APOSTOLMI 9

Saul Xükikithe

(Apo 22:6-16; 26:12-18)

1Saul ye Ampeu papemi pithiveni pi shikichi ae, pa no achinetou lau wuno 2Damascus sinagog lo tsüpuwu kepu yesü khu, tishianguno khuana Alaghi laumi, kiptimi na totimi namu, pa no phulu aye küghape Jerusalem lo ighi niye ke. 3Pa no Damascus kupunuve kelo paikhavi atsütsü lono aküvü lakhino pa sümxape yeluve. 4Pa ye ayeghi lo ikiqive eno asütsa lakhino pa vilo pikeu chilue, “Saul, Saul, no ye kushiye I kijipüsa ani kea?” 5Saul no pi, “Ampeu, no ye khuu kea?” “Ni ye Jisü, nono kijipüsa akeu huke. 6Itehi ithu no mishighüna lo ilolo, eno kiu shimasa keno o vilo pini.” 7Saul gholo kichemi no asütsa chilu kemu khumu ithumla no atsa piphemla ngove. 8Saul no ayeghi lono ithughi kelo pa nhethi tsükho akemu kiumu ithumlave. Ikehu panongu no au no pa sünhepe Damascus lo ighi. 9Eno atsala küthü kutolo pa ye kiumu ithumlave, eno chusho move.

10Damascus lo apapemi lakhi Ananias ae. Ampeu no kungunhetsü lono pa vilo pi, “Ananias.” Pa no pi, “Ampeu, ni hi ani.” 11Ampeu no pa vilo pi, “Ithu no Müzüchoi ipi chekeu laghi lo wuno Judas kilo Tarsusmi Saul ipikeu phuwulo, kughengu pa ye akighini shi ani, 12eno pa ye kungunhetsü lono Ananias ipikeu no pa lau ighi no pa nhetsü athoputho tsünike pa shou au betsü keu ithuluvae.” 13Ikemu Ananias no khochile, “Ampeu, timi hipau no Jerusalem lo kishi Ow küpülümi ghime ani keno, ni ye timi kutomo launo chiluvae. 14Eno pa ye O je kuche kemi kümtsü kügha niye achinetomi launo azah khuluvae.” 15Ikemu Ampeu no pi, “Wulo, kughengu pa no I je pesü Jewkumomi ngo kükami eno Israelmi zülo wu penike I no kishevae. 16Pa ye I je ghenguno khijehi ime masa keno I no pa piye nani.” 17Ikehu Ananias no wuno aki lo ilo püzü Saul shou pa u beno pi, “Athiküzüu Saul, nono ala lo chekelo Ampeu Jisü khuu o lau ipeghi keno, pa no o nhetsü athoputho tsüno Aghungu Kimthe pesü o shepichhi penike I puwu ani.” 18Paikhavi no kiukela akoza toike pa nhethi lono ikiqive no pa ye ithulu kitheve. Tileno pa no ithu no baptiz shive; 19eno achuqupu chuno akumto shiluve.

Saul no Damascus lo Sheshu

Atsala hami pa ye Damascus lo akhopemi gholo ae. 20Tithiu pa no mtazü sinagog lono Jisü ghili sheshu, “Pa ye Alhou Nue.” 21Pa tsa chilu kemi kümtsü no akümzave no pi, “Jerusalem lo aje hipau ku aghi kemi thaqhü timi hipau no heqhi cheke kumo? Pa ye tipaqo küghape achinetomi zülo sawuni keu kimji lono hilau ighike kumo keshea?” 22Ikemu Saul ye alau akumto shiuve, eno Damascus lo Jewmi vilo Jisü ye Khristo kepi thebei pi kelo panongu ye pa lamlave.

Saul no Damascus lono Pove

23Atsala kutomo thiu Jewmi no Saul pithive nike kümqü, 24ikemu panongu mqü pa no ithive. Pa pithive nike putho pucho panongu no khagho jukutoa, 25ikemu pa khopemi no putho lono ashoghi lo süno aliwo kighipe lono kighiti piqive.

Saul no Jerusalem lo Wu

26Kughou pa no Jerusalem lo ighi keno, akhopemi gholo kutupo niye shikemu kümtsü no pa msave, kughengu pa ye apapemi shivae pi panongu ye pülümoe. 27Ikemu Barnabas no pa sasü apostolmi lau ighi no panongu vilo kishi ala lo pa no Ampeu ithulu, Ampeu no pa pütsa eno tithiu pa no mtotoi Damascus lo Jisü je lono asheshu keno lhepiye. 28Tishino Saul ye Jerusalem lo panoqo gholo ipe-ilo eno ighümo no Ampeu je lono kütsü thuve. 29Pa no Greek tsa kipimi Jewmi sasü kighe, ikemu panongu no pa heqhive niye pükapütsa ae. 30Kughou athiküzümi no hi ithive keno, panongu no pa sasü Caesarea lo wuno Tarsus lo puwuve.

31Judea, Galilee, eno Samaria qha kümtsü lo akukuhou ye iqüghai keu do sholu eno shikumtolu ae. Ampeu sükümsa lono chewu eno Aghungu Kimthe no shikumto keu vecheo ikowolu.

Aeneas Shikipivi

32Peter no aqha kümtsü lo iqho-iqi chekelo, Lydda lo küpülümi lau ghi ighi. 33Tile timi lakhi Aeneas ipikeu aghi-anhü thive no ampe tache azüa lo ngove keu pa no ithulu. 34Peter no pa vilo pi, “Aeneas, Jisü Khristo no o shipivi ani, ithu o züa liküzüve lo.” Paikhavi pa no ithuve. 35Eno Lydda ngo Sharon lo küami kümtsü no pa ithulu, eno panongu no Ampeu lau ighive.

Dorcas Xüputhu

36Joppa lo akhopemi totimi lakhi Tabitha, pekide kelo Dorcas#9:36 Tabitha no Aramaic je, eno Dorcas no Greek je, kinikujo akiqi ye ashe. ipikeu ae. Li ye akümla kivi eno kumlhomi tsükinimi ke. 37Tipa ghuloki lo li ye süve no thive. Li kumo qhuve no kunguu chebo lo qhipüa. 38Joppa ye Lydda phivilo kehu akhopemi no Peter ye Lydda lo anie pi chilu kelo timi kini puwu no pi, “Kimiyeno munu kevino ni lau ighi tsülo.” 39Peter no ithu pama gholono wuve. Pa no ighi kelo pa sasü kunguu chebo lo iku. Chimemi kümtsü pa phivilo ngono mloqa eno Dorcas no panoqo gholo ache kelo mlakeu phimini pa piye. 40Ikemu Peter no panongu kümtsü khalau pipeve no qhoqhünhe pe inikhu, eno pa no akumo küdau tsüghü ighi no pi, “Tabitha, ithulo.” Li no anhethi tsükho, eno Peter ithulu kelo ithu iqave. 41Pa no pa u lono li sünhe puthuve. Tishino pa no li püxüpe küpülümi ngo chimemi tsüve. 42Hi no Joppa qha kümtsü lo veküpha wove, eno kutomo no Ampeu pülü luve. 43Peter ye Joppa lo ashiyiko kümlau Simon gholo ado kushuo ngove.

Currently Selected:

APOSTOLMI 9: SUMRVBSI

Highlight

Copy