APOSTOLMI 3

Apukhu Kinita kemi Shipivi

1Ghulo lakhi Peter ngo John pama no avelau ayi küthü kihe kighini lo achineki lo iqhoche. 2Ikelo Jukivi Khagho lo timi lakhi apunu lono apukhu kinita kemi tsalakipe xapuwo qhino achineki lo iloche kemi vilo pisa khuchu chekeu khape cheghi. 3Peter ngo John pama achineki lo iloche keu ithulu no pa no pisa khu. 4Pama no thüghüi pa juno Peter no pi, “Nikujo julo.” 5Pama launo kiuala ithulu nanie pi huqhe ghi pa no tsaqüi ju. 6Ikemu Peter no pi, “Nikujo ye ghükayi na ameshoyi namu kühae, ikemu I no kiu ani keno o tsüni. Nazarethmi Jisü Khristo je lono ithu no alache lo!” 7Pa no pa u ajeu no pa sünhe puthu kemtsa pa pukhu ngo alaunhe mtotoive. 8Pa no ilhethu puthughove no alache thuve, eno ilhe iku-iqi alachesü Ampeu sheqhe ghi pama sasü achineki lo ilove. 9Timi kümtsü no pa no alachesü Alhou sheqhe akeu ithulu, 10eno pa ye achineki Jukivi Khagho lo iqa no khuchu chekeu kepi michive. Panongu no pa lau kiu shive keno ithulupe akichiqhi eno akümzave.

Achineki lo Peter Tsapi

11Pa no Peter ngo John pama phivilo akelono, timi kümtsü no shishe akichiqhiyi posü Solomon kisheqho ipikeu lo ighi. 12Kughou Peter no ti ithulu keno, pa no timiqo vilo pi, “Israelmiqo, kushiye nongu ye hi jupe akichiqhi ani, eno ni küka momu ni küxü kimthe huno timi hipau pelo alache lupe ketoi kutuxoxo ni juani kea? 13Abraham, Isaac, eno Jacob Lhou, ni puasü Lhou no Pa qeu Jisü, khuu Pilate no kuqho pheveni pi keghi nongu no pa zülono akipimi tsüno milive keno, pa juküvüpu shive tsüae. 14Nongu no Akimtheu eno Amikuchou milive no ghikiqhimiu kuqhophe tsülopi khuluve. 15Nongu no aküxü Mpeu khuu Alhou no akithi lono xüputhuve keno, pa pithive. Ningu no tipau thopimi ke. 16Eno pa je pülülu keu vecheo timi hi, khuu nongu no ithulu eno ithi ani keno, akumto tsüe, eno Jisü vecheo aküpülü huno nongu kümtsü zülono timi hipau phimpi shipivivae.

17“Ikehu athiküzümiqo, I no ithi anike now yepemi toi nongu ghi mthano mlavae. 18Ikemu Alhou no kiu Paw tungkupmi kümtsü vecheo azünatha Paw Khristo ye aghime shinani, ipi keno, Pa no ti shikupuve tsüe. 19Tighenguno xaidelo, eno nongu xine nuxave tsü penike tsüghü ighilo, 20tishikeu lono Ampeu gholo akeu huno aghüthi püxülu peni, eno Pa no nongu ghenguno Khristo kishephe tsükeu, Jisü hu puwutsü penie. 21Alhou no kushuo lono Pa kimthe tungkupmi vecheo pipüa ketoi, thokha athoputho moke kutolo, kungugha no pa saluve masae. 22Moses no pivae, ‘Ampeu Alhou no nongu ghenguno tungkupu lakhi I toike nongu thiküzümi gholono ipipe nani. Pa no kiu kiu pimu nongu ye pa tsa ini masae. 23Pa no pikeu inimo keu ye timiqo launo kütüta shi püghave nani.’ 24Samuel lono huthusü pa thiu tungkupu khijeno tungkuptsa piche keno kümtsü no atsala hipaqo ghili pi püani. 25Nongu ye tungkupmi nuli, eno Alhou no nongu puasüqo sasü puloshoqhi shikeu nuliqo ke. Pa no Abraham vilo pi, ‘O polo kughuko vecheo ayeghi lo alagha kümtsü kümghatsü nani.’ 26Alhou no now kixikila lono sachile ighi no nongu kümgha tsüniye Pa qeu saputhupe atüghüshi nongu lau puwuke.”

Currently Selected:

APOSTOLMI 3: SUMRVBSI

Highlight

Copy