APOSTOLMI 7

Stephen Tsapi

1Achinetou no Stephen vilo pi, “Hi ye kuchou keshea?” 2Stephen no pi, “Athiküzümi eno apunoqo, I tsa inilo. Ni sü Abraham no Haran lo xüsü mphi züu Mesopotamia lo akelono, ajuküvü Lhou no pa lau ipeghi, 3eno pa vilo pi, ‘O yeghi eno o laghami qhive no I no o piyeni keu yeghi lo wuvelo.’ 4Ikehu pa no Chaldeami yeghi qhive no Haran lo xüuve. Pa pu thive kethiu, itehi nongu no küghüna akeu yeghi lo Alhou no pa saghive. 5Ikeghi tile apukhu kinepu-a mu pesü pa mheghi shi tsümoe, eno pa no anu küha keghi ayeghi pesü pa eno pa polo kughukomi mheghi shitsüni kepi tushoqhie. 6Alhou no ishi pike, ‘Pa polo kughukomi ye kütami yeghi lo kachenami shinani, tilau ampe 400 kutolo aqüaxe shi kijipüsa nani. 7Ikemu panongu no qeche keu shiye shou I no küghatha nani, eno tithiu panongu no hile ighive no I mlla nani,’ 8Alhou no aphighü yiko puloshoqhi Abraham tsüe. Tithiu Abraham no Isaac ithulu, eno Isaac punuwo atsala akütacheu lono Abraham no aphighü yiko ghavetsü. Isaac launo Jacob ighi, eno Jacob launo apuasü chighikini ighi.

9“Apuasüqo no Joseph ju anheshu püzü Egypt lo pa jepuwuve; ikemu Alhou no pa gholo ae, 10eno pa ghime küsa kümtsü lono xaphelu no Egypt kükau Pharaoh lopu shilu eno alokütsü shilupe. Ikehu Pharaoh no pa pelo Egypt yeghi lo yepeu shipe eno kükaki jukükütsüu shipe. 11Egypt ngo Canaan qha kümtsü lo püqümiye ighive no shishe imeve, eno ni puasüqo ye achuqupu ithumlave.#Bot 41:54,55; 42:5; Lesh 105:16 12Kughou Egypt lo athi ithulu anie pi Jacob no chilu keno, pa no ni sü noqo pesü Egypt lo küghüzü puwu tüghü shie. 13Eno akiniu ghüzü loye Joseph no pa munoqo pelo pa ye khuu keno ithipe, eno Joseph bolomi no Pharaoh sasü kilekithive. 14Joseph no pa pu Jacob ngo pa lagha küqha kelo lhotsüni pungu kümtsü saghipe. 15Jacob no Egypt lo iqive, pa eno ni sünoqo ghi tilano thive, 16eno panongu sükumo ye Shechem lo xapu ighi no Abraham no Hamor nuli vilo ghükayi no qhükeu kumoki lo qhove.

17“Ikemu Alhou no Abraham vilo piqhikeu do kupunuve kelo, Egypt lo ni timi ye alau ikowove. 18Tithiu Joseph mthakeu kükau no Egypt lo ayepe luve. 19Pa no mkamihi ni timi peitha no anguka lono ni sünoqo pelo pano tianuli püxülu pemoni ye peve peke. 20Tipa do lono Moses punu, pa ye Alhou zülo ighono jukivi. Pa ye aqhi küthü kutolo pa puaza ki lono saputhu, 21eno kughou aki lono pa ikhipheve keno, Pharaoh nga ayiliu no pa saluve no li nga toi pa saputhu.#Ipe 2:3-10 22Egyptmi kighithi lokütsü kümtsü pesü pa qoputhu, eno pa ye atsa eno akümla lo minhimghai ipeghive.

23“Kughou pa no apunu mpe lhobidi shi keno, pa thiküzümi Israel nuli xujuni keu pa lolo iloghi. 24Panongu gholo milakhi ghime aghi keu ithulu kelo, pa no pa saphuve no Egyptmi hu heqhive. 25Alhou no pa peitha no pa thiküzümi xaphe akeu panongu ye vethalu nani pi pa ye kümsü ae, ikemu panongu ye vethamlae. 26Tishiwo thoghiu Israelmi kini kichighi aghi keu pa no ithulu no külashi tsüniye pi, ‘O timi, nokujo ye athiküzümi ke, kushiye lakhino lakhi ghime ani kea?’ 27Ikemu pama dolo akumou shi akeu no Moses tuha puwuve no pi, ‘Khuu no o pesü ni yepeu eno xaküthau shive akea? 28Nono ighina Egyptmi heqhive ketoi ni ghi heqhiveni keshea?’ 29Hi chilupe Moses ye Egypt lono pove no Midian yeghi lo acheuve, tilauno pa ye anu kini ithulue.

