APOSTOLMI 8

Saul no Akukuhou Kijipüsa

1Saul no Stephen pithive keu lo pulo tsüe.

Tipani no Jerusalem lo akukuhou kijiküpsa kije ipeghive. Apostolmi thono küpülümi kümtsü Judea ngo Samaria qhalo apanagha kuhave. 2Alhou ithitoi kemi no Stephen shiqhove eno pa ghenguno shishe mloqae. 3Ikemu Saul no akukuhou kütsa thuve, pa no aki kümtsü lo ilo no küpülümi kiptimi totimi sünhekiti sawo akughuki lo süve.

Philip no Samaria lo Sheshu

4Apanagha wuve keqo no atsa pesü kütsü thuve. 5Philip no Samaria phughi lo wuno Khristo tsape sheshu. 6Kughou aqokitikhi no Philip tsa chilu eno pa no amchipu kümla shikeu ithulu keno, kümtsü no amlo lakhi shino tsaqüi inie. 7Kughengu timi kutomo philo mithekumo ghawu akeqo no aghügha küsashi ighasü ipeghi, aghi-anhü kithimi, eno aphiau kinita kemi shipivi ae. 8Ikehu tipa phughi lo alokivi kije ae.

Küdüu Simon no Pülülu

9Timi lakhi Simon ipikeu tipa phughi lo küdüu shiche eno timiqo shithüghüi no pa ampi pesü kije kepi piche. 10Aghulou lono akiqheu kutolo pa ikhilu no piche, “Timi hipau ye Alhou küka Kije ipi chekeu ani.” 11Pa no ado kushuo lono paw küdüu pesü panoqo shithüghüi chekehu panongu no pa ikhilu che. 12Ikemu kughou Philip no Alhou yekipe tsakiviu eno Jisü Khristo je pesü panongu lau kütsü keno, panongu no pa pülüve, eno kiptimi totimi kümtsü baptiz shive. 13Simon ghi pülüve; eno baptiz shiluve kethiu pa ye Philip gholo chewuve. Eno akümzapu ngo amchipu kümla ithulu no Simon ye akichiqhive.

14Samariami no Alhou tsa ikhiluve keu Jerusalem lo apostolmi no chilu kelo, panongu no Peter ngo John pama puwu. 15Pama no ighi no panongu pelo Aghungu Kimthe ikhilu penike inikhu tsü, 16kughengu panongu ye Ampeu Jisü je lono baptiz likhi shive no akemu tikutolo Aghungu Kimthe ye panongu shou ikughi mono ae. 17Ikehu pama no panongu shou au betsü, eno panongu no Aghungu Kimthe ikhiluve. 18Kughou Simon no apostolmi no au betsü keu vecheo Aghungu tsükeu ithulu keno, pa no pisa pesü pama tsü, 19eno pi, “Hipau küka ni ghi I tsülo, tishianguno I no khuu shou I u bekeno Aghungu Kimthe ikhilu peni.” 20Ikemu Peter no pi, “Ow ghükayi ye o gholono pühave peniu, kughengu no ye pisa pesü Alhouw kümsagho qhülu nanie pi kümsü anie! 21Hipa tsa lo o sala momu o saje kühae, kughengu Alhou zülo o mlo ye achipi kumovae. 22Tighenguno o lhoksa hipau lono xaidelo, eno Ampeu vilo shikulupu shi aye o mlo lo kümsüpu akeu kipimi qhivetsü penike inikhu lo. 23Kughengu no ye khumtsai eno axine kütsügha lo akeu I no ithulu anie.” 24Simon no khochile, “Nono pive keu lakhimu I shou ighi pemoni ke I ghenguno Ampeu vilo inikhu tsülo.”

25Pama no Ampeu tsa pesü ashepe shive kethiu, Jerusalem lo idewo chekelo Samariami phu kutomo lo atsakiviu pesü sheshue.

Philip ngo Ethiopiami Shoko

26Ampeuw kungumi no Philip vilo pi, “Ithu no Jerusalem apeu no Gaza lo wuche keu laghi lo wulo.” Hi ye asayeli ke. 27Pa no wu kelaye tile Ethiopiami lakhi cheghi, pa ye Ethiopiami kükalimi küghaki Kandake lo shoko,#8:27 Greek tsa lo akiqi kini ani, shoko momu kijemi akinibo jukükütsü tou ke. Pa ye Jerusalem lo Alhou mllani ye ighi, 28eno paw khurkulu lo iqa no tungkupu Isaiah kaku phi ghi idewo cheghi. 29Aghungu no Philip vilo pi, “Wuno khurkulu mtsa chewulo.” 30Philip no pa lau ighi kelo pa ye Isaiah tungkupu kaku phi cheghi keu chilu, ikehu pa no iniju, “No ye kiu phi ani keno vethalu anima?” 31Pa no khochile, “Khuana no I kiche tsümoke ni ye kishino vethaluni kea?” Pa no Philip vilo pa gholo iku iqa lopi ku. 32Pa no Kuchoyesü mqo hipau phi cheghi:

“Ambe toi ghikiqhi-a lo pa sawuve

ambe no amhi kughou zülo inaqhoi ketoi,

pa ye pa kichi xükho moe.#Isa 53:7

33Pa thogha kelo kuchou xakütha pa tsümoe.

Khuu no pa lagha ghili pilu nani kea?

Kughengu ayeghi lono pa küxü süwuve tsüke.”

34Shoko huno Philip vilo pi, “Tungkupu ye khuu ghili pi ani kea, pa ghili keo kütami ghili kea?” 35Tileno Philip no Kuchoyesü mqo hipau lono huthusü Jisü tsakiviu kutolo lhepiye. 36Pama no wuche kelo azü ake-a lo ighi, eno shoko huno pi, “Julo, azü hi ani! I no baptiz shinike kiuala no I lakha kepu anio?” 37Philip no pi, “O mlo kuchopu no pülü aghi aye, no ye tishilu nani.” Pa no khochile, “Jisü Khristo ye Alhou Nu kepi I no pülü ani.” 38Khurkulu ngolo pi pa no azah tsü, eno pama azü lo ilo püzü Philip no pa pesü baptiz shivetsü. 39Kughou pama no azü lono ipeghi keno, Ampeu Ghungu no Philip sawuve, eno shoko huye pa ithumlave kemu alokivi shi cheve. 40Philip ye Azotus lo aghive, eno Caesarea tomoke kutolo aphughi pa no hecheke kümtsü lo atsakiviu pesü sheshue.

Currently Selected:

APOSTOLMI 8: SUMRVBSI

Highlight

Copy