YOHAN 11

Lazar Asüba Indang

1 # Luk. 10.38,39. Bethani nung aliba nisung ka tenüng agi Lazar shiranga liasü. Mari aser la teyi Martha iba yimer liasü 2#Yoh. 12.3. Iba Mari shibai Kibuba dak teronem menemba totzü mezütsür, pei kulang agi pa tetsüng aidoktsü; la tenu Lazar shiranga liasü 3Anungji teyi o tenu nati pa dangi yoka ashi, “Kibuba, ajiang, nai shiba meimer pa shiranga lir.” 4Saka kodang Yisui aji angashi, pai ashi, “Iba shirangbaji tasütsüsa masü, saka Tsüngrem chir aji agi sentsü wangshidaktsütsüsa ibaji Tsüngrem sentsüwangshi asoshi lir.” 5Yisui Martha, aser Mari aser tenu meim. 6Anungji kodang pa shiranger ta angashi, idangji pa kong liasü idakji pai ananü munglok. 7Aji sür külen pai pei nütsüngtem dang ashi, “Asenoki ano Yihuda limai odi.” 8Nütsüngtemi pa dang ashi, “Tesayur, tawato-ang Yihuda nungeri ne dak lung agi aontsü bushia liasü; aser nabo ajagi tanaben onür no?” 9Yisui langzü, “Anogo ka nung ghonda terana masü ama? Anüngdang jajara nisungi tetsüng memetsür, kechiaser pai iba alima tesangwa angur. 10Saka nisungi aonung jajara tetsüng metsür, kechiaser tesangwaji pa dak mali.” 11O ya jembir külen pai parnok dang ashi, “Asen tembar Lazar amua ogo, saka pa amua aoba nungi sakdaktsütsü ni aor.” 12Anungji nütsüngtemi pa dang ashi, “Kibuba, pa amua oa lira, pa ajungtsü.” 13Tang Yisui pa asüba indang jembi; saka amua oa anisüngzükba indang jembira ta parnoki bilem. 14Idangji Yisui parnok dang jangjajangja ashi, “Lazar süogo.” 15Nenoki amangtsüsa ni yangji maliba asoshi nenok atema ni pelar; aji saka asenok pa dangi odi. 16Anungji Toma shiba dang chakrep chir ta ajar, pai pei medemer nütsüngtem dang ashi, “Pa den asütsüsa asenoka odi!”

Yisuji Shia Aruba Aser Taküm

17Anungji kodang Yisu aru, Lazar joko leper nung pezünü liogo ta pai angu. 18Bethaniji Yirusalem anasa mile ana shi dang pilar liasü. 19Tenu atema tena mulung süngzükdaktsütsü asoshi Martha o Mari na dangi Yihuda nunger aika arua liasü. 20Anungji Marthai kodang Yisu arudagi ta angashi, lai pa lenji ao saka Maribo kidang mena liasü. 21Anungji Marthai Yisu dang ashi, “Kibuba, na idaki ali asübo künu mesüla. 22Ano ni metet, tanga nai Tsüngrem dang kechisa asüngdangdir, pai ne nem agütsütsü.” 23Yisui la dang ashi, “Nenu shia arutsü.” 24Marthai pa dang ashi, “Tatem anogo nung tanaben shia aruba mapang nung pa shia arutsü ta ni metet.” 25Yisui la dang ashi, “Shia aruba aser taküm ni lir. Shibai kü dak amangdir, pa süaka taküm alitsü; 26aser shibaisa taküm lidir aser kü dak amangdir, kodanga masütsü. Nai ya amanger asü?” 27Lai pa dang langzü, “Hau, Kibuba, alimai tarutsü aliba Tsüngrem Chir Khristaji na lir ta ni amanger.”

