YOHAN 13

Nütsüngtem Tetsüng Shidoktsüba

1Tang Kümtettsü Benjong matongdang, iba lima nungi pila-a Tebu dangi aotsü mapang tongogo ta Yisui meteta; alima nung aliba pei nüburtem pai meima liasü, aser pai tatem tonga parnok meim. 2Aser aonung chiyungdang Simon chir Yihuda Iskarioti pa bendanga agütsütsü pa mulungjangi mojing aitadoker liasü. 3Tebui pa ket nung ajak bendanga agütsüogo aser pa Tsüngrem nungi aru aser Tsüngrem dangisa meyipa aor ta Yisui meteta; 4pai chiyungdak nungi noktaker pei sü ayu aser temang aidokba sü ka bena arua pa sasa nangri akang. 5Idangji pai susa nung tzü shiok aser nütsüngtem tetsüng shidoktsütsü aser temang aidokba sü kechi agi pai nangri kanga liasü, iba jagi pai parnok aidoktsütsü tenzük 6Pai Simon Peter dangi aru, Peteri pa dang ashi, “Kibuba, nai kü tsüng shidoktsür no?” 7Yisui pa dang langzü, “Ni kechi inyaker nai tangbo memetet; saka nai tansür angatettsü.” 8Peteri pa dang ashi, “Nai kodanga kü tsüng teshidoktsü.” Yisui pa dang langzü, “Ni na meshidoktsüra, na kü den kecha shilem maka.” 9Simon Peteri pa dang ashi, “Kibuba, kü tsüng dang masü, saka kü teka aser kü kolaka shidokjangma.” 10Yisui pa dang langzü, “Shiba tzü chigu-ogo, pai tetsüng alema shidoktsü tenüngdaktsü maka, pa ajak merüka lir; saka nenok ajakbo masü.” 11Kechiaser shibai pa bendanga agütsütsü aji pai metet, anungji pai ashi, “Nenok ajakbo merük masü.”

12 # Luk. 22.27. Anungji pai parnok tetsüng shidoktsür külen, pai pei sü abener tanaben mener parnok dang asüngdang, “Tang kechi nenok dang inyakogo, nenoki meteter ma? 13Nenoki kü dang Tesayur, aser Kibuba ta ajar aser nenoki aji tim ashir; kechiaser aji ni. 14Ajangla ni nenok Kibuba aser Tesayuri nenok tetsüng shidoktsüra, nenokia kati ka tetsüng shidoktsütsüla. 15Kechiaser ni nenok dang inyakba ama nenokia inyaktsü asoshi ni nenok nem tatishitsü ka agütsüogo 16#Mat. 10.24; Luk. 6.40; Yoh. 15.20. Atangji züngpong ni nenok dang shidi, pei kibur dang nungi tenyaba tuluba masü, aser pei tenyasang dang nungi tenyaba tuluba masü 17Nenoki itemi meteta benshira, nenok tepelatsü. 18#TKe. 41.9.Ni nenok ajak indang jembitsü masü; ni shir shimteter parnok ni metet; shibai kü chiyungtsü achir pai ni anema pei tetsüng mekang ta shia aliba Laishibaji ataloktsü tim 19Ya kodang atalokdir, ni pa-a ta nenoki amangtsü asoshi, ano matalokdang, tang nungi ni nenok dang ashi. 20Atangji züngpong ni nenok dang shidi, ni tenyaba nisung shibai agizükdir aser shibai ni agizüker, pai ni tenyaba agizüker.”

Yisui Pa Ashioktsüba Indang Shinba

(Mat. 26.20-25; Mar. 14.17-21; Luk. 22.21-23)

21Yisui yamaji shir külen pa temulung ayanga kuli agüja ashi, “Atangji züngpong ni nenok dang shidi, nenok rongnung kati ni bendanga agütsütsü.” 22Pai aji shiba indang jembir ta nütsüngtemi bangka-a parnok o parnok na reprangtep. 23Pa nütsüngtem rongnung ka, shiba dang Yisui meim, pa Yisu teku nung mangaloker mena liasü. 24Anungji Simon Peteri pa dang tuyu aser ashi, “Pai shiba indang jembir-ar pai dang shidakjang.” 25Anungji nütsüng shiba Yisu teku nung mangaloka liasü, pai asüngdang, “Kibuba, paji shiba?” 26Yisui langzü, “Amtsükji aontzü nung metener shiba nem ni aji agütsüdir ibaji pa.” Amtsükji aontzü nung meten aser aji agiteta Yihuda Iskariot nem agütsü. 27Kodang pai amtsükji achi, satan pa daki ai. Yisui pa dang ashi, “Na kechi teinyaktsü ali, aji yakta inyakadokang.” 28Kechiba Yisui pa dang yamaji jembi, idakji langbang züngdang mena alir shingaia memetet. 29Kechiaser Yihuda ket nung sen juli yua alinung Benjong asoshi nüngdak kar aliang ta mesüra sensaker nem langka agüjang ta Yisui pa dang ashir-a ta nütsüngtem karibo bilem. 30Anungji pai amtsükji agizüker külen pai idangyongji kimai tugu. Joko aji aonung liasü.

Temelaba Ozüng Tasen

31Anungji pa kimai tugur külen,Yisui ashi, “Tang Nisung Chir sentsüwangshir, aser pa dak Tsüngrem sentsüwangshir. 32Tsüngremji pa dak sentsüwangshidaktsür süra, Tsüngremia pei dak pa sentsüwangshidaktsütsü aser pai aji yakta dang inyaktsü. 33#Yoh. 7.34.Tila tanurtem, joko ni nenok den mapang tatsüka dang alitsü, nenoki ni bushitsü; aser ni Yihuda nunger dang ashiba ama yamaji ni nenok dang ashir, Ni kongi aor, nenok ajagi marutettsü. 34#Yoh. 15.12,17; 1 Yo. 3.23; 2 Yo.5. Ni nenok nem ozüng tasen ka agütsür; ni nenok meimba ama, yamaji nenoka kati ka den meimtepang 35Nenoki kati ka den meimtepra, ajangla iba jagi nenok kü nütsüngtem ta nisung ajaki metettsü.”

Peteri Menangzüktsüba Indang Shinba

(Mat. 26.31-35; Mar. 14.27-31; Luk. 22.31-34)

36Simon Peteri pa dang ashi, “Kibuba, na kongi aor?” Yisui langzü, “Ni kongi aor nai tangbo manidaktettsü; saka nai tesülenang anitaktettsü.” 37Peteri pa dang ashi, “Kibuba, kechiba ni tangbo ne sülen manidaktettsü? Na asoshi ni kü taküm agütsütsü.” 38Yisui langzü, “Nai ni asoshi ne taküm agütsütettsü ama? Atangji züngpong ni ne dang shidi, nai ni asemben menangzük tashi ani makongtsü.

Currently Selected:

YOHAN 13: ANSEBSI

Highlight

Copy