APOSTOLMI 13
13
Barnabas ngo Saul Puwu
1Antioch kukuhou lo tungkupmi ngo shikükami hipaqo ae: Barnabas, Simeon khuu Niger ipiche keno, Cyrenemi Lucius, yepeu Herod poshuu Manaen, eno Saul. 2Panongu no Ampeu mlla eno kümvü ake lono Aghungu Kimthe no pi, “Barnabas ngo Saul pama pelo I no kulu keu kümla shipenike kishekimthe lo.” 3Panongu no kümvü akighini shino pama shou au betsü no puwuve.
Cyprus lo
4Aghungu Kimthe no puwu ketoi pama no Seleucia lo iqive eno tilauno ashuka lono Cyprus lo wuve. 5Kughou panongu no Salamis lo ighi keno, pama no Alhou tsa pesü Jewmi sinagog lo sheshu eno John Mark no pama kukuphuu shie. 6Panongu no züdoyeghi kupuju vehosü wuno Paphos lo ighi kelo küdüumi, Jewmi Bar-Jisü ipikeu kichile tungkupmi lakhi sasü kusholu. 7Pa ye angh Sergius Paulus, khuu alokütsümi keno pa gholo akemi; ike angh no Alhou tsa inini ke Barnabas ngo Saul pama kupuwu. 8Ikemu küdüu Elymas (kughengu tino pa je kiqi ke) no angh pelo aküpülü lono tsüghüve penike panongu külae. 9Ikemu Saul, khuu pesü Paul ghi kuche keno, pa ye Aghungu Kimthe no chhitoi akehu pa no thebei Elymas ju, 10eno pi, “No tüghami nu, akimki eno pishikiqhi no chhitoi xapusü amikucho ghümi shiche keu, no ye Ampeu laghi kümzü shichighi keu lono tavemo kea? 11Julo, itehi Ampeu u o shou ikughivae, eno no ye anhethi icheve no ado hami khetsünhe küvü ithulu moae.” Paikhavi akimhi eno aküzü no pa küzüluve, eno pa sünhepe penike kütami kükauve. 12Tile kiu shive keno ithulu püzü angh no pülü luve, kughengu pa ye Ampeu ghili shika keu lo shishe akichiqhive.
Pisidia Antioch lo
13Paul ngo pa küsami no Paphos qhive no ashuka lono Pamphylia lo Perga lo ighi. John Mark ye pama qhive no Jerusalem lo ideighive, 14ikemu pama ye Perga lono Pisidia Antioch lo ighi, eno Sabbath tsalani sinagog lo ilo iqae. 15Moses Yezah eno Tungkupmi kaku phisü kethiu sinagog lo yepemi no pama lau atsape tsüpuwu, “Athiküzümi, nokujo no timiqo shikumto kepu tsa aghi aye pilo.” 16Ikehu Paul no puthugho no pa u peqhe tsüno pi:
“Israelmi eno nongu Alhou sükümsami, inilo. 17Israelmi hipaqo Lhou no ni puasüqo kishelu no Egypt yeghi lo ache kelono panongu pesü kije shitsü, eno Pa u kumto lono panongu sasü Egypt lono ipeghi. 18Ampe lhobidi kutolo Pa no asayeqha lo panongu sache. 19Eno Canaan yeghi lo shiye tsüni kütsave kethiu, Pa no tipaqo yeghi pesü amheghi shi panongu tsüe. 20Hi kümtsü ampe 450 luve. Eno tithiu Samuel tungkupu ghuloki kutolo Alhou no xaküthami qhitsü. 21Tile panongu no akükau khue, eno Alhou no ampe lhobidi kutolo Benjamin lagha lono Kish nu Saul pesü tsüe. 22Pa no Saul ikhive kethiu David pesü akükau shipenike süqhe, eno ishi pa shepe shitsü, ‘I pulou kümtsü shitsüni keu, I mlo kuchuu I no Jesse nu David phuluvae.’ 23Alhou no piqhi püake toi David lagha lono Israelmi ghenguno Xakuluu Jisü saghi ke. 24Pa ighi nike zülo Israelmi kümtsü vilo xükikithe baptiz shipenike John no sheshu. 25John no pa kümlapu ashe touve kelo ishi pi, ‘Nongu ye ni ye khuue picheni kea? Ni ye pa kumoe. Moe, I thiu chekeu, khuu pukhukuqho mu ni ye kuqho küzüpu kumo keno, pa jualo.’