Yisu Ajepba

28Lai ya shir külen lai ao aser tenu Mari miima aja aser la dang ashi, “Tesayur yangi lir, aser pai na ajar.” 29Lai ya angashidang yakta aramesoa pa dangi ao. 30Tang ano Yisu yimtaki maru, saka Marthai pa kechi nung ajuru yangjisa liasü 31Idangji Yihuda nunger shir la süngzükdakja la den kidang liasü, parnoki Mari yakta aramesoa tuguba ngua, la leper nung ajebtsü aor ta bilem aser la sülen anitak. 32Anungji Yisu kong liasü, Mari aji tonger pa ngua pa tsüngdang apudaka ashi, “Kibuba, na idaki ali asübo künu mesüla.” 33Anungji kodang Yisui la aser la den aruba Yihuda nunger jebya angu, pa temulung raksa, aser menungra-a ashi, “Nenoki pa kechi nung ayu?” 34Parnoki pa dang ashi, “Kibuba, arua ajiang.” 35Yisui ajeb. 36Anungji Yihuda nungeri ashi, “Pai pa koda meim ajiang!” 37Saka parnok kari ashi, “Iba nisung shibai nükpokba tenük lapoktsü, pai iba nisung mesüdaktsüla süng na?”

Lazar Shia Arudaktsüba

38Anungji Yisu tanaben temulung shiseta leper jagi aru. Iba lepji leprungki ka, aser kikümbang nung lungpak ka liasü. 39Yisui ashi, “Nenoki lungpakji ajungtokang.” Shiba tasü liasü pa teyi Marthai Yisu dang ashi, “Kibuba, pa joko teshinem menemer; kechiaser pa sür pezünü buba.” 40Yisui la dang ashi, “Nai amangra Tsüngrem sentsüwangshi angutsü ta ni ne dang meshika ma?”

41Anungji parnoki lungji ajungtok. Aser Yisui temalen repranga ashi, “Oba, nai kü dang angashi nung ni ne nüng asanger. 42Aser nai teti kü dang angar ta ni metet. Joko meketa noktaka aliba telok atema, nai ni yok ta parnoki amangtsü asoshi, ni o ya ashir.” 43Aser pai yamaji jembir külen ola tulu agi ayimten, “Lazar, adokang.” 44Tasüba nisungji, teka aser tetsüng mang alungba sü agi naibanger aser pa tejak asentzü aiba sü agi meibanger adok. Yisui parnok dang ashi, “Pa sala-ang aser chiokang.”

Yisu Tepsettsü Tasa Asaba

(Mat. 26.1-5; Mar. 14.1-2; Luk. 22.1-2)

45Anungji Yihuda nunger aika shirnok Mari dangi aru aser pai inyakba angu, parnoki pa dak amang. 46Saka parnok kar Farisitem dangi ao aser Yisui kechi inyak aji parnok dang ashi. 47Anungji putiungertem aser Farisittemi mungdang sentepa ashi, “Asenoki kechi inyaktsü? Kechiaser iba nisungi temaitsü aika inyaker. 48Asenoki pa odangsa toktsüra, nisung ajaki pa dak amangtsü, aser Rom. nungertem arur asen temeshi tenla ki aser asen kin ajonga raksatsütsü.” 49Saka parnok rongnung ka tenüng agi Kaifa, shiba iba kümji temaba putir ata-a liasü, pai parnok dang ashi, “Nenoki kecha memetet. 50Asen kin ajonga samadangbo nüburtem asoshi nisung ka asübaji-ang nenok asoshi tajungba ta nenoki mangateter.” 51Tang pai ya pei temulung agi dang ashir masü, saka pakümji pa tematiba putir asü nung kin asoshi Yisuji asütsüla ta pai shina jembi. 52Aser kin asoshi dang masü, saka ano senshia aliba Tsüngrem chirtem ka küma külemi pai anitentsü asoshi pai ya shin. 53Anungji iba anogo nungjagi parnoki pa tepsettsü tasa asa.

54Anungji Yisui joko Yihuda nunger rongnung otia mejaja, joko yang nungjagi arem anasa aliba linük, Efraim ta ajaba yim leni aenshia ao; aser yangji pai nütsüngtem den ali. 55Tang Yihuda nunger Kümtettsü Benjong anasa liasü aser Benjongji matong dang temeket kishikina nungi nisung aika pei sasa meshitettsü asoshi Yirusalemi aru. 56Anungji parnoki Yisu bushi, aser tenla kidang noktaker parnok o parnok na jembitepa ashi, “Nenoki kechi bilemer? Pa Benjongi marutsü asü?” 57Pa aputsü asoshi pa kong aliar kari metetra, aji sayutsüla ta putiungertem aser Farisitemi ozüng agüja liasü.

Currently Selected:

YOHAN 11: ANSEBSI

Highlight

Copy