YOHAN 12

Bethani Nung Yisu Dak Totzü Mezütsüba

(Mat. 26.6-13; Mar. 14.3-9)

1Anungji ano Kümtettsü Benjong atongtsü troknü lia, Lazar shiba Yisui tasü nungi shia arudaktsü, pa aliba Bethani yimtaki Yisu aru. 2Anungji idakji parnoki pa asoshi aonung chiyungtsü benjong ka yanglu; aser Marthai anganüa agütsü aser Lazar pa den chiyungdak amenba rongnung ka liasü. 3#Luk. 7.37,38. Mari-i sen jenti alangba teronem menemba totzü seret tesadang bener arua Yisu tetsüng nung mezütsü, aser pei kulang agi pa tetsüng aidoktsü; aser totzü teronem jagi ki asüng 4Saka Yihuda Iskariot, pa nütsüng rongnung ka, shibai pa bendanga agütsütsü, pai ashi, 5“Totzü ya senpak noklang asem yong yoker kechiba sensaker nem magütsü?” 6Pai sensaker indang bilema ya ashi masü, saka pa auür aser pa madang sen juli alinung, yangji kechi ayu aji pai bener oli ta asü. 7Anungji Yisui ashi, “La oda yujang, ni leper nung aremtsü anogo asoshi la nem aji yudakjang. 8#Taz. 15.11. Kechiaser sensakerbo nenok den teti lir, saka nibo nenok den teti malitsü.”

Lazar Anema Tasa Asaba

9Anungji Yihuda nunger teloki pa yangji lir ta angazük; aser parnoki Yisu asoshi dang masü, saka Lazar shiba pai tasü nungi shia arudaktsü pa reprangtsü asoshia aru. 10Anungji puti-ungertemi Lazara tepsettsü bangjem, 11kechiaser pa meji nung Yihuda nunger aika oadok aser Yisu dak amang.

Yirusalemi Takok Ngua Aiba

(Mat. 21.1-11; Mar. 11.1-11; Luk. 19.28-40)

12Asüngji Benjongi aruba telok tulu jagi Yisu Yirusalemi arudagi ta angashi. 13#TKe. 118.25,26. Anungji parnoki asang kongsang bener pa den ajuruteptsü ao. Parnoki ayimtena ashi, “Hosanna, shiba Kibuba tenüng nung arur pa tepelatsü! Oda Israel Chubaji sangang!” 14Yisui gado chanu ka ngua iba manung amen, oda zülua aliba ama;

15 # Zek. 9.9. Zion jala, tetsübuma, ajiang;

gado chanu ka dak sanger ne Chuba arudagi.

16O ya pa nütsüngtemi tamasabo mangatet; saka kodang Yisu sentsüwangshi, idangji o ya pa atema zülu aser pa dak yamaji inyakogo ta parnoki bilemtet. 17Anungji kodang pai Lazar leper nungi jateta tasü nungi shia arudaktsü dang telokti shirnok pa den liasü, parnoki kuli agütsü. 18Iba yongji telokti-i oa pa den ajurutep, kechiaser iba temaitsü pai inyakogo ta parnoki angashi. 19Ajagi Farisitemi parnok o parnok na jembitepa ashi, “Ajiang, nenoki kecha mekümteter, ajiang, alima pa sülen ogo.”

Grik Nunger Kari Yisu Bushiba

20Tekülemtsü asoshi benjongi shir atu, parnok rongnung Grik nunger kar liasü. 21Anungji parnoki Galil nung aliba Bethsaida nunger Filip dangi arua asüngdang, “Tamarener, onoki Yisuji ngunür.” 22Andria o Filip na arur Yisu dang ashi. 23Aser Yisui parnok dang langzü, “Nisung Chir sentsüwangshitsü mapang tonga aitogo. 24Atangji züngpong ni nenok dang shidi, tsükjang ka ali nung tsüker mesüra pa pei kija alir, saka pa süra, pai tejang jenti atanger.

25 # Mat. 10.39; 16.25; Mar. 8.35; Luk. 9.24; 17.33. Shirnoki pei taküm meimer, pai aji samatsü, saka shirnoki iba lima nung pei taküm sempadir, parnoki tatem makaba taküm angutsü. 26Kari ni tenzükra, pai kü sülen anitakdakjang, aser ni kechi nung lidir, yangji kü tenzükera alitsü: Kari ni tenzükra Tebui pa tushitsü.

