APOSTOLMI 10

Peter ngo Cornelius

1Caesarea lo Italia Ghüshimi ipikeu loji lo aqhe zatsüu Cornelius ache. 2Pa ye Alhou ithitoi eno pa kibo kümtsü Alhou sümsa chekemi, kumlhomi kuphu eno tamono Alhou vilo inikhu chekemi. 3Ghulo lakhi avelau ayi küthü kihelo Alhouw kungumi lakhi no pa lau ighi no, “Cornelius” ipikeu pa no kungunhetsü lono mtsüqhei ithulu. 4Pa no thüghüi kungumi juno pi, “Ampeu, kiu kea?” Kungumi huno pi, “O kighini eno nono kumlhomi kuphu chekeu ye kümsükulu kümllagho shi Alhou tovae. 5Joppa lo timi puwu no Simon, khuu Peter ipi cheni keno pa kusaghi lo. 6Pa ye ashiyiko kümlau Simon gholo ani, eno pa ki ye azüghi phivilo ani.” 7Kungumi pa pütsa akeu no wuve kethiu, Cornelius no pa qemi kini eno pa hikujuu ghüshimi Alhou lau amlo tsüqhiyi kemi ku, 8eno thokha panongu vilo pive no Joppa lo puwuve.

Peter Kungunhetsü

9Thoghiu panongu no Joppa toniche kelo, Peter ye akighini shinike puchou ayi chighikini qhalo aki kütsüqa lo iku. 10Pa ye müzüthive eno kiuala chunishi ae, ikemu alibe kuto akelono pa no kungunhetsü ithulu, 11atsütsü khaqhive no kiukela ayephu kuloghi toike ashe bidi lono küghape no ayeghi lo piqi keu pa no ithulu. 12Tipau lo tüghashi, itikiche lhoxü eno aghau jeli kümtsü ae. 13Pa lau asütsa ishi ighi, “Peter, ithu no heqhi chulo.” 14Ikemu Peter no pi, “Khilemu shimlae, Ampeu; kughengu ni ye kitiqeve keu momu mithekumo kiumu chuju mphie.” 15Ghuthu akiniu asütsa pa lau ighi, “Alhou no kiu shikimtheve akeno mithekumo ipi kevilo.” 16Ghuthu küthü kutolo tishi no tipau ye atsütsü lo paikhavi süikuve.

17Peter no kungunhetsü kiqi ye kiu shiaghi nani keno phiküghüzü pe akelono, Cornelius no timi puwu keqo no Simon ki ighisü khagho lo aghi. 18Panongu no Simon, khuu Peter ipi cheni keno, tile anima pi ighiju. 19Peter no kungunhetsü kiqi kümsüju akelono Aghungu no pa vilo pi, “Julo, timi küthü no o phucheni. 20Ithu no iqilo, eno künacho mono panoqo gholo wulo, kughengu I no panoqo puwuke.” 21Peter no timiqo lau iqi no pi, “Nongu no phuche keu huye nike. Nongu ye kiu shi ighi ani kea?” 22Panongu no pi, “Kungumi kimthe no azah tsüke toi Cornelius, aqhe zatsüu, süchomi, Alhou sükümsami, Jewmi shiye kümtsü no gihu chekeu no nono kiu pikepu ani keno ininike o pelo pa kilo ighitsü peniye kupuwu ani.” 23Ikehu Peter no panongu pesü inami shi pa kilo kusü.

Thoghiu pa no panongu gholono cheve, eno Joppa lo athiküzümi khami pa gholo wue. 24Panongu no aküthüni no Caesarea lo ighi. Cornelius no pa bolomi ngo shompami kukumqo no panoqo huqhe aghi. 25Peter no aki alou iloghi kelo Cornelius no pa sasü kusho, eno pa pukhu philo itsaqi no pa mlla. 26Ikemu Peter no pa sünhe puthu no pi, “Ithulo; ni ghi timi ke.” 27Peter no pa pütsa ghi alou iloghi kelo, timi kutomo kumqo aghi. 28Pa no panoqo vilo pi, “Nongu no ithi anike Jewmi lakhi no shiye kütami sasü xukütshü momu xujuni keu ye ayezah kiqilo kumoe, ikemu timi khumu pesü kitiqeve keu momu mithekumo ipi pemoni ke Alhou no I piyevae. 29Ikehu kughou I ku ighi keno, ni ye lachile mono ighi ani. Tishiaye nongu ye kushiye I kupuwu kea?”

