AMOS 6
6
Zion lo Akuchhomami Hasapu
1“Zion lo akuchhoma shi akemi,
eno khunono Samaria naghuto lo ililai ani keno,
shiye dolo ajekipimi atüghümi,
khunoqo lau Israelmi no wu acheni keno ahasapue!
2Calneh lo wuno julo, tilau no
Hamath phughi kuloghi lo wulo;
tishino Philistiamiw Gath lo iqilo.
Nongu ye aghakhu hipaqo nguno akiviu keshea?
Momu pano lughi ye no lughi nguno akuloghiu keshea?
3Nongu no amhekiqi tsala kushuo lo tuha puwuve
eno kütsakungo keu lakhü aphivilo süghive ke.
4“Khunono akühahu lüpa lo zü
eno panow amekusho lakhü lo xachho pesü ngono
ambeloji lono heqhi chu eno amishiki lono amshiti heqhi
chu acheni keno ahaküsapue,
5Nongu no akighilebo gholono akiqi küha keu le phe
eno David toi ale jeli iqüe,
6Nongu no akulhobo lono aji sho eno thazü akiviu pesü
nongu ampi nukishe cheni,
ikemu Joseph kütsave keu ghenguno mloqa moe!
7Tighenguno itehi ye nonguu paghino akughu lo wunani,
eno now tiqhetini ngo aghulhu ghi kishekhave nani.”
8 Ampeu Alhou ampi no tushoqhivae, ipi Ampeu, aqokitikhi Lhou no sheshu:
“Ni ye Jacob qheküza kuchhube
paw sükusho-aqo mithi,
I no aphughi eno tile akemi pesü aghümi tsüve nani.”
9Tsala akibo lakhi lo timi chighi aghi aye, panoqo ye thive nani. 10Eno kughou akithiu limi no akumo nuve no shiqhove tsünike ighini keno, pa no aki lono akumo peipeghi no aki alou lo akeu vilo iniju nani, “O gholo khuana aphi keshea?” Pa no pi nani, “Moe”; tileno pa no pi nani, “Inaqhoive lo! Ningu ye Ampeu je kukepu kumoe.”
11Kughengu julo, Ampeu no azah tsü cheni,
eno aki kuloghi ye hepholeve no kubopinyive nani,
eno aki akulotiu no mukhumuno shive nani.
12Khurshi ye atuqu shou no pocheni keshea?
Amshitsü sasü azüghi hokide cheni keshea?
Ikemu nongu no kuchou-xakütha pesü tüghü shivetsü
eno achipiu-mikucho xathi pesü kukhukimji sübo shivetsüe—
13ti ye nongu Lo-debar#6:13 Lo-debar kiqi ye kiumu kumokeu. lono alokivishi, “Ni kumto lono
ningu ampi no Karnaim#6:13 Karnaim kiqi ye akibo. leluve
ake kumo?” ipi chekeqo noke.
14“Kughengu julo, O Israelmi, nongu mjochileni keu
shiye I no saputhuni,” ipi Ampeu aqokitikhi Lhou no pi;
“eno panongu no Lebo-hamath lono Arabah ghokiti
kutolo nongu qhasü luve nani.”
Currently Selected:
AMOS 6: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
