APOSTOLMI 1

Aghungu Kimthe Tsünike Piqhi

1O Theophilus, Iw kaku atüghüu lono I no hi kümtsü yevae: Jisü no mla eno shika thu kelono wo 2pa no kishelu kemi Apostolmi lau Aghungu Kimthe vecheo azah tsüve kethiu, kungugha lo pa saikuve keu tsala kutolo. 3Pa no imeve kethiu ajeli kutomo lono thopi shi pa ye ani pikeu piye, atsala lhobidi kutolo panongu lau ipeghi piye eno Alhou yekipe ghili pike.

4Panongu gholo akelono pa no Jerusalem qhikevi no Apuw pikiqhi khelopi azah tsü, pa no pi, “Nongu no I launo chiluvae; 5kughengu John no azü pesü baptiz shitsüe, ikemu ado kushuo kumo lo Aghungu Kimthe pesü nongu baptiz shitsü nani.”

Kunguu Ikuve

6Ikehu panongu no kumqope akelono pa vilo ighiju, “Ampeu, no ye hipa ghuloki lono Israelmi lau kükaqha tsüchile nani kea?” 7Pa no pi, “Apu no Pa küka lono kughuve keu do aghuloki ye nongu no ithi masa keu kumoe. 8Ikemu kughou nongu shou Aghungu Kimthe ighini keno, nongu no akumto ithulu nani, eno Jerusalem, Judea kümtsü, Samaria, eno ayeghi shekha kutolo nongu no I shepemi shi nani.” 9Pa no hipaqo pive kethiu, panongu zülono pa ye kunguu saikuve eno khüngküsü no panoqo nhethe lono pa sawuve. 10Pa no wuche keu panongu no jua kelono timi kini aphi kimiye pepusü panoqo phivilo ipeghi, 11eno pi, “O Galileemi, nongu ye kushiye atsütsü lo jupuku ania? Hi Jisü, khuu nongu launo kungugha lo saikuve akeno, pa ye kungugha lo wuve keu gholau no itaghi ighi nanie.”

Judas Theli lo Matthias Kishelu

12Tithiu panongu no Olive toghi ipikeu lono Jerusalem lo ideighive, ti ye Jerusalem lono kilometer lakhi tohilo ke. 13Panongu no ighi no kunguu chebo lo ikuve, Peter, John, James, Andrew, Philip, Thomas, Bartholomew, Matthew, Alphaeus nu James, Zealot mqo lomi Simon, eno James nu Judas. 14Hipaqo kümtsü akükümsü lakhi shino tamono akighini shia, panongu gholo totimiqo, Jisü paza Mary, eno pa thiküzümi ae.

15Tipa ghuloki lo athiküzümi dolo Peter no puthugho (panongu kihiju kelo 120 qhalo ae) eno pi, 16“Athiküzü chelimiqo, Judas no Jisü küghakulumi lapiyeu shive keu ye Aghungu Kimthe no azünatha David vecheo pi püakeu Kuchoyesü shikupu niye ke. 17Kughengu pa ye ningu gholo lakhi shiche, eno hipa kümlapu lo pa saje kophe tsüpüa ke.” 18(Judas ye paw kixikila jume pesü alu lakhi qhüve, ikemu akütsü no aqhoshi veqhi no pa po velepe kighinoli kümtsü ipeghive. 19Jerusalem lo küami kümtsü no ti chiluve, ikehu pano tsauno alu tipau Akeldama kuvetsü, ti ye, Aji lu.) 20Kughengu Leshele kaku lo yepüani,

“‘Pa ghüna-a ye küghüve peniu,

eno khumu tile küghüna pemoniu’;#Lesh 69:5

eno

“‘Kütami no pa-a lo ngove peniu.’#Lesh 109:8

21Ikehu ningu gholo kichemi dolo lakhi khuu no Ampeu Jisü no ni sasü iqhoiqi cheke ghuloki lo, 22John no baptiz shitsü kelono ningu launo pa saikuve ke kutolo ni gholo chekeno, tipaqo dolo lakhi pesü ni gholo paw xüchilekulu thopimi shi masave.” 23Panongu no Joseph, khuu Barsabbas, eno itaghi Justus ipiche keno, pa ngo eno Matthias pama shuphe. 24Panongu no inikhu no pi, “O Ampeu, nono timi kümtsü mlo ithi anike ningu piye tsülo, hi pama dolo Nono khikhiu kishepe 25Judas no qhive no pa-a lo chevekeu theli lo apostolmi shino hipa kümlapu saje pelu peni keno ni piyelo.” 26Panongu no pama dolo asaqhiju kelo Matthias shou qhibelu kehu pa pesü apostolmi chighiqhaqhi gholo kihisü luve.

Currently Selected:

APOSTOLMI 1: SUMRVBSI

Highlight

Copy