APOSTOLMI 15

Jerusalem Hoho

1Ikemu Judea lono timi khami Antioch lo ighi no ishi athiküzümi kütsü, “Moses khuaye kiqi lono nongu no aphighüyiko ghamo aye, nongu ye xamlae.” 2Paul ngo Barnabas pama no panongu sasü kütsala kigheve kethiu, pama gholo timi khami kishe no Jerusalem lo apostolmi eno layemi sasü hipa vehu küptsa penike kughu tsü. 3Akukuhou no panongu puwuve, eno panongu no Phoenicia ngo Samaria kathasü wuno Jewkumomi no kishi Alhou lau xaide ighilu ani keno chixechilei lhepiye, eno küpülümi kümtsü lau shishe alokivi süghi tsü. 4Kughou panongu no Jerusalem lo ighi keno, akukuhomi, apostolmi, eno layemi no alokivi shi panongu sasü, eno Alhou no panongu pesü kiu shilupe keno kümtsü lhepiye. 5Ikemu Phariseemi mqo gholo pülüve kemi khami no puthugho no pi, “Panongu ye aphighüyiko ghavetsü masae eno Moses yezah pape pemasae.”

6Apostolmi ngo layemi no hipa vehu küptsani ke kumqo. 7Ighono kütsala juve kethiu, Peter no puthugho no panoqo vilo pi, “Athiküzümiqo, nongu no ithi anike püzüu nomu Alhou no I vecheo Jewkumomi pelo atsakiviu chilu no pülülu penike nongu gholono kishe ke. 8Timi mlo ithi akeu Lhou no ningu lau mlake toi, Aghungu kimthe panongu tsükeu vecheo panongu lau thopi shi, 9eno aküpülü vecheo pano mlo shikimthe tsüno ningu ngo panongu dolo kiumu kothakile keu shitsü moe. 10Imaye, nongu ye kushiye Alhou peju ghi küpülümi shou ni puasü eno ningu no puqhemla keu kuokhasü betsü ani kea? 11Ampeu Jisüw küpükini vecheo ningu xalu nanie pi nino pülü aketoi panongu tishi nanie.”

12Tile kumqo akemi kümtsü no iqünheive, eno Alhou no Barnabas ngo Paul vecheo Jewkumomi gholo amchipu ngo akümzapu shikeu pama no pi akelo tsaqüi ini. 13Pama no pitave kethiu James no khochile, “Athiküzümiqo, I tsa inilo. 14Alhou no kishi Pa je ghenguno Jewkumomi gholono timi khami kishelu keno, Simon no pivae. 15Ti ye tungkupmi kaku lo ishi yepüa keu kimshilu ani,

16“‘Hipa thiu I no ideighi no

David ki ilaqive keu shiqhe kithetsü nani;

Ixapinyi akeu I no shiqhe kithe

tsüno athoputho tsüni,#Am 9:11,12; Jer 12:15

17-18tishianguno timi jeli eno Jewkumomi khunoqo I je

vecheo kuluve akeno, panongu pelo Ampeu phu peni,

ipi Ampeu khuu no khaghi no hipaqo ithipe keno, Pa no pi.’

19Tighenguno Iw xakütha ye Jewkumomi khunoqo Alhou lau ighi ani keno ningu ye pano küpüna kepu kumoe. 20Ikemu panongu lau yesü yepuwu no ajulho kümlla chuqupu, asalha, tshükiqhi lhoxü, eno aji mithekumo hipaqo lono putosüve pe kepue. 21Kughengu khaghi tiqheli lono aphughi kümtsü lo Moses Yezah sheshu ighivae, eno Sabbath atsütsü sinagogqo lo phisü acheni.”

Jewkumomi Küpülümi lau Yesü

22Tileno apostolmi ngo layemi eno akukuhomi kümtsü no pano dolono timi khami kishe no Paul ngo Barnabas pama gholono Antioch lo puwuni ke pulove. Panongu no athiküzümi dolo atomi Barsabbas ipiche keu Judas ngo Silas pama puwu. 23Eno yesü ishi yetsü: “Athiküzümi, apostolmi, eno layemi no Jewkumomi küpülümi Antioch, Syria, eno Cilicia lo akemi lau petha tsü ani. 24Ningu gholo khami no nino azah tsümo keghi wuno atsa hami pesü nongu pünaqhi eno kütakihi anie pi nino chilue. 25Ikehu ningu no akükümsü lakhi lono kumqo no timi khami kishepe ni qhuu Barnabas ngo Paul gholono nongu lau puwuni pi pulolue. 26Barnabas ngo Paul pama ye ni Mpeu Jisü Khristo je ghenguno aküxü pephe tsüve kemie. 27Ikehu ningu no Judas ngo Silas pama kichi lono hipa tsatho pi penike puwu ani. 28Kughengu hi ye Aghungu Kimthe eno ningu ghi pulolu no bekütha hipaqo nguno alau ye kiu makho mu nongu shou bemoni keu shivae: 29nongu ye ajulho kümlla chuqupu, aji, tshükiqhi lhoxü chumoni, eno asalha lono putosüni. Nongu no hipaqo launo putosülu aye, nongu ye achipi shilu nani. Akivishi alo.”

30Panongu puwuve kethiu, panongu no Antioch lo wuno küpülümi kukumqo no yesü tsüve. 31Kughou panongu no philu keno, panongu shikumto tsüke ghenguno ighamku alokivi shi. 32Judas ngo Silas pama ghi tungkupmi kehu atsa kutomo pesü pino küpülümi hakite eno shikumto tsü. 33Ado hami tile ngove kethiu, pama ye küpülümi khunono pama puwu keno tipaqo lau aloino puwove. 34Silas ye tile ngonike pulove. 35Ikemu Paul ngo Barnabas pama ye Antioch lo tishi ngove no kütami kutomo gholono Ampeu tsa shika eno kütsü ae.

Paul ngo Barnabas Kütüta shive

36Atsala hami thiu Paul no Barnabas vilo pi, “Nikujo Ampeu tsa pesü sheshuve keu mishighünaqo lo idewo no küpülümi kishi ani keno juni nolo.” 37Barnabas no pama gholo John Mark sasü wunishi ae. 38Ikemu John Mark no Pamphylia lo pama gholo akümla shimono süchileve kehu Paul ye titoi kemi sawumo keu pavie pi kümsüve. 39Eno pama dolo küthamla keu ipeghive kehu pama kütüta shive. Barnabas no pa gholo Mark sasü ashuka lono Cyprus lo wuve. 40Eno küpülümi no Ampeuw küpükini lo ikhiphe tsüke toi, Paul no Silas kisheluve no cheve. 41Pa no Syria ngo Cilicia qhalo wuno akukuhomi shikumto tsüe.

Currently Selected:

APOSTOLMI 15: SUMRVBSI

Highlight

Copy