APOSTOLMI 5

Ananias ngo Sapphira

1Timi lakhi Ananias eno pa nipu Sapphira pama no amheghi jeve, 2eno pama küptsave no jekulu pisa hami pama no qhiluve no hami likhi süwo apostolmi pukhu lo qhitsü. 3Ikemu Peter no pi, “Ananias, kushiye Aghungu Kimthe pishiqhi niye Satan no o mlo lo iloghive no ayeghi jekulu pisa hami o sala qhiluve kea? 4Ti jemphi lonomu ow ke kumo? Eno jeve kethiu ghi o u lo ae. Imaye, kushiye hikithipu shinike o mlo lo kughuphe kea? No ye timi lau kumono Alhou lau mikivae.” 5Ananias no hi chilu kemtsa iluqi thive, eno ti chilu kemi kümtsü shou akümsa ikughive. 6Apumiqo no pa kumo küzüve no pa khape ipe püzü shiqhove.

7Ayi kihedo küthüa thiu pa nipu ye kiu shive keno mthano ighie. 8Peter no li vilo pi, “I vilo pilo, nokujo no ayeghi jekeu me ye hi keshea?” Li no pi, “Iyei, hijehi no ke.” 9Ikemu Peter no li vilo pi, “Kishino nokujo ye pulo küqhano Ampeu Ghungu peju niye shi kea? Julo, o kimi shiqho wu kemi ahukikha lo ighivae, eno panongu no nou ghi khape ipeve niae.” 10Paikhavi li ye Peter pukhu philo ikiqive no atuthu kishekhave. Apumiqo no iloghi kelo li ye thive aghi, eno panongu no li khapewo li kimi phivilo shiqhove. 11Akukuhomi eno hipa tsa chilu kemi kümtsü shou akümsa kije ikughive.

Amchipu eno Akümzapu Kutomo

12Apostolmi no timiqo gholo amchipu eno akümzapu kümla kutomo mla ae. Panongu kümtsü Solomon kisheqho lono kumqo che. 13Kütami ye panongu gholo kuloji moe, ikemu timiqo no shishe panongu pipivi ae. 14Ghulo kütau nguno alau Ampeu küpülümi kiptimi totimi kikihi kütsasa shive. 15Ikelo timiqo no küsükinimi ghi alaghila lo khape ighi no azüa ngo ayephu lo püzü, tishianguno Peter no ighi kelo pa yekükhü likhimu khami shou ikughilu peniye ke. 16Jerusalem cheaxü lo mishiphuqo lono küsükinimi ngo tüghaküsa no ghimeqhi akeqo saghi, eno panongu kümtsü shikipivi ithulue.

Apostolmi Küghalu no Pheve

17Tile achinetou eno pa gholo akemi (ti ye Sadduceemi loji) kümtsü lolo anhekushu iloghive. 18Panongu no apostolmi küghape akughuki lo süve. 19Ikemu putho lono Ampeuw kungumi no akughuki hukikha khaqhive no panongu saipeghi no pi, 20“Wuno achineki lono Aküxü hipau tsa pesü timiqo vilo pilo.” 21Panongu no hi chilu no tsüthove kemtsa achineki lo ilo no shika thuve.

Achinetou ngo pa gholo akemi no Israelmi layemi hoho kusü, eno apostolmi saghi penike akughuki lo puwu. 22Ikemu kughou kijemi no akughuki lo ighi keno, panongu ye apostolmi phumlave kehu ideighi no pi. 23“Akughuki tsatsai khape püaghi, eno ghukhemi no ahukikha lo puthugho aghikeu ningu no ithulu, ikemu kughou khaqhi iloghi keno, alou khumu aghimoe.” 24Kughou achineki lo atou eno achinetomi no hi chilu keno, panongu no hi ye kiu toikeu süchedo süghive nani kelae pi shishe kütakihive. 25Timi lakhi ighi no panongu vilo pi, “Julo! Nongu no akughu shive keqo ye achineki lono timiqo shika ani.” 26Tileno kepten no ghukhemi sasü wuno apostolmi saghi, ikemu anguka lono kumoe kughengu timiqo no atu pesü panongu veqhike msa ae.

27Panongu no apostolmi saghi no hoho zülo qhi, eno achinetou no panoqo vilo ighiju, 28“Timi hipau je lono kütsü kevilo pi ningu no azah tsü keghi nongu no Jerusalem qha kuchopu kütsü shika ani, eno timi hipau ji pesü ni shou puku tsüniye shi anie.” 29Ikemu Peter ngo apostolmi no khochile, “Ningu ye timi nguno alau Alhou gholu masae. 30Ni puasü Lhou no Jisü, khuu nongu no asübo lono pithive keno, xüputhuve. 31Alhou no pa pesü Sakipheu eno Xakuluu shi Pa u ajeu süqhepe qhino Israelmi pelo xaidelu no axine qhikütsü ithulu peniye ke. 32Ningu ye thime hipaqo thopimi ke, eno Alhou no Pa gholu kemi lau tsükeu Aghungu Kimthe ghi thopimi ke.”

33Panongu no ti chilupe axuideve no apostolmi pithiveni shive. 34Ikemu hoho lo Ayezah shikükami Phariseemi lakhi, timi kümtsü no gihu chekeu, Gamaliel huno puthugho no apostolmi khalau pipeve penike azah tsü. 35Pa no hohomi vilo pi, “Israelmiqo, timi hipaqo shou kiu shiniye ani keno tsaqüi shilo. 36Kughengu hipa züu Theudas no pa ampi pesü kije shi ipeghi kelo timi 400 toike no pa gholo wuve. Pa pithive kelo pa gholo kichemi ye apanaghave no kiumu kumove. 37Pa thiu timi kikihi ghuloki lo Galileemi Judas ipeghi no timi khami sawuve. Ikemu pa ghi pithive eno pa papemi kümtsü apanaghave. 38Ikehu hipa vehu lo ghi, I no nongu vilo piani, timi hipaqo kishi shive pelo eno panoqo phevelo, kughengu hipa kukughu momu akümla no timi launo ighikeu shiaghi aye hauve nani; 39ikemu hi no Alhou launo shiaghi aye, nongu ye panongu theqhimla nani. Nongu ye Alhou küla aghi luvike!” Ikehu hohomi no paw mijekütsü luve. 40Panongu no apostolmi kusü no küghape heqhi püzü khilemu Jisü je lono timi pütsa kevilo pi mtotoi azah tsüve no puwuve. 41Apostolmi no hoho zülono cheve no Jisü je ghenguno akukujo ithulu küzüpu shikehu alokivi shive. 42Eno tsalakipe achineki lo ngo aki akilo panongu no Jisü ye Khristo kepi tamono kütsü shikae.

Currently Selected:

APOSTOLMI 5: SUMRVBSI

Highlight

Copy