30Cornelius no pi, “Ishi bidi shive ake hipa tüqhüdo avelau ayi küthü kihelo, ni ye I ki lono akighini shiae. Tile timi lakhi metsüghoike phimini pepusü I zülo ipeghi, 31eno pi, ‘Cornelius, o kighini eno nono kumlhomi kuphu chekeu hu Alhou no ikhiluve tsüae. 32Tighenguno Joppa lo Simon khuu Peter ipi cheni keno pa kupuwu lo. Pa ye Simon ashiyiko kümlau kilo ani, ti ye azüghi phivilo ani.’ 33Ikehu I no mtazü o kupuwu kelo nono ighi tsüke alovae. Tighenguno itehi Ampeu no o vilo kiu pilo pi azah tsü keno thokha chiluni ke ningu kümtsü Alhou zülo anie.”

Jewkumomi no Atsakiviu Chilu

34Ikehu Peter no pithu: “Kuchou no Alhou ye agikuju kühae pi I no vethaluvae, 35ikemu shiye kümtsü gholo khukhumu Pa sümsa eno achipiu shikeu ye ikhikulupu shicheni. 36Atsa khikhi Pa no Israelmi lau puwu keno, ti ye Jisü Khristo vecheo aloino keu tsakiviu pesü sheshu keu nongu no ithi ani (Pa ye kümtsü Mpeu ke). 37John no baptizkishi sheshu keu vecheo Galilee lono huthusü Judea qhalo kiu shive keno nongu ampi no ithi ani: 38Alhou no Aghungu Kimthe eno aküka pesü Nazarethmi Jisü nukishe. Alhou no pa gholo ake ghenguno pa no aqha kümtsü lo wuno akivi kümla shi eno tüghami no qhasüpe akeqo kümtsü shipivi tsüe. 39Jewmi ghakhu lo ngo Jerusalem lo pa no kiu shiche keno, ningu no tipaqo kümtsü thopimi ke. Panongu no asübo lono pa pithive. 40Ikemu Alhou no aküthüni ye, akithi lono pa xüputhuve no pa pelo timi zülo ipeghipe, 41timi kümtsü lau kumo kemu Alhou no thopimi shipenike kisheluve kemi, pa no akithi lono ithughive kethiu pa sasü kümtsa chusho kemi ningu lau ipeghi ke. 42Pa no ningu vilo sheshu lopi azah tsü, eno Alhou no pa pesü küxümi ngo kithimi shou küghaküthau shi kishelu kepi ashepe shipenike azah tsüe. 43Pa pülü kemi kümtsü no pa je vecheo axine qhikütsü ithulue pi tungkupmi kümtsü no pa shepe shipüani.”

Jewkumomi shou Aghungu Kimthe

44Peter no hipaqo pi aphi lono, atsa ini akemi kümtsü shou Aghungu Kimthe ikughive. 45Peter gholo ighi kemi küpülümi aphighüyiko ghave kemi no akichiqhive, kughengu Jewkumomi shou ghi Aghungu Kimthe gho lepuku tsüke. 46Kughengu panongu no amili lono pi akeu eno Alhou sheqhe akeu chilue. Tileno Peter no shuphe, 47“Ningu shou ighike toi timi hipaqo shou ghi Aghungu Kimthe ighivae, panongu pesü azü lono baptiz shinike khuana no lakha lunani keshea?” 48Ampeu Jisü Khristo je lono panoqo baptiz shilu penike pa no azah tsüve. Tishino panongu no pa vilo atsala hami ngo aghilo pi qhüiniju.

Currently Selected:

APOSTOLMI 10: SUMRVBSI

Highlight

Copy