AMOS 4
4
1“Nongu Bashan mishiqo, khunono Samaria naghuto
lo ani keno, kumlhomi qhasü, aveküsami chunudaqhi,
nongu kimiqo vilo, ‘Nino aji shonike süghilo,’
ipiche keqo, atsa hipau inilo!
2 Ampeu Alhou no Pa kimthe lono tushoqhive ake
julo, akuhoyi no nongu fuluve,
eno akha kümsüpuyi no nongu gholo ashekhau kutolo
fupe wuve kepu tsala huye nongu lau cheni.
3Nongu ye aliwo kighipe lono
müzüchoi azüu sawuve nani;
eno Harmon lo vepheve nani,”
ipi Ampeu no shuphe.
4“Bethel lo ighi no axine shialo;
Gilgal lono axine küghüsü alo;
inaqhe atsütsü nongu ghakishi süghilo eno aküthüni no
nonguw chighi saje süghilo;
5kholaqhi sükeu shikimthikütsü kümllagho pesü tsülo,
eno pulokini kümllagho pesü pikülha asheshulo;
kughengu nongu ye tishikeu alo chenie, O Israelmi!”
ipi Ampeu no asheshu.
Israel ye Ampeu lau Ideighimo
6“Now mishighüna kümtsü lo I no ahu kimthe pesü tsüe,
eno no kungo-a kümtsü lo asho küpüqü tsü keghi
nongu ye I lau ideighi moe,”
ipi Ampeu no pi.
7“Kughou ghile hunike aqhi küthü akeno I no nongu
launo tsütsüghu ghi süchileve;
I no mishighüna lakhi lo tsütsüghu
puwu kemu lakhiu loye puwumo;
alu lakhi loye tsüghuqhi tsü
ikemu alu khile tsüghuqhi mo keno ti ye ighüive;
8ikehu aphughi kini küthü lo küami no azü yenike
aphughi lakhiu lo wu kemu aghapiqi lumoe;
ikeghi nongu ye I lau ideighi moe,”
ipi Ampeu no pi.
9“I no amülhü kushu ngo akughumho pesü nongu tsü;
nongu ghutu eno atsailu kutomo,
now mubuthi eno olive süboqo ye tülhaqu no külhüve;
ikeghi nongu ye I lau ideighi moe,”
ipi Ampeu no pi.
10“Egypt lo toi I no nongu shou püsa puwu no azütakikihi
pesü now lhothemiqo pithive,
eno now khurshi süxape wuve,
nongu ghazü lo akumo kümna pesü nongu nigi lo sütsü;
ikeghi nongu ye I lau ideighi moe,”
ipi Ampeu no pi.
11“Alhou no Sodom ngo Gomorrah kütsave ketoi
I no nongu khami kütsavae,
nongu ye amiphoki lono amsü püxü phelu ketoie;
ikeghi nongu ye I lau ideighi moe,”
ipi Ampeu no pi.
12“Tighenguno I no hitoi nongu lau shini cheni, O Israel;
eno I no nongu lau hi shini cheni kehu o Lhou sasü
kushoni ke kutolo, O Israel!”
13Kughengu julo, naghuto ngo amülhü lhophe keu,
Pa kükümsü timi lau lheqhi keu,
inaqhe pesü aküzü kughulhove,
eno ayeghi kuchuqu lono chewu chekeu, Pa je ye
Ampeu, aqokitikhi Lhou ke!
Currently Selected:
AMOS 4: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
