APOSTOLMI 6

Akukuphumi Tsüni Kishelu

1Tipa ghuloki lo apapemi alau ikowove kehu Greek tsa kipimi Jewmi no Hebrewmi shou muchho ipeghive kughengu tsalakipe chuqupu kikije lo panow chimemi kughuchove ake. 2Apostolmi chighikini no apapemi kümtsü kukütsü no pi, “Ningu ye aghulhu lüpa lo loji niye Alhou tsa shekushu kughuchove keu ye achipi kumoe. 3Tighenguno athiküzümiqo,#6:3 eno achelimiqo nongu gholo timi tsüni khunoqo ajuaje kivi ani eno Aghungu ngo alokütsü no chhitoi ani keno kishephe lo, nino panongu pesü hipau kümla lo süsüni. 4Eno ningu ye akighini eno atsa shekushu kümla lo ado tsüveni.” 5Panongu no pikeu no aqomi kümtsü lopiqi luve, eno panongu no hipaqo kishelu: Stephen, aküpülü ngo Aghungu Kimthe no chhitoi kemi, Philip, Prochorus, Nicanor, Timon, Parmenas, eno Antiochmi Jewmi chineye lono ighikeu Nicolaus. 6Timi hipaqo apostolmi zülo saghi, eno panongu no panoqo shou au beno inikhu tsü.

7Alhou tsa alaushi ikowove, Jerusalem lo akhopemi kikihi shishe küghüsüve, eno achinemi kutomo no aküpülü khuaye ikhiluve.

Stephen Küghaluve

8Stephen ye küpükini eno aküka no chhitoi akehu akümzapu eno amchipu kümla timiqo gholo shiae. 9Tile timi khami Kuqhopheve kemiw Sinagog (aje ishi piche) lo kihimpemi, Cyrenemi, Alexandriami, Cilicia eno Asiami, no Stephen sasü kütsala thuve. 10Ikemu panongu ye Stephen no alokütsü eno Aghungu lono pikeu ghechile mlave. 11Ikehu panongu no timi khami chuxu no ishi pipe, “Pa no Moses ngo Alhou thaigha keu tsa pikeu nino chiluvae.” 12Panongu no timiqo, layemi, eno Ayezah shikükami xukutho sasü Stephen lau ighi no pa tsüqü luve, eno hoho zülo sawuve. 13Panongu no kichile thopimi saghi no ishi pipe, “Timi hipau ye khilemu akimthe-a hipau ngo Ayezah pipütha tave chemoe, 14kughengu pa no Nazarethmi Jisü hipau no a-a hipau kütsave nani, eno Moses no ni tsükeu khuayeqo kilive tsü nanie pikeu ningu no chiluvae.” 15Hoho mpemi kümtsü no thüghüi pa jukelo pa gi ye kungumi gi toi ithulue.

Currently Selected:

APOSTOLMI 6: SUMRVBSI

Highlight

Copy