Nisung Chir Ajungkettsüla

27“Tang kü mulung shisa amsar; aser ni kechi ashitsü? Oba iba mapang nungi ni kümzükang ta asü? Saka ya asoshi ni iba mapang yagi aru. 28Oba, ne nüng sentsü wangshidakjang.” Anungji kotak nungi ola ka adoka ashi, “Ni aji sentsü wangshidaktsüogo aser aji tanaben sentsü wangshidaktsütsü.” 29Anungji anasa noktaka aliba telokti-i aji angashidang tsüngmok atenogo ta ashi; ano tangari ashi, “Kotak tenyar kati pa den jembiogo.” 30Yisui langzü, “Iba ola ni asoshi masü, saka nenok asoshi aruogo. 31Iba alima o bendangtsü tang lir; tang iba alima chuba tezülen endoktsü. 32Aser kodang ni ali nungi ajungketdir, ni nisung ajak kü dangi atsütentsü.” 33Saka kechi tasüba agi pa asütsü, aji metetdaktsütsü asoshi pai o ya ashi. 34#TKe. 110.4; Isa. 9.7; Ezk. 37.25; Dan. 7.14. Anungji telok jagi pa dang langzü, “Khristabo teti alir ta onoki Ozüng nungi angazükogo; ajangla koda sür Nisung Chir ajungkettsüla ta naibo ashir? Iba Nisung Chirji shiba?” 35Anungji Yisui parnok dang ashi, “Joko mapang tatsüka dang tesangwaji nenok rongnung lir. Tammangi nenok memeneptsü asoshi, nenok den tesangwa alidang jajang; shibai ammang nung jajar pa koleni aor memeteter. 36Tesangwa nenok den alidang, nenok tesangwa chirtem akümtsüsa tesangwa dak amangang.”

Tamang Makaba Yihudapurtem

Yisui ya shir külen, parnok nungi oadok, aser parnok nungi pai atsüka ali. 37Saka pai parnok madang temaitsü paikaji inyakaka, parnoki pa dak mamang. 38#Isa. 53.1. Anungji Isaia ainkari jembiba o ya atalok:

“Kibuba, shibai onok osang amang?

Aser shir madang Kibuba teka jungkai adok?”

39Anungji parnoki mamangtet, kechiaser Isaiai tanaben ashi,

40 # Isa. 6.10. “Pai parnok tenük nükpok kümdaktsüogo,

aser pai parnok mulungjang meranga kümdaktsü;

aji mesüra parnoki pei tenük agi ngula,

pei mulungjang agi tezütetla, aser meyipla;

aser ni parnok anebtsüla.”

41Isaiai item o ashi, kechiaser pai pa sentsüwangshi angu, aser pai pa indang jembi. 42Aji saka yimsüsürtem rongnung aikati pa dak amang; saka parnok sinagog nungi jentoka lir ta tsübuba agi, Farisitem atema parnoki aji odia menangzük. 43Kechiaser parnoki Tsüngrem nüngsang dangbo nisung nüngsang ang tali meim.

Yisu O Agi Obendangba

44Aser Yisui ayimtena ashi, “Shibai kü dak amanger, kü dak amanger masü, saka ni shibai tenya pa dak amanger; 45aser shibai ni angur, pai shibai tenya pa angur. 46Shibaisa kü dak amangdir pa ammang nung malitsüsa alimai tesangwa ka ama ni aruogo. 47Kari kü osangtem angashir itemji mebenshira, ni pa o mebendanger kechiaser alima o bendangtsü asoshi masü, saka alima kümzüktsü asoshi ni aruogo. 48Shibai ni magizüker, aser kü osangtema magizüker, pa o bendangtsü ka kar. Ni jembiba o agi tatem anogo nung pa o bendangtsü! 49Kechiaser ni pei mulungba tashi agi mejembi; saka ni kechi ashitsü aser kechi jembitsü aji ni tenyaba Tebui kü nem agütsü. 50Aser pa temelaba Ozüngji teti taküm ta ni metet; anungji ni kechi jembir, aji Tebui kü dang kechi koda ashir yamaji ni jembir.”

Currently Selected:

YOHAN 12: ANSEBSI

Highlight

Copy