APOSTOLMI 11

Peter no Akukuhou lau Pitsü

1Judea qhalo apostolmi ngo athiküzümi akeqo no Jewkumomi ghi Alhou tsa ikhiluvae pi chilu. 2Ikehu kughou Peter no Jerusalem lo ighi keno, aphighüyiko ghave kemi loji no pa pipüsa ghi pi, 3“No ye aphighüyiko ghamo kemi lau wuno pano gholo chusho ani.” 4Ikemu Peter no panoqo vilo abo-akeshi lhepiye: 5“I no Joppa mishighüna lo akighini shi akelono kungunhetsü ithulu. Kiukela ayephu kuloghi toike ashe bidi lono küghape no atsütsü lono ayeghi lo piqi, eno tino I lau iqighi. 6I no tsaqüi jukelo apukhu bidi kupu lhoxü, tüghashi, itikiche lhoxü, eno aghau jeli I no ithulu. 7Eno asütsa lakhi no I pütsa keu I no chilu, ‘Peter, ithu no heqhi chulo.’ 8Ikemu I no pi, ‘Khilemu shimlae, Ampeu; kughengu kitiqeve keu momu mithekumo ye I kichi lo khilemu ilomphie.’ 9Ikemu atsütsü lono asütsa no ghuthu akiniu khochile, ‘Alhou no kiu shikimtheve akeno kitiqevae pi kevilo.’ 10Hitoi ghuthu küthü shive no kümtsü atsütsü lo sünhe chile saikuve. 11Tipa mtsa Caesarea lono I lau puwu kemi timi küthü no nino ngo akeu kilo ighi. 12Eno kiumu kilemo no panoqo gholo wulopi Aghungu no I vilo pi. Athiküzümi hipano tsügho ghi I sasü kümtsa timi lakhi kilo iloe. 13Pa no ningu vilo kungumi lakhi no pa kilo ighi no pikeu pi, ‘Joppa lo timi puwu no Peter ipikeu Simon hu saghilo, 14pa no o vilo atsape sheshu nani eno tipa vecheo no eno o kibolomi kümtsü xaluve nani.’ 15I no panongu vilo atsa pithu kemtsa, hukuthu lo ningu shou ighike toi Aghungu Kimthe no panongu shou ighive. 16Tileno Ampeu no kishi pipüa keno I no kümsülue, ‘John no azü pesü baptiz shitsüe; ikemu nongu ye Aghungu Kimthe no baptiz shitsü nani.’ 17Tishiaye Ampeu Jisü Khristo pülülu kelo ningu tsüke toi, Alhou no agho aphiphi pesü panoqo tsükeu lo ni ye khuue pi I no Alhou laghi hakhani kea?” 18Panongu no hi chilu kelo inaqhoive, eno Alhou sheqhe ghi pi, “Tishiaye Alhou no Jewkumomi lau ghi aküxüpu lo wulu kepu xaidekulu tsüvae.”

Antioch lo Akukuhou

19Stephen pithive kelono kijipüsa thuve kehu Phoenicia, Cyprus, eno Antioch kutolo apanagha pove keqo no atsa pesü kütami vilo pimono Jewmi vilo likhi pie. 20Ikemu panongu gholo Cyprus ngo Cyrene timi khami no Antioch lo ighi no Ampeu Jisü ghili pesü Greekmi vilo ghi sheshu. 21Ampeu küka no pano gholo ae; eno timi kutomo no pülü luno Ampeu lau ighive. 22Hipau sütsa Jerusalem lo akukuhou tove, ikehu panongu no Antioch lo Barnabas puwu. 23Kughou pa no ighi no Alhouw küpükini ithulu keno, pa mloqive eno panongu vilo itha mono Ampeu ghokulu shilopi pa no kümtsü shikumto, 24kughengu pa ye timi kivimi, Aghungu Kimthe eno aküpülü no chhitoi kemie. Eno timi kutomo no Ampeu lau ighi luve. 25Tishino Barnabas no Tarsus lo Saul phuniye wu, 26eno kughou pa no phulu keno, pa sasü Antioch lo ighi. Ampe kupuju pama no akukuhomi sasü kuposhu no timi kütsasa shika. Antioch lono atüghüshi akhopemi pesü Khristomi ipi kulue.

27Tipa ghuloki lo tungkupmi khami Jerusalem lono Antioch lo ighi. 28Panongu gholo Agabus ipikeu no puthugho no ayeghiqha kümtsü lo püqümiye kije chenie pi Aghungu vecheo pichho tsü (hi ye Claudius ghuloki lono shikupuve). 29Ikehu akhopemi no pütüta no toluke qhemi Judea lo athiküzümi lau akukuphu tsünie pi xathalu. 30Eno panongu no titoi shino Barnabas ngo Saul pama u lono akukuho lo kichimi lau akukuphu tsüpuwue.

Currently Selected:

APOSTOLMI 11: SUMRVBSI

Highlight

Copy