AMOS 5

Ampeu phuno Xülo

1I no nongu shou akumlo tsa hipau pipuku akeu inilo, O Israel lo küami:

2“Ayiliu Israel ye ithughi

kümlapu shi ikiqivae;

li sünhe puthuni kemi kühano

li yeghi lono li qhivae.”

3Kughengu Ampeu Alhou no ishi piani:

“Israel lo qhethonhe puwu keu

phughi huno aqhe likhive nani,

eno aqhe puwu keu huno

chighi likhive nani.”

4Kughengu Ampeu no Israelmi vilo ishi piani:

“I phulo eno aküxüpu shilulo;

5ikemu Bethel phuwu kevi,

eno Gilgal momu Beersheba lo

wu kevilo; kughengu Gilgal ye

mtsüqhei haphe sawuve nani eno

Bethel ye kiumu kumove nani.”

6 Ampeu phu no aküxüpu shilo,

tikumo aye Pa no ami toi Joseph lagha piti ighive,

eno khumu Bethel ghapinhe mlano qhoi pitive nosae,

7O nongu achipiu tuchighipe kukhukimji sübo toive tsü

eno amikucho pe ayeghi lono nedaqodave tsü chekeqo!

8 # Job 9:9; 38:31 Püghüno süpemi eno Ayenokilimi lhosü keu,

tsüküzü pesü tsüküvü shivetsü,

eno puchou pesü putho shivetsü,

azüghi zü ku püzü ayeghi shou leqhitsü chekeu,

Pa je ye Ampeu ke;

9Pa no akumtomi shou züleno kütsakungo keu puwu,

tishianguno aliwo shou kütsakungo keu ighi cheni.

10Panongu no khagho lo shikithetsü kemi mithi,

eno kuchou tsa pi kemi jukuchhube cheni.

11Kughengu nongu no kumlhomi nedaqoda

eno pa launo athi zame luve chenike ghenguno,

nongu no heküthatu ki shiqhe püaghi namu,

nongu ye tile ngomla nani;

nongu no alo kepushi atsailu chi ani kemu nongu ye

tipaqo tsaiji shomla nani.

12Kughengu no xine ye khije eno

kishi kije keno I no ithi ani—

nongu no achipiu mikuchomi kijipüsa, külügho lu,

eno khagho lo aveküsami juzüve chenie.

13Tighenguno ado titoi kelo alokütsümi ye inaqhoive cheni,

kughengu hi ye alhoksa doke.

14Alhoksa kumono achipiu phulo,

tishi aye nongu ye xülu nani:

eno nongu no piche ketoi Ampeu, aqokitikhi Lhou

no nongu gholo anani.

15Alhoksa mithi eno akivi kimiyelo, khagho lo

achipiu xakütha puthuphelo;

tishi aye Ampeu, aqokitikhi Lhou no Joseph lagha lo

ghükulumi kimiyeqhiyi lunani.

16Tighenguno Ampeu, aqokitikhi Lhou, no ishi piani:

“Aphughi kuchopu mloqa nani,

eno alaghila kümtsü lo, ‘Aha! Aha!’ ipi igha nani.

Panongu no alu kichimi eno akumlo lo aqe kiqemi

kusü püzü mloqape nani,

17atsailu kümtsü lo mloqa nani,

kughengu I no nongu heche wunani,”

ipi Ampeu no pi.

Kuchou-xakütha no Qowu pelo

18Khunono Ampeu tsala laju cheni keno ahasapue!

Kushiye ti kheni kea?

Ti ye aküzü thono aküvü kumoe,

19milakhi no abongshuu launo

poche kelaye ava sholu ketoi,

momu aki lo ilo pa u no atozü bu

kelaye apighi no mighi ketoie.

20 Ampeu tsala ye aküzü thono aküvü kumo eno

vüqai mono züchiyi kekumo?

21Ni ye now tiqhetiniqo mithi eno junishi moe,

eno nongu hukülü hohoqo lo I züküvü kühae.

22Nongu no akipti kümllagho ngo athi kümllagho süghi

namu I no ikhilu tsümo nani;

eno now athakupu lhoxü pesü külakishi kümllagho shikeu

Ni ye tipa shou jupukumo nani.

23Nongu le ghügha tavelo;

Ni ye nongu kighilebo ghügha inimo nani.

24Ikemu kuchou-xakütha no azüghizü toi qowu pelo,

eno achipiu-mikucho no qotamo keu ghoki toi pelo.

25“Nongu ye ampe lhobidi asayeqha lo chekelo I lau aghakishi ngo akümllagho süghi keshea, O Israelmi? 26Nongu ye no kükau Sikkuth ngo no yepu-lhou Kiyyun—nongu u no mlakeu julho ikhiluve nani, 27ikehu I no Damascus nguno hulau nongu hakiphi sawuve nani,” ipi Ampeu khuu je aqokitikhi Lhou keno Pa no piani.

Currently Selected:

AMOS 5: SUMRVBSI

Highlight

Copy