26“Athiküzümi, Abraham nuli, eno nongu Alhou sümsa chekeqo, xakulupu tsape hipau ningu lau puwuve tsüae. 27Kughengu Jerusalem lo küami eno pano yepemi no pa ye khuu keno michi mlave, eno Sabbath atsütsü tungkuptsa phisü chekeu panongu no vethamla no Jisü kileve keu vecheo ti shikupuve. 28Pa pithive kepu kipimi kiumu phumla namu, panongu no Pilate vilo pa pithivelo pive. 29Kuchoyesü lo pa ghili yepüa keu kümtsü shikupuve kethiu, panongu no asübo lono pa ikhiqhive no akümoki lo süve. 30Ikemu Alhou no akithi lono pa xüputhuve, 31eno atsala kutomo khunoqo Galilee lono Jerusalem lo pa gholo ighi keno, panongu lau ipeghi, tipaqo no itehi ye timiqo lau paw thopi shi ani. 32Eno Alhou no apuasüqo lau piqhi keu tsakiviu ningu no nongu lau süghi ani, 33Pa no Jisü xüputhu keu vecheo ningu anuliqo lau shikupu tsüe, ti ye Leshele akiniu lo ghi yepüani,
“‘No ye I nu, ishi no
I no o pu shiluvae.’#Lesh 2:7; Ibr 1:5; 5:5
34Alhou no akithi lono pa xüputhuve, tishianguno khilemu tsüma kithemo peniye ke, pa no hitoi pitsü,
“‘I no David tsükeu akimthe eno thebeike kükümgha o tsüni.’#Isa 55:3
35Tighenguno Leshele lakhiu lo ghi ishi pi püani,
“‘No ye o Kimthe Qeu pelo tsümave pemo nani.’#Lesh 16:10
36Kughengu David ye paw tiqheli lo Alhou kimji kupuve kethiu, pa puasüqo gholo zühuve no tsümave, 37ikemu Alhou no khuu xüputhu keno pa ye tsümave moe. 38Tighenguno athiküzümiqo, timi hipau vecheo axine qhikütsü nongu lau sheshu anie pi ithilo, 39eno khikhi Moses Yezah no kuqho phemlave keno, pa vecheo pülülu kemi kümtsü tipaqo launo kuqho phevae. 40Tighenguno tsükhüi lo, tikumo aye tungkupmi kaku lo pi püakeu no nongu shou ikughi nosae:
41“‘Julo, nongu thoküghami,
apuchopungo pe pühavelo;
kughengu I no nongu ghuloki lo akümla lakhi shi ani,
ti ye khami no nongu vilo pinamu pülü moni keu kümla ke.’”#Hab 1:5; Isa 29:14
42Pama no ipeche kelo, timiqo no Sabbath akiniu lo ghi ighi no hipaqo pitsü lopi qhüiniju. 43Sinagog lo ahoho ixave kethiu Jewmi ngo Jewmi chineye luve kemi kutomo no Paul ngo Barnabas pama pape wuve, eno pama no panongu pütsa no Alhouw küpükini lo xüche lopi shikumto tsü.
44Sabbath akiniu loye mishighüna lo akemi kümtsü no Ampeu tsa ininike kumqove. 45Ikemu kughou Jewmi no aqokitikhi ithulu keno, panongu lolo anhekushu iloghive no Paul thaigha ghi pa no pikeu küla thuve. 46Paul ngo Barnabas pama no amlo kumtoshi pi, “Alhou tsa ye nongu vilo paghi pi masa kepu shiae. Ikemu nongu no ti ye kileve no nongu ampi ye lhokta küxü ithulu küzüpu kumovae pi xathave akeke ningu ye Jewkumomi lau wuniae. 47Kughengu Ampeu no hitoi azah ningu tsüvae,
“‘I no o pesü Jewkumomi küvü shive tsüae,
tishianguno nono ayeghi shekha kutolo xakulupu saghi nani.’”#Isa 45:22; 49:6
48Jewkumomi no hi chilu no alokivi shi Ampeu tsa sheqhe thuve, eno lhokta küxü lo kishesü luve kemi no pülü luve. 49Tipa cheaxü kümtsü lo Ampeu tsa veküpha wove. 50Ikemu Jewmi no Alhou sükümsami totimi aqoaho lo chuqumghai kemi ngo mishighüna lo timi akhotomi chuxu, eno Paul ngo Barnabas ghimeni ke xukutho thuve no tipa cheaxü lono pama hapupove. 51Pama no panongu ghutu keu shi apukhu lono ayeghimkhu kukhu qhive no Iconium lo wuve. 52Pülüluve kemi ye alokivi eno Aghungu Kimthe no chhitoive.
Currently Selected:
APOSTOLMI 13: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More