ÂTHAONA 49

Zakaw ta a sawzy byhnâ a awpa ei

1Zakaw ta a sawchapawzy aw ta, “Na vaw chadô teh u, noh hnôhlâ ta nama chô liata hmo a vaw tlô awpazy ei cha chho aw ei,” tah ta, hetana heta a chho ei:

2“Nâmo, Zakaw sawchapawzy saih u,

A hmaohpa ta nathlie u la,

Nama paw Izarei bie nathlie teh u.

3“Rubena, nâ cha ei sawchapaw uhtheipa châ chi ta,

Ei hmotaotheina na châ;

Ei thatlôna thei hmiatuapa châ chi ta,

Zachhih chaipa nata biehnei chaipa na châ.

4Châhrasala ti hawhta a i leipa na châ;

Na paw rakhô kiah chi ta,

Na papuapaleipa vâta,

Chônôchaina to khao aw va chi.

Ei rakhô a kiapa kha!

5“Simeôna nata Livai cha unawh châ ei ta,

Ama zaozizy cha thachahra hmâna chaihraizy a châ.

6Ama ryureina liata ei thlahpa a hlao leipa aw ta,

Ama pakhypi liata ei rônahna a hlao aw vei.

Hiehâhpa ta chyhsa thie ei ta,

Khotlâ ta viahchao tôhpazy ama chhawh.

7Ama pathichhiena cha chhiesapa ta y mawh sy,

A tah tu pâ haw;

Ama hiehâhna chhao chhiesapa ta y mawh sy,

A ru tu pâ haw.

Zakaw liata pachhaihpazaoh aw ei na ta,

Izarei liata ei hiepatla aw ei.

8“Zudâh, nâ cha na unawhzy ta cha reithai aw ei ta,

Na ku ta na chariahzy rao patu aw ta,

Na paw sawchapawzy na hmiakô liata amâ bôh aw.

9 # Maluh 24.9; Biep 5.5 Zudâh cha chakeibarôhneipa taw châ ta,

Hy ei sawchapawpa,

Sa taipa tawhta a laiseihpa na châ.

Zudâh cha a bôh ta,

Chakeibarôhneipa hawhta a byu ta,

Chakeibarôhneipa panô hawhta â byu tyh;

Ahy a pathyu ngâh aw?

10Ryureina chôchahrei ta Zudâh puasai leipa aw ta,

Ryureituhpa chôchahrei a pheizy likawh tawhta pua aw vei.

Reithaina a hnohta vaw tlô aw ta,

Phopizy ta a bie ama zyh aw.

11A alâ taw kre zôh liata hraih aw ta,

Kre zôh phapa liata a alâ taw a hraih aw.

A chysiazy kresawhti liata pasu aw ta,

A pohzy kre thisaih liata a ny aw.

12A mokhaohzy kresawhti hlâta dô via aw ta,

A hâhzy sâhpiti hlâta a dieh via aw.

13“Zebulawna cha tilaipi kiah liata pahrâ aw ta,

Balyh pahâna raphyu châ aw ta,

Sidaw taihta a râhri a tlô aw.

14“Iskâra cha alâ tôhpa chahrapa châ ta,

Mietaku zaw hry liata â byu.

15Apahâna su a phapa ta pahno ta,

Râh chhao khochhihpa a châzie a hmô.

Hmo phao awpa ta a ngiatlâh za pahnai ta,

Rai pahriasa raruahna liata sei ta a y.

16“Dânâ Izarei phopi miakha ta a duah aw ta,

A phopi chô liata ryureituhpa a châ aw.

17Dânâ cha lâpi liata parih châ aw ta,

Lâthlôh liata vâzi a châ aw;

Arâ ngavâhmaothy liata pachu aw ta,

Arâ a kiahpa â die lâta a patlasatuhpa a châ aw.

18“Hy Abeipa, na pachhana ei hâ thlâh haw!

19“Kâdâ cha chariahpazy ta siehnao aw ei ta,

Châhrasala ama ngavâhmaothy liata a tu aw ei.

20“Asera cha a niedo pha aw ta,

Abei pati pahâhpazy a papua aw.

21“Nâthalai cha sasu pazopa châ ta,

Taw pha a pataw lymâ aw.

22“Zawsi cha kre zôh pathei khoh ngaitapa châ ta,

Tihnawh kiah liata a pathei khoh ngaitapa a châ;

Thokhy khô lâ taihta a chiahzy â zawh.

23Libaw kathaipazy ta thata a dyuh ei ta,

Ano cha ka ei ta thata amâ hao.

24Châhrasala Zakaw Khazohpa Thatlôpa ku ta,

Vaituhpa Izarei Lôpanô baona ta,

A libaw pachyu ta,

A bâh thapatlôpa ta a y.

25Châ bao awpa na paw Khazohpa vâta,

Byhnâ châ pie awpa Atotaotheipa vâta,

Chô lâ vâ byhnâzy to aw chi ta,

A ry lâta ti athupa byhnâzy topa ta,

Sâhpi nata chhi byhnâzy na to aw.

26Na paw byhnâzy cha nâ pathlatuhpazy byhnâ khô ta,

Chhâzaw tlâhthlôhzy chhâna taihta a tlô.

Chazy cha Zawsi luh liata y aw ta,

A unawhzy tawhta pananopa khi liata a y aw.

27“Benzami cha changie zohpa châ ta,

My ta sa taipa nie aw ta,

Zâlâ ta hraopa sôh a rai aw,”

tah ta.

28Cha zydua cha Izarei pho hrawh hleinozy châ ei ta, chazy cha byhnâ a awpa no ei ta ama paw biereipazy a châ. Byhnâ ama to awpa lymâ hawhta byhnâ a awpa ei.

Zakaw thina nata pabuna

29Zakaw ta âmo cha ryu a hi ta, ama hnohta, “Ei chiheihzy hnohta pahlyhpa ta ei y daihmâ haw. Hiti chyhsa Epharaw lyu liata a ypa lôpu liata na pabu muh vy. 30#Âtn 23.3-20Abarahâ ta thlâ su châta hnei awpa ta, Hiti chyhsa Epharaw lôpu a lyu chhaota a chaleipa, Kâna râh Mamre kiapâh ta a ypa Mâkâpelâ lyu liata lôpu tlai liana kha na pabu muh vy. 31#Âtn 25.9,10; Âtn 35.29Cha liata Abarahâ nata a lapinô Sârâ pabu ei ta, cha liata Aisika nata a lapinô Rebekâ pabu ei ta, cha liata Liah ei pabu. 32Cha liata lyu nata lôpu zy cha Hiti mo tawhta chaleipa a châ,” tah ta. 33#Hmt 7.15Zakaw cha a sawchapawzy ryu â hi khai nahta, rakhô lâ a phei khaih ta, a thlahpa pathlie ta, a chiheihzy hnohta pahlyhpa ta y ha ta.

Currently Selected:

ÂTHAONA 49: MARVBSI

Highlight

Copy