APOSTOLMI 2

Aghungu Kimthe Ighi

1Kughou Pentecost tsala ighi keno, panongu kümtsü a-a lakhi lo ae. 2Paikhavi atsütsü lono asütsa lakhi amülhü kuloghi toi ighi no panongu no ngo akeu ki chhitoive. 3Eno ami mili toi amqo-amqo shi panongu zülo ipeghi no lakhikhi shou ngove. 4Aghungu Kimthe no panongu kümtsü shepichhive no Aghungu no panongu pelo pilupe kehu amili kütau no pithuve.

5Tipa ghuloki lo aghakhu kümtsü lono amlo kütsümi Jewmi Jerusalem lo ae. 6Eno aghügha chilu kelo aqokitikhi ighive no akümzave, kughengu kümtsü no atsa pi akeu pütüta tsauno chilu ke. 7Panongu no akümzaqhiyi eno akichiqhipe pi, “Hi atsa pi akeqo kümtsü Galileemi ke kumo? 8Imaye kishino ningu ye kümtsü no pütüta tsauno chilu ani kea? 9Ningu ye Parthiami, Medemi, Elammi, eno Mesopotamia, Judea ngo Cappadocia, Pontus ngo Asia lo kungomi, 10Phrygia eno Pamphylia, Egypt ngo Cyrene phivilo Libya lo kungomi, eno Rome lono ighi kemi, 11Jewmi eno Judah chineye luve kemi, Cretemi, Arabiami, ikeghi panongu no Alhouw akümzapu kümla ghili pikeu ningu tsauno chilu anie.” 12Kümtsü no akümzave no thüghüi lakhino lakhi vilo pikile, “Hi ye kiu kiqi kea?” 13Ikemu khami ye thaigha ghi pi, “Panongu ye aji kithe shomzü ani.”

Pentecost Tsalani Peter Kükütsü

14Ikemu Peter no chighiqhaqhi gholono puthugho no asütsa kuloghi lono timiqo vilo pi: “Judeami eno Jerusalem lo küamiqo, hi ithilo eno nongu kini kughope I tsa inilo. 15Nongu no kümsü aketoi timi hipaqo ye shomzü amoe, kughengu itehi ye inaqhe ayi toku shiaphi. 16Ikemu hi ye tungkupu Joel vecheo pipüa keu ke:

17“‘Alhou no sheshu, ashekha tsala lo hitoi nani,

I no timi kümtsü shou I Ghungu lepuku nani,

no tianuli no tungkuptsa pi nani;

now apumiqo no kungunhetsü ithulu nani,

eno now muchomiqo no asamo pumo nani;#Joel 2:28-32

18tipa ghuloki lo I qepumi ngo I qelimi shou ghi I no

I Ghungu lepuku no panongu no tungkuptsa pi nani.

19I no kunguu atsütsü lono akichiqhipu piye nani

eno aqhou ayeghi lo aji, ami, eno

amchhi phoboi amchipu piye nani;

20Ampeu juküvüpu tsala kije ighini ke zülo

khetsünhe no zümoive nani,

aqhi no aji toi huchuyive nani.

21Khukhumu Ampeu je kulu keu ye xaluve nani.’

22“Israelmiqo, atsa hipaqo inilo, Alhou no Nazarethmi Jisü nongu lau kophe tsüno pa vecheo aküka kumto, akümzapu eno amchipu kümla shikeu nongu ampi no ithi ani. 23Alhouw mtsümishei keu küpüghü eno azünatha kighithi kiqi lono Jisü hipau pesü nongu u lo süvetsü, eno nongu no aye kümthami u lono pa yedave no pithive. 24Ikemu Alhou no akithipu ghime shipühave tsüno pa xüputhuve, kughengu akithi ye pa küghape püamlave. 25Kughengu David no pa vehu ishi pi,

“‘I no alhokuthu I zülo Ampeu ithulue,

Pa no I u ajeu anike ni ye ithamoe;

26tigheno I mlo no alovi, eno I tsapi no alokivi shi;

I phimpi ghi lajupu lono xü nani.

27Kughengu No ye I ngulho pesü Kithigha lo qhivemo nani,

momu Ow Akimtheu pelo tsümave keu ithulu pemo nani.

28Nono aküxüpu la I piye;

Nono I sasü akeu no I lopivi tsü nani.’

29“Athiküzümiqo, ni ye asü David ghili mtotoi pilu nani, pa ye thive no qhove, eno pa kumona ye ishi kutolo ningu gholo ani. 30Pa ye tungkupmi, eno pa lagha lo milakhi no pa kükalakhü lo ngo nanie pi Alhou no tushoqhi keu pa no ithi akehu, 31pa no Khristo xüchilekulu azünatha ithulu, eno Khristo ye Kithigha lo qhive no tsümave moe pi pitsüe. 32Alhou no Jisü hipau xüputhuve, eno ningu kümtsü no tipau thopimi ke. 33Pa süqhepe Alhou u ajeu qhive no Apu launo Aghungu Kimthe piqhi püakeu ithulu kethiu, nongu ampi no ithulu eno chilu akeu hi ye pa no ningu shou lepuku tsükeu ke. 34Kughengu David ye kungugha lo ikumo ikemu pa ampi no pike,

“‘Ampeu no I Mpeu vilo pi,

I u ajeu iqalo,

35I no o ghümi pesü o pukhu kinepu shitsü moke kutolo.’”#Lesh 110:1

36Tighenguno Israel kibolomi kümtsü no mtsüqhei ithilo, Jisü khuu nongu no yedave keno, Alhou no pa pesü Ampeu eno Khristo kinikujo shive tsüae.”

37Kughou timiqo no hi chilu keno panongu mlo itapinyive no Peter ngo apostolmi kütami vilo pi, “Athiküzümiqo, ningu ye kiu shiveni kea?” 38Peter no panongu vilo pi, “Nongu xine qhivetsü kepushi xaideghi no Jisü Khristo je lono baptiz shilulo, eno nongu no Aghungu Kimthe gho ithulu nani. 39Kughengu ashoqhi ye nongu eno no tianuli eno khunoqo putou ani keno, Ampeu ni Lhou no Pa lau kulu kemi kümtsü ghenguno ke.” 40Pa no atsa kütau kutomo pesü thopi shino panoqo hakutho ghi pi, “Hi chighichilai keu tiqheli lono nongu ampi xalulo.” 41Ikehu khunoqo pa tsa ikhilu keno tipaqo baptiz shivetsü, eno tipani timi 3,000 kutolo panongu gholo kihisü luve.

Küpülümi Kuposhukulu

42Panongu no pano ampi pesü apostolmi shiküka eno kuposhukulu eno asho sükupho ngo akighini lo ikhiphe tsü. 43Apostolmi vecheo akümzapu eno akichiqhipu kümla kutomo shikelo timi kümtsü shou msaighü keu ikughive. 44Pülülu kemi kümtsü no kumqo no thokha aqü shiche. 45Panongu no pano mheghi ngo tinhemgha kümtsü jeve no avehupu shi aghi kemi lau küsaje che. 46Tsala kipetsü achineki lo kümtsa wu, eno panongu ki lono kümtsa alokiqi eno qhaqhilei shi chuqu-kusho shiche, 47Alhou sheqhe eno timi kümtsü lopu shilue. Eno Ampeu no tsala kipetsü panoqo gholo xaluve kemi küpha tsüe.

Currently Selected:

APOSTOLMI 2: SUMRVBSI

Highlight

Copy