APOSTOLMI 14

Iconium lo

1Iconium lo Paul ngo Barnabas pama no Jewmi sinagog lo ilo no thopi shikelo Jewmi ngo Jewkumomi kutomo no pülüluve. 2Ikemu aküpülü kumomi Jewmi no Jewkumomi xukutho no athiküzümi mlo lo tüghü süvetsü. 3Ikehu pama no tile ado kushuo ngono Ampeu ghenguno mtotoi paw küpükini tsa pesü thopi shi, eno amchipu ngo akümzapu kümlaqo shie. 4Ikemu mishighüna lo timiqo ye kijethave; khami no Jewmi gholo eno khami no apostolmi gholo süve. 5Kughou Jewmi ngo Jewkumomi no yepemi gholo süno pama ghime eno atu pesü veqhi nike kughu keno, 6pama no ti chilu no Lycaonia lo Lystra ngo Derbe mishighüna eno tipa ghakhu qhalo pove, 7tilau pama no atsakiviu pesü sheshue.

Lystra lo

8Lystra lo timi lakhi, aza po lono apukhu kinitave no alache mlave kemi ache. 9Pa no Paul no pikeu tsa inia. Paul no tsaqüi pa jukelo, pa ye shipivi luve kepu küpülü akeu ithulu kehu, 10asütsa kuloghi lono pi, “Müzüchoi puthugho lo.” Timi huno ilhethu ala chethuve. 11Kughou aqokitikhi no Paul no mlakeu ithulu keno, panongu no Lycaonia tsauno ishi ighamku pithu, “Alhouqo no timi julho lono ningu lau iqighivae!” 12Panongu no Barnabas pesü Zeus, eno Paul no atsakipiu shi akehu Hermes kutsü. 13Eno mishighüna khagho lo Zeus chineki lo achineu no amshitsü ngo axamunu pesü pama no akeu khagho lo ighi no aqokitikhi sasü akümllagho pesü apostolmi tsüniye shi. 14Ikemu kughou apostolmi Barnabas ngo Paul pama no ti chilu keno, pama no aphimini süxü ghi posü aqokitikhi gholo ilo no ighamku, 15“Timiqo, nongu ye kushiye hipaqo shi ani kea? Nikujo ghi nongu toi timi, eno nongu lau atsakiviu süghi ani, tishianguno nongu pelo hi adou thime lono tsüghüsü aküxüpu Lhou khuu atsütsü, ayeghi, azüghi eno tile akeu kümtsü lho keno, Pa lau ighi peniye ke. 16Wovekeu tiqheli loye Pa no shiye kümtsü pelo pütüta lalo chepe. 17Ikeghi Pa ye thopimi qhimoke kumoe, kughengu Pa no akümla kivi hitoi shi püani: atsütsü lono tsütsüghu piqitsü; atusho kiqi lono axa jeli nongu tsü; achuqupu ngo alokivi pesü nongu mlo piqi tsüke.” 18Atsa hipaqo pive namu aqokitikhi no akümllagho pama tsüniye akeu lakha mlave.

Lystra lo Atu pesü Paul Veqhi

19Ikemu Antioch ngo Iconium lono Jewmi ighi, eno aqokitikhi xukutho pe atu pesü Paul veqhive no thiva küghashi aphughi khalau sünhe pheve. 20Ikemu akhopemi no pa sühope akelono pa no ithughi no aphughi lo ilove, eno thoghiu no Barnabas sasü Derbe lo wuve. 21Kughou pama no mishighüna tipau lo atsakiviu pesü kütsü no akhopemi kutomo shiluve keno, pama ye xachilesü Lystra, Iconium eno Antioch lo idewove. 22Hi kümtsü lo akhopemi mlo shikumto tsüno aküpülü lo cheche penike pama no pi, “Aghime kitikhi kutomo vechesü ningu ye Alhou yekipe lo ilo masae.” 23Pama no akukuhou kümtsü lo layemi kisheve tsü kethiu, akighini eno kümvü keu lono panongu pesü pano no pülüluve keu Mpeu lau kulhuqhi tsü.

Syria Antioch lo Ideighi

24Tithiu pama no Pisidia kathasü Pamphylia lo ighi. 25Kughou pama no Perga lo atsa pesü sheshuve keno Attalia lo iqive. 26Tileno pama ye ashuka lono Antioch, khileno pama pesü akümla itehi shiqhilu keu mlawu peniye Alhouw küpükini lo kulhuqhi tsü keno, tilau wuve. 27Pama no ighi no akukuhou kukumqo püzü Alhou no pama peitha keu pesü sheshu, eno Jewkumomi lau kishi Alhou no aküpülü hukikha khaqhi tsü keno lhepiye. 28Pama no küpülümi sasü ado kushuo ngove.

Currently Selected:

APOSTOLMI 14: SUMRVBSI

Highlight

Copy