüghaminhei eno ilomphui chighivae. 12Igha qalo eno mlolo, timi nu, kughengu ti ye Iw timi lachile akeu ke. Tipau ye Israel lo yepemi kümtsü lachile akeu ke. Panongu ye Iw timiqo gholono azütakikihi lo ikhiphe tsüvae. Tighenguno, nongu lukobo kukhulo. 13Kughengu ti ye peju akeu kumo nani, tsala nongu no aküsü jukünatha aye tipau ye kiu shiluni kea?” ipi Ampeu Alhou no asheshu.

14“Timi nu, no ye tungkuptsa pilo. O u kukhu lo eno azütakikihi pelo ghuthu kini, iyei, ghuthu küthü ghi pelo, ti ye khunoqo pithive kepu shi ani keno panoqo ghenguno azütakikihi ke. Ti ye shishe ghiqhi wonike ghenguno azütakikihi ke, ti ye panoqo homxape ani, 15tishikeu lono panoqo mlo ye hauve peni eno kutomo no küpxalu nani. Panow khagho kümtsü lo azütakikihi phuphuike püani. Ya, ti ye tsütsüpha toi mlavae, ti ye ghiqhini ke ghenguno ikhiqhe luvae. 16Ajeu mtsümishei ghisülo; o gi no khilekhile jupuwo namu piyiu ghope ngolo. 17Ni ghi I u kukhu nani, eno I no I loghu ghapiqilu nani; Ni Ampeu no piqhivae.”

18 Ampeu tsa itaghi I lau ighi: 19Timi nu, Babylon kükau zütakikihi ighini ye akeu ghenguno alaghi kini amichi shilo. Tiküma kinikujo ayeghi aphiphi lono ighi nani. Eno amchipu lakhi mlape mishighüna laghila lo qhilo. 20Ammonmiw Rabbah eno Judah lo aliwo putukhasü keu Jerusalem lo azütakikihi ighini ye akeu ghenguno alaghi amichi shilo. 21Kughengu Babylon kükau ye alaghi kini shoküba keu lo asaqhini ye puthugho ani. Pa ye apiji tsükighide anie; pa ye ajulho pesü asaqhi ani; pa ye lhoxü loshi ju anie. 22Shoxü ilokepu sübolu ghope qhi, ghiqhini ke ghenguno akichi xükho, ighamkuni ke asütsa süqhe, khagho shoxü ilo kepu sübolu ghope qhi, ayeghi xapuwo amoqhe puku, leluveni ke aqogheqo shiqhe pukuni ke ghenguno pa u ajeu no Jerusalem ghenguno asaqhilue. 23Ikemu panoqo ghenguno ti ye kichile sakiqhi toi ithulu nani. Panongu ye mtütüi no ashoqhi shivae, ikemu pa no panoqo kipimi kümsüchile lupe nani, tishikeu vecheo panongu ye leluve nani.

24“Tighenguno Ampeu Alhou no ishi piani: Nongu no I pelo no kipimi kümsüchile lupe, tishianguno nongu xine ye lhaphe kehu nongu kümla kümtsü lo nongu xine ipeghi ani, nongu no hipau shive ake ghenguno, nongu ye au no küghaluve nani. 25O, mithekumo kixikilau, Israel kükapuu, o ghime ashekhau do, o tsala ye ighivae, 26Ampeu Alhou no ishi piani: O kütsü küküzüphi ikhive eno aküka kütsükuqho xavelo. Kiu thimemu itehi aketoi move nani. Khikhiu no akuchuniu keno süqhelo, eno khikhiu no qhemghai keno sünheqhive lo. 27Ixapinyi, ixapinyi, I no tipau ixapinyive tsü nani. Küghakütha ye milakhi khuuw keno pa no ighi moke kutolo, hipau ghi tishi pemo nani, eno I no tipau pa tsüve nani.

28“Timi nu, no ye tungkuptsa pilo, Ampeu Alhou no Ammonmi ghenguno eno panow küthakügha ghenguno ishi piani pilo; Azütakikihi, azütakikihi ye ghiqhini ke ghenguno süjophevae. Ti ye ghiqhini ke ghenguno ilomphui shipe ani eno tsütsüpha kukulo toi kulo ani, 29panongu no nongu ghenguno kichile kungunhetsü ithulu eno nongu ghenguno akimki saqhi akelo azütakikihi ye shikitiqe kemi kixikilami kuo lo ikughi nani, panoqo ghime ashekhau do, pano tsala ye ighivae. 30Azütakikihi pesü asükhi lo süvelo. Khile no nongu pulhosü keno, nongu hukuthu boqha yeghi lono I no nongu shou küghathabe nani. 31Eno I no I loghu kighide nongu shou lepuku nani; I no I loghu miküqü pesü nongu ghaqhi nani, eno nongu pesü ajiküxümi, kütsakungo keu lo shitsami u lo phesüve tsü nani. 32Nongu ye ami lo süküghüpusü shive nani. Nongu ji no ayeghi lo pele nani. Nongu kümsüchilelu move nani, kughengu Ni Ampeu no piqhivae.”

Currently Selected:

EZEKIEL 21: SUMRVBSI

Highlight

Copy