30“Ampe lhobidi thiu, kungumi no Sinai Toghi phivilo asüminipho lo amiküqü lono pa lau ipeghi. 31Pa no hi ithulupe akichiqhive, eno ti juniye aphivilo wu kelo, Ampeu sütsa chilue: 32‘Ni ye o puasü Abraham, Isaac, eno Jacob Lhou ke.’ Moses ye khokhoshi junike ighüve. 33Ampeu no pi, ‘O pukhu kuqho xavelo, kughengu nono khile puthugho ani keno ti ye akimthe-a ke.#Ipe 3:5; Josh 5:15 34Iw timi Egypt lo akeqo ghime I no mtsüqheino ithuluvae, eno panongu no igha kukuno akeu chiluvae. Ni ye panongu xaphe nike iqighivae. Itehi ighilo, I no Egypt lo o puwuni.’#Ipe 3:7,8

35“Moses hipau, khuu timiqo no, ‘Khuu no o pesü ni yepeu eno xaküthau shive akea?’ ipi kileve keno, kungumi no asüminipho lono pa lau ipeghi keu vecheo Alhou no yepeu eno xaphekuluu shi puwue. 36Timi hipau no Egypt lono timiqo saipe, eno Egypt lo, Akuhu Züghi lo, eno asayeqha lo ampe lhobidi piqi akümzapu eno amchipu mlae. 37Moses hipau no Israelmi vilo pike, ‘Alhou no nongu ghenguno no thiküzümi dolo tungkupu I toikeu ipeghipe nani.’ 38Pa ye asayeqha lo aqoaho gholo ae, Sinai Toghi lo kungumi sasü küptsa eno ni puasüqo pütsa keu huye pa ke. Pa no ni tsüniye aküxüpu tsape ikhilue. 39Ni puasüqo no pa gholuni ke pulomo no pa kopheve, eno pano mlo ye Egypt lou idewove. 40Eno Aaron vilo pi, ‘Ni züu chewu kepu lhou ni sala mla tsülo. Moses khuu Egypt lono ni saipeghi keno pa ye kishive akeno ningu ye mthavae.’ 41Panongu no amshiti mlano ti ajulho lau akümllagho tsü, eno pano u lo kümla jupe alokivi shie. 42Ikemu Alhou no panongu launo tsüghüve eno tungkupmi kaku lo ishi yepüa ketoi panoqo pelo atsütsü lo yepu-yesü mlla penike tsüve:

“‘O Israelmi, ampe lhobidi asayeqha lo chekelo,

nongu ye lhoxü eno aghakishi pesü I lau ighi keshea?

43Nongu no Molekh phiki eno

no lhou Rephan yepu julho

hipaqo mlla niye mla ke;

ikehu Babylon nguno hulau I no nongu haphe puwuve nani.’#Am 5:25-27

44“Asayeqha lo ni puasüqo ye Ampeu phiki ache, ti ye Alhou no Moses vilo mla lopi azah tsükeu, eno aye pa piyekeu kiqi lono ke. 45Tithiu ni puasüqo no Joshua qholono tipau pesü Alhou no panongu zülono hapheve keu shiyeqo yeghi lo iloghi, eno David ghuloki kutolo tishi ache. 46David no Alhou lopu shi, eno Jacob Lhou ghenguno aki mlatsü nike inijue.#2Sa 7:1-16; 1Yek 17:1-14 47Ikemu Solomon no Alhou ki mlatsüe. 48Ikeghi tungkupmi no pike toi Shishe Akiqheu ye timi u no shikeu kilo achemoe,

49“‘Kungugha ye I küghüqa-a,

eno ayeghi no I pukhu kinepu-a ke.#Lesh 11:4; Isa 66:1,2

Nongu ye I sala kiu toike ki shini,

momu I kulhokiqhi-a ye kiu kea? ipi Ampeu no pi.

50I u no hi kümtsü mlake kumo?’

51“Nongu kuthovi keqo, amlo eno akini kilimo kemi, no puasüqo toi nongu ye alhokuthu Aghungu Kimthe mjochile cheni. 52No puasü no kijipüsa mokeu tungkupmi khunoqo ani kea? Amikuchou chenie pi azünatha pitsü kemi panongu no pithive. Eno ishi ye nongu no pa thechuve no heqhive, 53ti ye nongu, kungumi launo ayezah ikhilu kemu pemove keqo huke”

Atu pesü Stephen Veqhive

54Kughou panongu no hi chilu keno, panongu ye axuideve no pa jupe ahu tsüghü. 55Ikemu pa ye Aghungu Kimthe no chhitoipe atsütsü lo jupuku no Alhou juküvü ithulu, eno Alhou u ajeu Jisü puthugho akeu ithulue. 56Pa no pi, “Julo, atsütsü khaqhi no Alhou u ajeu Timi Nu puthugho akeu I no ithulu ani.” 57Ikemu panongu no ighamku no au pesü pano kini kiyikha luve no qhai kohasü pa lau ighi. 58Eno aphughi khalau pa sünhephe no atu pesü veqhi pithive. Tishino thopimi no pano phi xape apumi lakhi Saul ipikeu pukhu philo qhitsü. 59Panongu no atu pesü Stephen veqhi akelo, Stephen no pi, “Ampeu, I ghungu ikhilu tsülo.” 60Pa no qhoqhünhe pesü asütsa kuloghi lono ighamku, “Ampeu, hipau xine panongu shou betsü kevilo.” Hi pive no pa ye zühuve.

Currently Selected:

APOSTOLMI 7: SUMRVBSI

Highlight

Copy